Hebreos 11 - Chuya Qellqa 1992

Iñiymanta

¹ Iñiyqa suyasqanchikta cheqaptapuni chaskinanchikpaq suyaymi chaynataq mana rikusqanchik kaqta cheqappaq hapiymi.

² Iñiyllankuwanmi ñawpaq taytanchikkunapas Diospa allinpaq hapisqan karqaku.

³ Iñiyllawanmi yachanchik kay pachatawan hinaspa tukuy ima kaqkunata rimariyllanwan Diospa unanchasqanta. Chaynaqa, kunan qawasqanchikkunaqa mana kaqmantam ruwasqa karqa.

⁴ Iñiyllawanmi Abelqa wawqen Cainmantapas aswan allinnin sacrificiota Diospaq kañarqa. Chayraykum Diosqa allin ruwaqpaq hapispa ofrendantapas chaskirqa, chaymi wañusqaña kachkaptinpas hinallaraq iñiyninmanta rimachkan.

⁵ Iñiyninraykullam Enocqa, mana wañuyta reqsinanpaq kawsachkaqlla hanaq pachaman Diospa pusasqan karqa, chaymi paytaqa manaña tarirqakuchu. Manaraq apasqa kachkaptinmi Diospa munasqanman hina kawsasqanmanta willakuqku.

⁶ Mana iñiyniyuq kaspaqa manam Diostaqa agradachwanchu. Pipas Diosman asuykunanpaqqa cheqap kasqantam creenan, creenantaqmi haykam maskaqninkunamanqa premianantapas.

⁷ Iñiyllawanmi Noeypas, hamuq punchawkunapi imakuna pasakunanmanta Dios willaykuptin, payta kasukuspan arcata ruwarqa ayllunkuna chaypi salvakunanpaq. Hina chay iñiyllanwantaqmi kay pachapi kaqkunatapas condenarqa hinaspa allin kawsakuytapas chaskirqa.

⁸ Iñiyllawanmi Abrahampas, Dios qayaykuptin kasukurqa, hinaspam llaqtanmanta lloqsirqa herencia chaskinan allpaman, chaymi lloqsirqa mana maymanpas rinanta yachastin.

⁹ Iñiyllawanmi Diospa prometesqan allpapipas runapa allpanpi mana llaqtayuq hina purirqa. Pay hinallataqmi Isaacwan Jacobpas maypim yachanankupaq promesata chaskirqaku.

¹⁰ Abrahamqa allin cimientasqa llaqtatam otaq allin wasi ruwaq Diospa ruwasqan llaqtatam suyarqa.

¹¹ Chay iñiyllawanmi Sarapas qolluq kachkaspan Diosmanta kallpata chaskispa wiksayakuruspan yuyaq kayninpiña wachakururqa. Iñirqam prometeqnin Diosqa confiakunapaq kasqanta.

¹² Chayraykum Abrahampa wañukunanpaq hina yuyaqña kachkaptinpas mirayninqa cielopi chaskakuna hinaña nacerqa hinaspa lamar qochapa patanpi aqo hinaña mana yupay atina kanankama.

¹³ Chayna iñiyllapim llapallan runakunaqa wañukurqaku Diospa promesanta manaraq chaskichkaspanku. Ichaqa iñiyninku kasqanraykum karullamanta qawaspanku kusikurqaku, chaynapim kay pachapiqa huklaw llaqtayuq hinaspa purikuqlla kasqankuta reqsikurqaku.

¹⁴ Kayna niqkunaqa, cheqaptam huk llaqta maskasqankuta qawachikuchkanku.

¹⁵ Sichum maymi lloqsimusqanku llaqtamanta yuyarispankuqa chay tiempokunallachá kutikunmanku karqa.

¹⁶ Paykunaqa hanaq pachapi kaq allin llaqtatam anchallataña munarqaku, chayraykum Diospas paykunapa Diosnin kayta mana penqakunchu, paykunapaqmi huk llaqtata ruwarqa.

¹⁷ Iñiyllawanmi Abrahamqa, pruebasqa kaspan churin Isaacta Diosman ofrecerqa. Promesakuna chaskiq Abrahammi sapallan piwi churinta Diosman ofrecerqa.

¹⁸ “Isaacllamantam miraynikiqa kanqa” nispa, Dios nichkaptinpas.

¹⁹ Abrahamqa yacharqam wañusqatapas Diosqa atiyninwan kawsarichiq kasqanta. Chayraykum Abrahamqa wañusqamanta kawsarimuqta hinaña churinta chaskiykurqa.

²⁰ Iñiyllawanmi Isaacpas, Jacobtawan Esauta hamuq punchawkunapi bendicionkunawan bendeciykurqa.

²¹ Iñiyllawanmi Jacobpas, wañukunan hichpaña kachkaptin Joseypa churinkunata sapakamata bendeciykurqa, hinaspam tawnanman hapipakuykuspan Diosta yupaycharqa.

²² Iñiyllawanmi Joseypas, wañukunanpaqña kachkaspan Israelpa miraynin runakuna Egipto nacionmanta lloqsinankumanta rimarirqa, kamachikurqataqmi tullunkunawan imam ruwanankutapas.

²³ Iñiyllawanmi Moisés naceruptinpas kuyayllapaq kasqanta qawaykuspanku kimsa killapuni tayta-mamankuna pakarurqaku. Manataqmi rey Faraonpa kamachikuynintapas manchakurqakuchu.

²⁴ Iñiyllawantaqmi Moisespas, yuyayniyuqña karuspan reypa churinpa wawanwan sutichasqa kayta mana munarqachu.

²⁵ Payqa Diospa llaqtanwan kuska ñakariytam akllakuykurqa, hucha vidapi kawsaspan ratollapaq kusikuykunapi kananmantaqa.

²⁶ Egipto runakunapa tukuy ima kapuqninkunamantapas astawanqa Cristorayku ñakarisqa kaytam qori-qollqeta hina akllakuykurqa, chaynataqa ruwarqa Diospa qokuyninta chaskiyta munaspanmi.

²⁷ Iñiyllawanmi Moisesqa, reypa piñakuynintapas mana manchakuspan Egiptomanta pasakurqa. Mana rikuy atina Diosta qawachkaq hinam kallpanchakurqa.

²⁸ Iñiyllawanmi Moisesqa, Pascua fiestatapas ruwarqa hinaspam yawartapas punkukunaman challarqa, piwi churikuna wañuchiq ángel Israelpa mirayninkunata mana wañuchinanpaq.

²⁹ Iñiyllawanmi Israelpa mirayninkunapas, Puka lamar qocha kicharikuykuptin chaki allpanta hina pasarqaku. Egipto runakunam ichaqa pasayta munaspanku yakupi heqeparurqaku.

³⁰ Iñiyllawanmi qanchis punchawtapuni Jericó llaqtata muyururqaku, hinaptinmi perqankuna tuñiykurqa.

³¹ Iñiyllawantaqmi Rahab sutiyuq chuchumika warmipas llaqta wateqaq riq runakunata allinllata samaykachirqa, chayraykum mana kasukuq runakunawan kuskaqa mana wañururqachu.

³² ¿Imatawanraqtaq niyman? Tiempopas manam haypawanmanchu, Gedeonmanta, Baracmanta, Sansonmanta, Jefteymanta, Davidmanta, Samuelmanta chaynataq profetakunamantapas rimaptiyqa.

³³ Paykunaqa iñiyllawanmi huklaw nacionkunata vencerqaku, mana pimanpas sayapakuspam kamachikurqaku, Diospa prometesqankunatam chaskirqaku, leonkunapa simintam wichqarurqaku,

³⁴ ninapipas manam ruparqakuchu, espadawan wañuchisqa kanankumantam lluptirqaku, mana kallpayuq kachkaspankupas kallpanchakurqakum, guerrapi peleaspankupas qarinchakuspankum huklaw llaqtayuq tropakunatapas qatikacharurqaku.

³⁵ Warmikunam wañusqamantaña kawsarichisqan ayllunkuta chaskiykurqaku. Wakinñataqmi kaspikunawan waqtapasqa karqaku, ichaqa librasqa kayta mana munaspankum wañurqaku, chaynapi aswan allin vidaman kawsarimunankupaq.

³⁶ Wakinkunatam burlakurqaku, azoterqaku, cadenarqaku hinaspam carcelman wichqarqaku. Chayna pruebakunatam chaskirqaku.

³⁷ Wakinñataqmi karqa rumikunawan choqapasqa, serruchowan kuchusqa hinaspa espadakunawan wañuchisqa. Wakinñataqmi ovejakunapa, cabrakunapa qaranwan churakuykuspanku kaypi chaypi purirqaku; wakinñataqmi wakchayachisqa, llakichisqa hinaspa ñakarichisqa karqaku.

³⁸ Kay pacham mana paykunapaq hinachu karqa, chayraykum chunniqkunapi, wayqokunapi, orqokunapi, machaykunapi hinaspa qaqa uchkukunapi purirqaku.

³⁹ Chay llapallan runakunapa iñiyninmantam allinta rimarqaku, ichaqa manam mayqanninkupas Diospa prometesqantaqa chaskirqakuchu.

⁴⁰ Diosmi ñoqanchikpaqpas allin kaqkunata waqaycharqa chaynapi paykunapas ñoqanchikwan kuska qespichisqa kanankupaq.