Jeremías 17 - Chuya Qellqa 1992

Huchanmanta Judá nación castigasqa kasqanmanta

¹ Judá runakunapa huchankunaqa fierromanta cincelwan qellqasqam kachkan, diamantemanta puntawan qellqasqa kachkan, sonqonkupa tablanpim qellqasqa kachkan, altarninkupa esquinankunapim qellqasqa kachkan.

² Wawa churikichikkunapas altarkunatawan Asera idolokunatam yuyarinku, chaykunam tarikurqa rapisapa sachakunapa sikinpi, alto moqokunapa puntanpi,

³ chakrakunapi hinaspa orqokunapi. Huchallikusqaykichikmantam lliw nacionpi kaq capillaykichiktapas, chaynataq qori-qollqekichiktawan tukuy ima kapuqnikichiktapas saqueachisaqmi.

⁴ Herenciaykichik kananpaq qosqay allpatam saqenkichik, mana reqsisqaykichik nacionpim enemigoykichikkunata servichimusqaykichik, piñakuyniymi nina hina ratarirun kañasunaykipaq.

Wakin willakuykunamanta

⁵ Tayta Diosmi kaynata nin: Pipas runamasinpi hapipakuq runaqa ñakasqayá kachun, ñoqa Tayta Diosmanta rakikuspa runapa kallpallanpi hapipakuq runaqa ñakasqayá kachun.

⁶ Chayna runaqa, chunniqpi wiñaq retama hinam kanqa, allin kaqtaqa manam haykapipas rikunqachu; aswanqa rumikunapa chawpinpi, qollpa allpapi, mana pipapas yachanan allpapi wiñaq sacha hinam kanqa.

⁷ Ñoqa Tayta Diospi hapipakuq runam ichaqa, ñoqa Tayta Diospi suyasqanrayku bendecisqa kanqa.

⁸ Chayna runaqa, mayu patanpi plantasqa sacha hinam kanqa, yakupa patanpi sapichakuq sacha hinam kanqa, rupay chayamuptinpas manam manchakunqachu, llaqenkunapas llanllay-llanyaymi kanqa. Chiraw tiempopipas manam hukmanyanqachu, mana tipiytam rurunqapas.

⁹ Runapa sonqonqa, tukuy imamantapas aswan engañakuq hinaspa mana allinpa huntasqanmi. ¿Pitaq allinta reqsinman?

¹⁰ Ñoqa Tayta Diosllam runakunapa yuyaymanaynintawan sonqontaqa allinta reqsini; chaynapi imam ruwasqankuman hina sapakamaman pagapunaypaq.

¹¹ Imaynam hukpa runtunta oqllaq yutu hinam mana allinkunata ruwaspa apuyaruq runaqa, manaraq machuyachkaptinmi qorinpas qollqenpas tukunqa, hinaptinmi wakchayaypi tukunqa.

¹² Ñoqanchikpa yupaychananchik temploqa Tayta Diospa trononmi, qallariymantapacham alto-altopi kachkan, chay sitioqa kuyayllapaqmi.

¹³ Israelpa hapipakunan Dios Taytalláy, pipas qepanchakusuqnikiqa penqaypim tarikunqa. Qanmanta rakikuqkunaqa allpapi qellqasqa suti hinam chinkarunqa. Chaynaqa, kanqaku, kallpaq mayu hina kachkaptiki qam Tayta Diosta saqerusqankuraykum.

Tayta Diosta Jeremías mañakusqanmanta

¹⁴ Dios Taytalláy, hampiykuwaptikiqa sanoyasaqmi, salvaykullawaptikiqa salvakusaqmi, qamllatam yupaychasqayki.

¹⁵ Runakunam kaynata niwachkanku: ¿Imataq pasarun Tayta Diospa nisqankunawan? kunanyá cumplikuchun, nispanku.

¹⁶ Chaywanpas qanmanqa manam hamurqani ñakarichinaykipaq mañakuqchu, manataqmi sasachakuypi kanankutapas munarqanichu. Qamqa yachankim qayllaykipi imam rimasqaytapas.

¹⁷ Amayá qamqa manchachiwaychu, sasachakuy punchawpi waqaychaqniymi qamqa kanki.

¹⁸ Qatikachawaqniykuna penqaypi tarikuchunku, amayá ñoqachu; paykunayá manchakuypiqa kachunku, amayá ñoqachu; sasachakuy punchaw paykunaman chayachun paykunatayá pasaypaqta chinkarachiy.

Samana punchawpi samanankumanta

¹⁹ Tayta Diosmi niwarqa: Rispayki Runakunapa Yaykunan punku nispa sutichasqanku punkupi sayamuy, chaynintam Judá nacionpi reykuna lloqsinku hinaspa yaykunkupas. Jerusalenpa wakin punkunkunapipas chaynata ruwamuy.

²⁰ Hinaspa llapa runakunata kaynata nimuy: Judá nacionpi reykuna, Judá nacionpi runakuna, Jerusalén llaqtapi yachaqkuna, kay punkunta yaykuqkuna, Tayta Diospa nisqanta uyariychik.

²¹ Tayta Diosmi kaynata nin: Vidaykichikraykuyá waqaychakuychik. Amayá samana punchawpiqa Jerusalén llaqtapa punkuntaqa cargakunata apaykuychikchu.

²² Samana punchawpiqa amam wasikichikmantapas cargakunataqa hurqonkichikchu, nitaqmi llamkankichikpaschu. Samana punchawtaqa Tayta Diospaqmi sapaqchankichik, chaynatam ñawpaq taytaykichikkunaman kamachirqani.

²³ Taytaykichikkunam ichaqa mana uyarirqakuchu nitaqmi kasuwarqakuchu, aswanqa sonqonkuta rumiyarachispankum mana kasukurqakuchu nitaq wanakurqakuchu, nispa.

²⁴ Ñoqa Tayta Diosmi kaynata nini: Kasukuychikyá, amayá samana punchawpiqa kay llaqtapa punkuntaqa ima cargatapas apaykuychikchu, chay punchawtaqa ñoqapaq sapaqchaspa ama imatapas ruwaychikchu.

²⁵ Chaynata ruwaptikichikqa, rey Davidpa mirayninmanta kamachikuqkunam carretakunapi chaynataq caballokunapi sillada kay llaqtapa punkunta yaykunqaku. Paykunaqa yaykunqa Judá nacionpa kamachiqninkunawan, Judá nacionpi yachaqkunawan hinaspa Jerusalenpi yachaqkunawan kuskam. Kay llaqtapiqa runakunam wiñaypaq yachanqaku.

²⁶ Runakunam Judá nacionpi llaqtakunamanta, Jerusalén llaqtapa muyuriqninmanta, Benjamín lawmanta, qechwa lawkunamanta, orqo lawkunamanta hinaspa Neguev lawmanta hamunqaku; hinaspam animalkunata lliw kañana sacrificiopaqwan wakin sacrificiokunapaq apamunqaku; apamunqakutaqmi kawsaykunamanta ofrendatawan inciensotapas chaynataq Tayta Diosman graciasta qonapaq ofrendakunatapas.

²⁷ Sichum mana kasuwaspa, kamachisqayman hina samana punchawta ñoqapaq mana sapaqchaspa, Jerusalén llaqtapa punkunta cargakunata apaykuptikichikqa, kay llaqtapa punkunkunatam kañaykusaq, hinaptinmi Jerusalén llaqtapa palacionkunatapas ruparunqa. Chay ninataqa manam pipas amachayta atinqachu, nispa.