Isaías 39 - Chuya Qellqa 1992

Babilonia runakuna hamusqanmanta

¹ Chay punchawkunapim Babilonia nacionpi Baladanpa churin rey Merodac-baladán cartatawan regalota rey Ezequiasman apachimurqa. Chaykunataqa apachimurqa onqorusqanmanta sanoyarusqanta yacharuspanmi.

² Ezequiasmi chaykunawan kusirikuspan, mana imatapas pakaykuspan palacionpi kaqkunata paykunaman qawachirqa, qawachirqataqmi kamachikusqan nacionpi tukuy kapuqninkunatapas: Qorita, qollqeta, perfumekunata, miski asnaq aceiteta, armakuna waqaychanan wasita, wasinpi tukuy ima waqaychasqantapas.

³ Hinaptinmi profeta Isaías rey Ezequiasman hamuspan tapurqa: ¿Imamantaq chay runakuna hamusqaku? ¿Maylawtaqsi kanku? nispa. Ezequiasñataqmi nirqa: Paykunaqa karu-karu Babilonia nacionmantaraqmi hamusqaku, nispa.

⁴ Isaiasqa tapurqataqmi: ¿Imakunatataq palacioykipiqa rikurqaku? nispa. Hinaptinmi Ezequías nirqa: Palacioypi tukuy ima kapuqniytam qawarqaku, tukuy imatapas mana pakaspaymi qawachirqani, nispa.

⁵ Chaymi rey Ezequiasta Isaías nirqa: Tukuy Atiyniyuq Tayta Diospa nisqanta uyariy:

⁶ Hamuchkanmi punchaw llapa imaykikunatawan ñawpaq taytaykikunapa kunankama tukuy ima huñusqankuta mana puchuykuspa Babilonia nacionman apanankupaq.

⁷ Miraynikikunatapas Babiloniamanmi reyta servimunankupaq apanqaku, nispa.

⁸ Hinaptinmi Isaiasta rey Ezequías nirqa: Tayta Diospa nisqanqa allinpunim, ichaqa wañunaykamayá hawkalla hinaspa allinlla kawsasaq, nispa.