Jeremías 47 - Chuya Qellqa 1992

Filisteokunapa contranpi profetizasqanmanta

¹ Gaza llaqtata Faraón manaraq munaychakuchkaptinmi, filisteokunapa contranpi profeta Jeremiasta Tayta Dios kaynata nirqa:

² Norte lawmantam repunte lloqlla hamuchkan, llimparichkaq mayu hinam kallpamuchkan; naciontawan chaypi kaqkunatam pamparun, llaqtakunatawan runankunatam pamparun. Chay nacionpi yachaqkunam qaparinku, runakunam nanaywan qaparinku.

³ Caballokunapa kallpasqanta, carretakunapa ruedanpa qaparisqanta uyarispankum, llapa taytankupas manaña kallpayuq rikurispanku wawa-churinkuta saqerunku.

⁴ Filistea llaqtapa chinkanan tiempom chayaramun, Tiro llaqtata chaynataq Sidón llaqtata yanapaqkunapa puchukananku tiempom chayaramun. Filisteokunatawan Creta islapi puchuqkunatam Tayta Dios chinkachinqa.

⁵ Gaza llaqtayuqkunam llakikuymanta chukchankuta rutukurunku, Ascalón llaqtayuqkunam llakikuymanta mana rimaqña rikurirunku. Pampa lawkunapi puchuqkuna ¿haykapikamataq aychaykichikta kuchupakunkichik?

⁶ Tayta Diospa espadan, ¿haykapitaq samanki? Vainaykiman kutiykuspayki samaykuyña.

⁷ Ichaqa ¿imaynataq samaykunman Ascalón llaqtata, lamarpa patanpi llaqtakunata atacananpaq Tayta Dios kamachichkaptinqa? Chaypaqmi destinasqa karqanki.