Jeremías 11 - Chuya Qellqa 1992

Diospa pactonta mana kasukusqankumanta

¹ Tayta Diosmi kaynata niwarqa:

² Jeremías, kay pactopa nisqankunata uyariy. Judá nacionpi runakunamanwan Jerusalén llaqtapi yachaqkunaman willamuy

³ Israelpa yupaychasqan ñoqa Tayta Diosmi kaynata nini: Pactoypa nisqankunata mana kasukuq runaqa ñakasqa kachun.

⁴ Chay pactotam ñawpaq taytaykichikkunawan ruwarqani, metal chulluchina hornomanta hurqomuchkaq hina Egipto nacionmanta paykunata hurqomuspay, hinaspaymi kaynata nirqani: Tukuy nisqaykunata kasukuspaykichikqa chaynataq llapallan kamachisqaykunata ruwaspaykichikqa, runaykunam kankichik, ñoqañataqmi Diosnikichik kasaq.

⁵ Chaynata ruwaptikichikqa ñawpaq taytaykichikman prometesqaytam cumplisaq. Paykunamanmi prometerqani tukuy imapa qespinan chaynataq tukuy imapa kanan allpata. Chay allpapim kunan yachachkankichik, nispa. Chaymi ñoqa Jeremías nirqani: Dios Taytalláy, chaynayá kachun, nispa.

⁶ Tayta Diosñataqmi niwarqa: Judá nacionpa llaqtankunapiwan Jerusalén llaqtapa callenkunapi kaynata nimuy: Kay pactopa nisqankunata uyarispa ruwayman churaychik.

⁷ Taytaykichikkunata Egiptomanta hurqomuspaymi kasuwanankupaq kamachirqani. Chay tiempomantam kunankama kasuwanankupaq chaylla-chaylla rimapayarqani.

⁸ Ichaqa manam kasukurqakuchu nitaqmi uyarirqakuchu, aswanqa mana allin sonqonkupa munasqanman hinam kawsarqaku. Chayraykum chay pactopi nisqay castigokunata paykunapa contranpi kacharimurqani, nispa.

⁹ Tayta Diosqa niwarqataqmi: Judá nacionpi yachaqkunawan Jerusalén llaqtapi yachaqkunam contraypi hoqarikurunku.

¹⁰ Ñawpaq taytankupa mana allin ruwasqankumanmi qokurunku. Paykunaqa nisqaykunata mana kasukuspankum idolokunataña yupaycharqaku. Israel runakunawan Judá nacionpi runakunam, ñawpaq taytankuwan pacto ruwasqayta yanqacharunku.

¹¹ Chayraykum ñoqa Tayta Dios kaynata nini: Paykunamanmi hatun sasachakuyta chayachimusaq, chaymantaqa manam lluptinqakuchu. Yanapanaypaq qayakamuwaptinkupas manam uyarisaqchu.

¹² Hinaptinmi Judá nacionpi runakunawan Jerusalén llaqtapi yachaqkuna, inciensota kañaspa yupaychasqanku idolokunataña yanapakuyta mañakunqaku, ichaqa manam chay sasachakuymanta salvayta atinqachu.

¹³ Judá nacionpi yachaqkuna, haykam llaqtaykichikkuna kasqanman hinam idoloykichikkunapas achkallaña; haykam callekichikkunapas kasqanman hinataqmi, Baalman incienso kañanaykichik altarkunatapas achkallataña ruwakurunkichik.

¹⁴ Chaynaqa, Jeremías, amaña kay runakunarayku mañakuwaychu, nitaq qayakamuwaychu. Sasachakuypi kaspanku mañakuwaptinkupas manam uyarisaqchu.

¹⁵ Kuyasqay llaqtalláy llumpayta huchallikuchkaspaqa ¿imatataq kay temploypi ruwanki? ¿Yaqachu wirakunawan aychakuna ofrecewasqaykichik castigoyta qamkunamanta asurachinman? ¿Mana allinkunapi kachkaspachu anchata kusikunkichik?

¹⁶ Ñoqam sumaq ruruyuq rapisapa aceitunas sachawan suticharqayki. Kunanmi rayowan hina ninata ratarirachispay kañarusqayki, hinaptinmi kallmaykikunapas toqyasparaq rupanqa.

¹⁷ Ñoqa Tukuy Atiyniyuq Tayta Diosmi sacha plantachkaq hina qamkunata plantarqaykichik. Israel nacionpi chaynataq Judá nacionpi yachaqkuna, contraykichikpim castigokunata kachamusaq mana allinkunata ruwasqaykichikrayku. Qamkunam piñachiwarqankichik Baal idoloman inciensota kañapuspaykichik.

Enemigonkuna Jeremiasta wañuchiypi risqankumanta

¹⁸ Tayta Diosmi willaykuwarqa hinaptinmi yachaykurqani enemigoykunapa mana allinkuna ruwawanankupaq rimanakusqankuta.

¹⁹ Nakanankupaq pusasqanku manso carnero hinam ñoqaqa karqani. Manam yachakurqanichu contraypi kayna rimanakusqankutaqa: Ruruchkaq sachata hinayá kuchurusunchik, kay pachapi kaqkunamantayá chinkarachisunchik, paymanta manaña pipas yuyarinankupaq, nispa.

²⁰ Tukuy Atiyniyuq Dios Taytalláy, qamqa mana pimanpas sayapakuq juezmi kanki, runapa yuyaymanayninkunatawan tukuy sonqontam reqsinki. Paykuna vengakusqaykita qawaykachiway, qanmanmi kay sasachakuyniyta willakamuyki.

²¹ Anatot runakunam wañuchiwayta munaspa niwarqaku: Amañam Tayta Diospa sutinpiqa profetizankichu, mana chayqa wañurachisqaykikum, nispanku.

²² Chaymi Tukuy Atiyniyuq Tayta Dios kaynata niwarqa: Ñoqam paykunataqa castigasaq: Jovenkunam guerrapi wañunqaku, churinkuñataqmi qaripas warmipas yarqaymanta wañunqaku.

²³ Manam paykunamantaqa hukllapas puchunqachu. Anatot llaqtapi runakunamanqa castiganay punchawpim hatun sasachakuyta kachamusaq, nispa.