Génesis 42 - Chuya Qellqa 1992

Joseypa wawqenkuna kawsay rantiq risqankumanta

¹ Egipto nacionpi kawsay kasqanta yacharuspanmi churinkunata Jacob nirqa: ¿Imatataq qawanakuspaykichikqa ruwachkankichik?

² Uyarinim Egipto nacionpi kawsay kasqanta, rispayá rantimuychik, chaynapi yarqaymanta mana wañurunanchikpaq, nispa.

³ Chaymi Joseypa chunkantin wawqenkuna, Egipto nacionta rirqaku kawsay rantimunankupaq.

⁴ Ichaqa Jacobmi Joseypa wawqen Benjaminta mana kacharirqachu: “Yanqañataq imapas pasaramunman” nispa.

⁵ Israelpa churinkunam kawsay rantiq rirqaku sapaq runakunapiwan kuska. Canaán lawpipas llumpay muchuy kasqanrayku.

⁶ Egipto nacionpim José munaychakuq karqa, paymi llapa runakunaman kawsayta rantikuq. Joseypa wawqenkunam chayaruspanku paypa ñawpaqninpi pampakama kumuykurqaku.

⁷ Joseymi wawqenkunata qawaykuspan reqsirurqa, ichaqa mana reqsiq tukuspam piñasqallaña paykunata tapurqa: ¿Maymantataq hamuchkankichik? nispa. Paykunañataqmi nirqaku: Canaán lawmantam kawsaykuna rantiq hamuchkaniku, nispanku.

⁸ Wawqenkunata José reqsiruchkaptinpas, paykunam ichaqa mana reqsirqakuchu.

⁹ Chaymi José paykunamanta mosqokusqanta yuyariruspa nirqa: Wateqaqkunam kankichik, kay nacionqa arkachisqa otaq mana arkachisqa kasqanta qawaqmi hamurqankichik, nispa.

¹⁰ Paykunañataqmi nirqaku: Señorllayku, serviqnikikunaqa kawsay rantiqllam hamurqaniku.

¹¹ Lliwchaykum huk taytapa churillan kaniku, kay runallaykikunaqa cheqap rimaq runakunam kaniku manam wateqaqkunachu, nispanku.

¹² Joseyñataqmi nirqa: Cheqaptapunim qamkunaqa hamurqankichik, kay nacionta arkachisqa otaq mana arkachisqa kasqanta wateqaq, nispa.

¹³ Paykunañataqmi nirqaku: Kay runallaykikunaqa chunka iskayniyuq wawqekunam kaniku, Canaán lawpi huk taytapa churillan. Sullkaykum taytaykuwan qeparamun, hukninñataqmi chinkarun, nispanku.

¹⁴ Chaymi José nirqa: Nisqaypi hinapas qamkunaqa wateqaqmi kankichik.

¹⁵ Kunanmi pruebasqa kankichik: Faraonraykum jurani, sullka wawqekichik kayman mana hamuptinqa manam kaymanta lloqsinkichikchu.

¹⁶ Chaynaqa, hukkaqnikichikta kachaychik chaynapi wawqekichikta pusamunanpaq, wakiqnikichikñataq preso qepaychik, rimasqaykichik cheqap kasqanta yachanaypaq, mana chayqa Faraonraykum jurani, qamkunaqa wateqaqmi kankichik, nispa.

¹⁷ Hinaspam paykunata kimsa punchaw carcelpi wichqarurqa.

¹⁸ Kimsa punchawmantam paykunata José nirqa: Ñoqaqa Diostam kasukuni, kawsakuyta munaspaqa kaynata ruwaychik:

¹⁹ Cheqap rimaq qarikuna kaspaykichikqa huknin wawqekichikta carcelpi saqespa aylluykichik mikunanpaq kawsayta apaspa wasikichikman kutiychik.

²⁰ Ichaqa sullka wawqekichiktam pusamuwankichik, chaymi cheqap rimasqaykichik kanqa, mana chayna kaptinqa wañunkichikmi, nispa. Paykunañataqmi allinmi nispanku,

²¹ hukninkumanta hukninkukama ninakurqaku: Cheqaptapunim wawqenchikpa contranpi huchallikururqanchik. Ruegakuwachkaptinchikpas ñakariyninta qawachkaspam mana uyarirqanchikchu, chayraykum ñoqanchikman kay ñakariy chayaramuwanchik, nispanku.

²² Rubenñataqmi nirqa: Ñoqaqa nirqaykichikmi “Ama huchallikuychikchu warmapa contranpi” nispay, ichaqa manam kasuwarqankichikchu, kunanmi vidanmanta ñakarichkanchik, nispa.

²³ Paykunaqa manam yacharqakuchu rimasqankuta José entiendesqanta, paykunata José rimapayaptin rimayninkuman huk runa tikrasqanrayku.

²⁴ Chaymi paykunamanta rakikuykuspa José waqarqa. Sonqon tiyaruptinmi paykunaman kutispan huktawan rimapayaspa qawachkaptinku Simeonta chaqnachispa presocharurqa.

²⁵ Chaymantam runankunata José kamachirqa, wawqenkunapa costalninman trigota huntachinankupaq chaynataq sapakamapa qollqenkutapas costalninkuman kutiykachinankupaq hinaspa qoqawchanankupaq. Chaynatam paykunapaq ruwarqaku.

²⁶ Joseypa wawqenkunam kawsaykunata asnonkuman cargakuykuspa kutikurqaku.

²⁷ Samasqankupiñam asnonman mikuchinanpaq costalninta hukkaqnin kichaykuspan qollqenta tarirurqa.

²⁸ Chaymi wawqenkunata nirqa: Qollqeytam kutiykarachimuwasqa, costalniypim tariruni, nispa. Hinaptinmi mancharikuspanku ninakurqaku. ¿Imatataq Diosqa kaywan ruwawachkanchik? nispanku.

²⁹ Canaanman chayaruspankum taytanku Jacobman imaynam kamusqankuta willakuspa nirqaku:

³⁰ Egipto nacionpi kamachikuq runam nacionnin wateqaqpaq hapiwaspanku llumpay piñasqallaña rimapayawarqaku.

³¹ Chaymi ñoqayku nirqaniku: “Manam wateqaqkunachu kaniku, ñoqaykuqa cheqap rimaq qarikunam kaniku.

³² Huk taytapa churillanmi chunka iskayniyuq kaniku, hukniykum chinkarurqa, sullkaykuñataqmi taytaykuwan Canaán lawpi qeparamun”, nispayku.

³³ Hinaptinmi chay nacionpi kamachikuq niwarqaku: “Kaynapim reqsisqaykichik cheqap runakuna kasqaykichikta, huknin wawqekichikta ñoqawan saqeychik hinaspa aylluykichikman mikunankupaq kawsayta aparikuspa kutiychik,

³⁴ hinaspa sullka wawqekichikta pusamuwaychik, chaynapi mana wateqaqkuna chaynataq cheqap rimaq qarikuna kasqaykichikta yachanaypaq. Chayñam wawqekichikta kacharisaq, qamkunapas kay nacionpim negociota ruwakunkichik”, nispa.

³⁵ Chaynata niruspanku costalninkuta taqtaptinkum sapakamapa qollqe kipunku kachkasqa, chaymi qollqenkuta qawaykuspanku taytankupiwan mancharikururqaku.

³⁶ Hinaptinmi taytanku Jacob paykunata nirqa: ¿Manaña churiyuqtachu saqeruwankichik? Joseyqa manañam ñoqanchikwanñachu, nitaqmi Simeonpas kaypiñachu, Benjamintapas pusaruptikichikqa, tukuy kaykunawanqa llakimantachá wañurusaq, nispa.

³⁷ Chaymi taytanta Rubén nirqa: Ñoqam Benjamintaqa kutichimusaq, mana kutichimuptiyqa iskaynin churiykunatachiki wañurachinki, nispa.

³⁸ Jacobñataqmi nirqa: Qamkunawanqa manañam churiyqa rinmanchu, wawqen wañuruptinmi sapallanña qeparqa, chay risqaykichikpi imapas pasaruptinqa, qamkunapa hawaykichikpim llakimanta kay yuyaq taytaykichik wañurusaq, nispa.