Jeremías 6 - Chuya Qellqa 1992

Jerusalén llaqta atacasqa kasqanmanta

¹ ¡Benjaminpa mirayninkuna, Jerusalén llaqtamanta lluptiychik! ¡Tecoa llaqtapi trompetata tocaychik! ¡Bet-haquerem llaqtapi señalta qosnichiychik! Norte lawmantam sasachakuy hamuchkan, hatun ñakariymi hichpamuchkan.

² Sión llaqtapa kuyayllapaq wawantam purmachisaq.

³ Michiqkunam ovejankuwan kuska paypa contranpi hamunqaku, carpankutam muyuriqninpi sayachinqaku, sapakamam ovejankuta chaypi michinqaku.

⁴ Enemigonkunam kaynata qaparichkanku: ¡Alistakuychik paypa contranpi peleananchikpaq! ¡Hatariychik chawpi punchawta atacananchikpaq! Intipas seqaykuchkanñam, tutayaypas hawanchikpiñam.

⁵ ¡Hatariychik! ¡Tuta atacaspa palacionkunatapas tuñichimusunchik! nispanku.

⁶ Tukuy Atiyniyuq Tayta Diosmi kaynata nin: Sachakunata kuchuychik, Jerusalenta atacanaykichikpaq rampata ruwaychik. Ñakarichinakuypa huntasqan kasqanraykum Jerusalén llaqta castigasqa kanqa.

⁷ Imaynam pukyumanta yaku mana tukuyta lloqsimun, chaynam Jerusalenmantapas mana allinllaña lloqsimuchkan. Ñakarichinakuywan suwanakuyllañam chaypiqa uyarikuchkan, chaypiqa onqoqkunawan heridasqa kaqkunallañam qawakuchkan.

⁸ ¡Jerusalén llaqta, wanakuyña, qanmanta mana karunchakunaypaq! Yanqañataq chunniqman tikraruykiman, yanqañataq mana pipa yachananman tikraruykiman.

Castigasqa kanankumanta

⁹ Tukuy Atiyniyuq Tayta Diosmi kaynata nin: Israelmanta puchuqkunatam maskaypaq maskaykunqaku, imaynam uvasta suma-sumaqta pallapachkaq hina.

¹⁰ Chaymi nirqani: ¿Pitataq rimapayasaq? ¿Pimantaq willasaq? ¿Pitaq uyariwanman? Rinrinkum tapasqa kachkan, chayraykum paykunaqa uyariyta mana atinkuchu; palabraykimantapas penqakunkum, chayraykum mana uyariyta munankuchu.

¹¹ Dios Taytalláy, qampa piñakuynikiwanmi huntasqa kachkani, manañam aguantayta atiniñachu, nispay. Hinaptinmi Tayta Dios niwarqa: Callepi warmakunaman, tropanpi jovenkunaman, piñakuynikita chaqchumuy. Warmikunam qosankuwan kuska presochasqa kanqaku, yuyaqkunawan ancha yuyaqkunam preso apasqa kanqaku.

¹² Wasinkuwan chakrankupas hukpaqñam kanqa, warminkupas hukpaqñam kanqa. Kay nacionpi yachaqkunata castigaptiymi chaynaqa kanqa.

¹³ Paykunaqa hatunpas taksapas llapallankum apuyayllamanña qokurunku, profetankunawan sacerdotenkunapas engañakuqllañam rikurirunku.

¹⁴ Llaqtaypa heridantapas hawallantam hampiykunku, hinaspankum sasachakuy kachkaptinpas hawkayaymi kachkan ninkuraq.

¹⁵ Millakusqay kaqkunata ruwachkaspankupas manam paykunaqa penqakunkuchu, manañam penqakuyninkupas kanñachu. Chayraykum castigasqay punchawpi castigasqaykunawan kuska wichinqaku. Ñoqa Tayta Diosmi chaynata nini.

Israelpa mana kasukusqankumanta

¹⁶ Tayta Diosmi runankunata kaynata nin: Ñankunapi sayaykuspa qawariychik, ñawpaq ñankunamanta tapukamuychik, mayqanmi allin ñan kasqanta tapukamuychik; chayninta purispaqa samaytam tarinkichik, nispa. Paykunam ichaqa nirqaku: Manam chaynintaqa puriymankuchu, nispanku.

¹⁷ Tayta Diosmi llaqta waqaychaqkunata churaspan runankunata nirqa: Trompeta waqamuptin uyarinaykichikpaqmi uyan-uyanlla kankichik, nispa. Paykunam ichaqa nirqaku: Manam ñoqaykuqa uyarisaqkuchu, nispanku.

¹⁸ Chayraykum Tayta Dios kaynata nin: Nacionkuna uyariychik llaqtayta iman pasananta yachaychik.

¹⁹ Allpa pacha, qampas uyariy: Tukuy mana allinkunata piensasqankumantam runaykunaman ñakariyta kachamusaq. Paykunaqa manam rimapayasqaytapas kasukurqakuchu, kamachikuyniykunatapas wischupakurqakum.

²⁰ ¿Imapaqtaq Sabá nacionmantaraq inciensota apamuwankichik? ¿Imapaqtaq karumantaraq miski asnaq plantakunata apamuwankichik? lliw kañana sacrificiokunata, tukuy rikchaq ofrendakuna apamuwasqaykichiktapas manañam munanichu.

²¹ Chayraykum ñoqa Tayta Dios kaynata nini: Kay llaqta mitkananpaqmi trancata churasaq, chaypim tayta-mamanpas churi-wawankuwan kuska wichinqaku, vecinonpas, puriqmasinkunapas chaymanmi wichinqaku, hinaspam chaypi wañunqaku.

Norte lawmanta hamuspa atacaqkunamanta

²² Tayta Diosmi kaynata nin: Norte lawmantam tropakuna hamuchkan. Karu-karu allpamantam ancha atiyniyuq nación hatarimuchkan.

²³ Flechakunawan lanzakunawan armasqam hamuchkanku, mana llakipayakuq runakunam hamuchkanku; Lamar qocha hinaraqmi qapariyninkupas, caballokunapi sillakuykuspam Sión llaqtata atacaq-atacaqllaña kallpamuchkanku.

²⁴ Jerusalén llaqtapi runakunam kaynata ninku: Willakuytam uyariniku, manchakuymantam manaña kallpayuq kachkaniku, wachakuq warmi hinañam, nanaypa ñakariypa huntasqan kachkaniku.

²⁵ ¡Chakramanpas amaña lloqsiychikchu, ñannintapas amaña puriychikchu! Enemigoqa ancha armasqam kachkan, manchakuymi tukuy hinastinpi kakuchkan.

²⁶ ¡Llaqtamasillaykuna, qachqa pachawan churakuychik, uchpapiyá qochpaychik! ¡Sapallan wawan wañukuptin waqaq warmi hinayá qaparkachaychik! Tuñichiqninchikmi chayaramunña.

²⁷ Tayta Diosmi kaynata niwarqa: Qamtaqa torreta hinam llaqtaypi churarqayki, runaykunapa imaynam kawsasqankuta qawanaykipaqmi churarqayki.

²⁸ Paykunaqa llapallankum mana kasukuq runakuna, llapallankum chinkaypi puriq cuento qepikuna. Bronce hina fierro hina mana sientiqmi kanku, llapallankum mana allin ruwaqkuna.

²⁹ Fuelleswan pukuchispam ninapi metalta chulluchinku, mana allin ruwaq runakunatam ichaqa chinkanankuta munaptinchikpas manam chinkanqachu.

³⁰ Wischupakusqa qollqewanñam sutichasqa kachkanku, ñoqa Tayta Diosta qepanchawasqankuraykum chaynaqa kachkanku.