Génesis 43 - Chuya Qellqa 1992

Benjaminta Egiptoman pusasqankumanta

¹ Muchuymi Canaán allpapi llumpayña karqa.

² Chaymi Egiptomanta kawsaykuna apamusqanku tukuruptin Jacob nirqa: Mikunanchikpaqyá huktawan kutispaykichik asllatapas kawsayta rantimuychik, nispa.

³ Hinaptinmi Judá nirqa: Chay runam chunkay-chunkayta nimuwarqaku: “Sullka wawqekichikta mana pusamuspaykichikqa amam rikurimuwankichikchu”, nispa.

⁴ Sichum wawqeyku ñoqaykuwan riptinqa kutisaqkum kawsaykuna rantiq.

⁵ Mana kachariptikiqa manam risaqkuchu. Chay runam nimuwarqaku “Sullka wawqekichikta mana pusamuspaykichikqa amam kutimuwankichikchu”, nispa.

⁶ Chaymi Israel nirqa: ¿Imanasqataq kay mana allinta ruwaruwankichik? ¿Imapaqtaq sullka wawqekichikmanta willakaramurqankichik? nispa.

⁷ Hinaptinmi paykuna nirqaku: Chay runam ayllunchikkunamanta tapupayawarqaku kaynata: “¿Taytaykichik kawsanraqchu? ¿Kanraqchu huk wawqekichikpas?” nispan. Chaymi tapuwasqankuman hina willakurqaniku. Ichasmi nirqanikuchu “wawqekichiktam pusamunkichik” niwanankutaqa, nispanku.

⁸ Chaymi taytan Israelta Judá nirqa: Qampas, ñoqaykupas chaynallataq churiykupas mana wañunanta munaspaqa, Benjaminta kachariy ñoqaykuwan rinanpaq.

⁹ Benjamintaqa ñoqam nanachikusaq, mana kutichimuptiyqa ñoqatam cuentata mañawanki, ñoqachiki wiñaypaq huchayuq kasaq.

¹⁰ Mana harkawaptikikuqa iskayta riruspapas ñam kutiramuymankuña karqa, nispa.

¹¹ Chaymi taytanku Israel nirqa: Chayna kaptinqa kaynatayá ruwaychik, chay runamanyá kay Canaán lawpi allinnin regalokunata apaychik: Aslla balsamota, mielta, miski asnaq perfumekunata, mirrata, nuezkunata hinaspa almendrasta.

¹² Apaychiktaqyá qollqetapas rantimunaykichikpaq, costalpi qollqe tarisqaykichiktapas kutichiychik, icha pantaspapas hinaramurqaku.

¹³ Wawqekichikta pusaspa chay runaman kutiychik.

¹⁴ Tukuy Atiyniyuq Diosyá chay runapa sonqonman qamkunapaq llakipayakuyta churaykuchun, chaynapi Simeontawan Benjaminta kacharimunanpaq. Churiykunata qechuruwaptinqa imanasaqtaq, mana churiyuqñachiki qepasaq, nispa.

¹⁵ Chaymi Jacobpa churinkuna, regalokunata, qollqetapas ñawpaq apasqankumanta huk chaynatawanraq aparikuspa kutirqaku. Pusarqakutaqmi wawqenku Benjamintapas, chaymi Egipto nacionman rispanku Joseyman chayarurqaku,

¹⁶ hinaptinmi Benjamintawan wawqenkunata José rikuykuspan wasinpi mayordomonta kaynata kamachirqa: Kay runakunata wasiyman pusaykuy hinaspa novillota nakaspa mikuyta ruwamuy, kay runakunam chawpi punchawta ñoqawan mikunqaku, nispa.

¹⁷ Chay mayordomom Joseypa kamachisqanman hina ruwaspan Joseypa wasinman chay runakunata pusaykurqa.

¹⁸ Hinaptinmi chay runakunaqa llumpayta mancharikurqaku, Joseypa wasinman pusasqa kasqankurayku hinaspam ninakurqaku: Punta hamuyninchikpi costalninchikpi qollqetachusmi tumpaykuwanchik, chaychusmi kaymanqa pusaykaramuwanchik, chaqnaruwaspanchik asnonchikkunatawan kuskata esclavontaña ruwawananchikpaq, nispanku.

^19-20 Chaymi Joseypa mayordomonman asuykuspanku wasipa punkunpi kaynata nirqaku: Señorlláy, puntatam kawsay rantiq hamurqaniku.

²¹ Kutisqaykupim tuta samana sitioman chayaruspayku costalniykuta kichaykurqaniku, hinaptinmi sapakamapa qollqeyku imam kaq pesoyuq kachkasqa, chaymi kutichimuchkaniku.

²² Apamuchkanikutaqmi huk chayna qollqetapas kawsay rantinaykupaq, ichaqa manam yachanikuchu costalniykuman pim chay qollqe churarusqantaqa, nispanku.

²³ Hinaptinmi chay mayordomo nirqa: Qamkunaqa hawkalla kaychik, ama manchakuychikchu, taytaykichikpa Diosninmi costalnikichikpi pakata hina qoykusurqankichik, qollqekichiktaqa imam kaqtam chaskirqani, nispa. Chaymantam Simeonta paykunaman hurqoramurqa,

²⁴ hinaspam llapankuta Joseypa wasinman pusaykurqa. Yakuta paykunaman qoykuptinmi chakinkuta mayllakurqaku, chaynallataqmi asnonkumanpas qaraykurqaku.

²⁵ Paykunañataqmi Joseywan chawpi punchawpi mikunankuta yachaspanku regalokunata allicharqaku.

²⁶ Wasiman José chayaramuptinmi, regalokuna apamusqankuta qospanku qayllanpi qonqoranpa kumuykurqaku.

²⁷ Chaymi José imaynam kasqankumanta kaynata tapurqa: “Yuyaqñam nisqaykichik taytaykichikqa” ¿imaynataq kachkan? ¿kawsachkanraqchu? nispa.

²⁸ Hinaptinmi paykuna nirqaku: Serviqniki taytaykuqa kawsachkanraqmi, allinllam kachkan, nispanku. Hinaspam qonqoranpa kumuykurqaku.

²⁹ Chaymantam taytanmantawan mamamanta wawqen Benjaminta qawarispan José tapurqa: ¿Paychu chay willawasqaykichik sullka wawqekichik kachkan? nispa. Hinaspam Benjaminta nirqa: Diosyá bendecisunki churilláy, nispa.

³⁰ Chaymi wawqenmanta waqanayay hapiruptin cuartonman yaykuruspan José waqakururqa.

³¹ Waqasqanmanta upallaykuspanmi uyanta yakuwan upakuruspa hawaman lloqsimuspan nirqa: Mikuyta qarakamuychik, nispa.

³² Joseypaqmi servirqaku sapaq mesapi, wawqenkunapaqñataqmi sapaq mesapi, sapaq mesapitaqmi paywan kuska mikuq Egipto runakunapaqpas. Egipto runakunaqa hebreo runakunawanqa manam kuskaqa mikuqkuchu, paykunapaqqa millakuypaqmi karqa.

³³ Joseymi wawqenkunata chimpanpi tiyachirqa, piwimanta qallaykuspa sullkakama, chaymi wawqenkuna admirasqallaña qawanakurqaku.

³⁴ Hinaspam mesanmanta paykunaman mikuyta haywarqa, Benjaminmanñataqmi wawqenkunapamantapas aswan achkata qaraykachirqa. Chaymi Joseyqa wawqenkunawan kuska kusisqallaña tomarqaku.