Génesis 45 - Chuya Qellqa 1992

Wawqenkunawan José reqsichikusqanmanta

¹ Joseymi llapallan serviqninkunapa qayllanpi waqayta manaña aguantaspan nirqa: ¡Qayllaymanta llapallaykichik lloqsiychik! nispan. Chaymi serviqninkuna lloqsiruptinku wawqenkunawan José reqsichikurqa,

² hinaspam qaparispa waqakurqa, chaytam Egipto runakunapas uyarirurqaku, Faraonpa wasinpi kaqkunapas yacharurqakum.

³ Wawqenkunatam José nirqa: Ñoqaqa Joseymi kani, ¿kawsachkanraqchu taytanchik? nispa. Wawqenkunañataqmi manchakuymanta mana ima niytapas atirqakuchu.

⁴ Chaymi wawqenkunata José nirqa: Asuykamuwaychik, nispa. Paykuna asuykuptinkum nirqa: Ñoqaqa Egipto nacionman rantikamusqaykichik wawqekichik Joseymi kani.

⁵ Ama llakikuychikchu nitaq ñakakuychikchu kayman rantikamuwasqaykichikmantaqa. Aswanqa achka runakunata kawsachinaypaqmi Dios puntachimuwarqa.

⁶ Iskay watañam kay allpapi muchuy karun, chaywanpas pichqa watatawanraqmi kanqa. Manam tarpuypas nitaq cosechapas kanqachu.

⁷ Diosmi puntachimuwarqa kay pachapi miraynikichikta chaynataq qamkunatapas llumpayta yanapaspay kawsachinaypaq.

⁸ Chaynaqa, manam qamkunachu kaymanqa kachamuwarqankichik, aswanqa Diosmi; paytaqmi Faraonpa umachaqninta churaruwan, chaynapi lliw wasinpipas, Egipto nacionpipas kamachikuq kanaypaq.

⁹ Chaynaqa, utqayman kutispa taytanchikta nimuychik: Churiki Joseymi kaynata nin: “Egipto nacionpi kamachikuq kanaypaqmi Dios churaykuwan, utqayman qawaykuwanaykipaq hamuy.

¹⁰ Gosén llaqtapim yachanki churikikunawan, willkaykikunawan, ovejaykikunawan, vacaykikunawan hinaspa lliw kapuqnikikunawanpas.

¹¹ Kaypim lliw aylluykikunamanwan mikuchisqayki, manam imaykichikpas pisinqachu. Pichqa wataraqtaqmi muchuyqa kanqa”, nispa.

¹² Wawqey Benjaminwan qamkunam testigo kankichik kaykuna rimasqaymanta.

¹³ Chaynaqa, willamuychik taytayman Egipto nacionpi kamachikuq kasqaymanta hinaspa tukuy qawasqaykichikmantapas. ¡Utqayman rispa taytayta kayman pusamuychik! nispa.

¹⁴ Chaynata niruspanmi wawqen Benjaminwan abrazanakuykuspa waqakurqaku.

¹⁵ Llapallan wawqenkunata muchaykuspam abrazaykuspa waqarqa. Chayraqmi wawqenkunaqa Joseywan rimanakurqaku.

¹⁶ Joseypa wawqenkuna hamurusqanku noticiata rey Faraonpa palacionman chayaruptinmi Faraonpas chaynataq kamachikuyninpi yanapaqninkunapas kusikurqaku.

¹⁷ Chaymi Joseyta Faraón nirqa: Wawqekikunata nimuy: “Uywaykichikman kawsayta cargakuspa Canaán lawman kutiychik,

¹⁸ hinaspa taytaykichiktawan llapa aylluykichikta pusamuychik. Egiptopi allinnin allpatam qosqaykichik, kay nacionpi allinnin kawsaykunatam mikunkichikpas.

¹⁹ Wawqekikunata kamachiy kay Egiptopi carretakunata apaspa churinkuta, warminkuta chaynataq taytaykichiktapas apamuspa hampukamunankupaq.

²⁰ Ama imankumantapas llakikuchunkuchu, kay Egipto nacionpi allinnin kaqkunam paykunapaq kanqa”, nispan.

²¹ Chaymi Israelpa churinkuna chaynata ruwarqaku. Joseymi carretakunata qoykurqa rey Faraonpa kamachisqanman hina, qoqawcharqataqmi kutistin mikunankupaqpas.

²² Llapanmanmi mudana pachatapas qoykurqa, Benjaminmanmi ichaqa kimsa pachak qollqetawan pichqa mudana fino pachata qoykurqa.

²³ Taytanmanñataqmi chunka asnopi Egipto nacionpa allinnin kaqkunata apachirqa, chunka china asnopiñataqmi kawsaykunata cargarqa, apachirqataqmi taytanpaq qoqawtapas hamustin ñanpi mikunanpaq.

²⁴ Wawqenkunata aviaspanmi José nirqa: Yanqañataq ñanpi piñanakuwaqchik, nispa.

²⁵ Chaymi Egipto nacionmanta lloqsispanku Canaán lawpi taytanku Jacobpa kasqanman chayarurqaku.

²⁶ Hinaspam willakurqaku: ¡Joseyqa kawsachkasqam! ¡Lliw Egipto nacionpi kamachikuqmi kasqa! nispanku. Hinaptinmi Jacobpa sonqon yaqa wañunankama tukukurqa, willasqankuta llullapaq hapisqanrayku.

²⁷ Chaymi Joseypa tukuy kunasqanta taytankuman willarqaku. Joseypa apachisqan carretakunata qawaykuspam Jacobqa cheqappaq hapispa kusikurqa.

²⁸ Hinaspam Israel nirqa: Kunanmi ichaqa cheqappaqña hapini, ¡churiy Joseyqa kawsasqamiki! Chaynaqa, rispay tupaykamusaq manaraq wañukuchkaspay, nispan.