Isaías 35 - Chuya Qellqa 1992

Jerusalén llaqtaman kutimuqkunamanta

¹ Chunniqpi chaki allpapas llumpaytam kusikunqa, kusikuspam rosas hinaraq waytarinqa.

² Sumaqta waytaspam kusikunqa, kusikuymantam qaparinqa; kuyayllapaq kayninmantam hatunchasqa kanqa, Líbano montepas, Carmelo orqopas, Sarón pampapa hatunchasqa kasqanta hina; chaypim paykuna, Tayta Diospa atiyniyuq kayninta rikunqaku.

³ Wañunayaqkunatayá kallpanchaychik, pisipasqakunatayá kallpanchaychik.

⁴ Hukmanyasqa sonqoyuqkunatayá niychik: Kallpanchakuspa ama manchakuychikchu, Diosnikichikmi salvasunaykichikpaq kaypi kachkan, enemigoykichikkunatam imam ruwasqankuman hina castiganqa.

⁵ Chaymi ñawsakuna qawarikunqa, mana uyariqkunam uyarikunqa.

⁶ Wistukunam luwichu hinaraq pawaykachanqaku, mana rimaqkunam sumaqllataña qaparinqaku; yakukunam chunniqpi toqyanqa, chaki allpakunapim mayukuna kallpanqa.

⁷ Chaki allpam qochaman tikrakunqa, chaki allpamantam yakukuna toqyanqa. Atoqkunapa puñunanpipas, pastokunawan soqoskuna hinaspa totorakunañam wiñanqa.

⁸ Chaynintam hatun ñan rinqa, Diospaq sapaqchasqa ñanwanmi sutichanqaku. Huchasapakunaqa manam chaynintaqa purinqachu, mana yuyayniyuqkunaqa manam chaynintaqa purinqachu Diospuni paykunawan kasqanrayku.

⁹ Chaypiqa manañam leonkunapas kanqachu, tukuy rikchaq purun animalkunapas manañam purinqachu, chay ñannintaqa salvasqakunallañam hamunqaku.

¹⁰ Tayta Diospa librasqankunallam chay ñannintaqa kutimunqaku, kusikuy qapariyllawanñam Sión llaqtaman yaykunqaku, llakikuywan waqakuypas tukunqañam.