Génesis 41 - Chuya Qellqa 1992

Rey Faraonpa mosqokusqanmanta

¹ Iskay wata pasaruptinmi rey Faraonñataq mosqokururqa: Nilo mayupa patanpim pay sayachkasqa,

² hinaptinmi sumaq qanchis wira vacakuna Nilo mayumanta lloqsimuchkasqa, totorallaña ukupi pastota mikustin.

³ Chay sumaq qanchis wira vacakunapa qepantañataqmi qanchis millakuypaq tullu vacakuna mayumanta lloqsimuchkasqa, hinaspam Nilo mayupa patanpi sumaq vacakunapa waqtanpi sayachkasqaku.

⁴ Chay millakuypaq tullu vacakunam, qanchis sumaq wira vacakunata mikukururqaku, chayllamanmi Faraón rikcharirurqa.

⁵ Ñataq puñuykuspanmi mosqoyninpi kayta rikurqa: Qanchis espigakunam chulla tullullamanta sumaqllaña lloqsimuchkasqa.

⁶ Chaynataqmi qanchis pusillanña espigakunapas sumaqllaña espigakunapa qepanta rupaq wayrapa chakichisqan lloqsimuchkasqa.

⁷ Hinaspam chay qanchis pusillanña espigakuna poqosqa allin grano espigakunata millpururqaku. Faraón rikchariruptinmi chayqa mosqoylla kasqa.

⁸ Chaymi Faraonqa paqarinnintin punchawta llumpay hukmanyasqallaña kaspa, Egipto nacionpi layqakunata chaynataq yachayniyuqkunata qayachirqa. Hinaspam mosqoyninta willakurqa, ichaqa manam mayqanninkupas mosqoyninpa imam ninantaqa willayta atirqakuchu.

⁹ Chaymi rey Faraonta vino serviqkunapa kamachiqnin nirqa: Kunanmi huchayta yuyariruni.

¹⁰ Reynilláy Faraón, qanmi piñakurqanki ñoqapa chaynataq panaderokuna kamachiqpa contranpi, hinaspam waqaychasuqniki soldadokunapa capitanninpa wasinpi carcelman apaykachiwarqankiku.

¹¹ Hinaptinmi ñoqapas chaynataq paypas chay tutalla mosqokururqaniku. Sapa mosqoypam huk willakuynin karqa.

¹² Chay carcelpim ñoqaykuwan kuska hebreo casta joven tarikurqa. Payqa waqaychasuqniki soldadokunapa capitanninpa serviqninmi karqa, payman willaptiykum mosqoyniykupa imam ninanta sapakamaman willaykuwarqaku.

¹³ Chaymi paypa imam niwasqankuman hina cumplikurqa. Ñoqam llamkanayman kutiykamurqani, hukniytañataqmi warkurachirqanki, nispa.

¹⁴ Hinaptinmi Joseyta Faraón qayachispa utqayllaman carcelmanta hurqochimurqa. Chukchanta rutuspam pachantapas mudaykachispa rey Faraonman pusamurqaku.

¹⁵ Faraonmi Joseyta nirqa: Mosqoyniypa imam ninantam mana pipas willawayta atinchu, ichaqa uyarirqanim mosqoykunata uyariykuspalla imam ninanta willakuq kasqaykita nispa.

¹⁶ Joseyñataqmi Faraonta nirqa: Chayqa manam ñoqallamantachu, aswanqa Diosmi allinnikipaq willasunki, nispa.

¹⁷ Chaymi Joseyta rey Faraón nirqa: Mosqoyniypim Nilo mayu patanpi sayachkasqani.

¹⁸ Hinaptinmi Nilo mayumanta qanchis sumaq wira vacakuna lloqsimuchkasqa, hinaspam totorallaña ukupi pastota mikurqaku.

¹⁹ Chay vacakunapa qepantañataqmi, qanchis millakuypaq tullu vacakuna lloqsimuchkasqa. Kay Egipto nacionpiqa manam chayna millakuypaq tullu vacakunataqa rikurqanichu.

²⁰ Chay millakuypaq tullu vacakunam punta kaq qanchis wira vacakunata mikukururqaku.

²¹ Hinaspam mikuruspankupas mana mikusqa hinalla karqaku, punta kasqankupi hina tullulla, chayllamanmi rikcharirurqani.

²² Huktawan mosqokuspaymi rikurqani chullalla tullumanta qanchis espigakuna sumaqllaña lloqsimuqta.

²³ Chaynataqmi rupaq wayrapa chakichisqan qanchis pusillanña espigakunapas sumaqllaña espigakunapa qepanta lloqsimuchkasqa.

²⁴ Chaymi pusillanña espigakuna qanchis sumaq espigakunata millpururqaku. Chaykunatam willarqani layqakunaman, ichaqa manam mayqanninkupas ima ninanmi kasqantapas willawayta atirqakuchu, nispa.

²⁵ Chaymi rey Faraonta José nirqa: Mosqoynikikunaqa hukllam, Diosmi imam ruwananta qawachisuchkanki.

²⁶ Qanchis sumaq vacakunawan qanchis sumaq espigakunaqa qanchis watallam. Mosqoynikiqa chullallam.

²⁷ Chaykunapa qepanta wicharimuq millakuypaq tullu vacakunawan rupaq wayrapa chakichisqan qanchis pusillanña espigakunapas qanchis watakunallataqmi. Chay mosqoynikipa imam ninanqa qanchis wata muchuymi.

²⁸ Diosmi imam ruwananta qawachisuchkanki kay willasqayman hina:

²⁹ Qanchis watam Egipto nacionpi sumaqllaña kawsay qespinqa.

³⁰ Chaykunapa qepantañataqmi Egipto nacionpi qanchis wata muchuy kanqa. Hatun cosechakunatapas manañam yuyanqakuñachu, chay muchuymi kay nacionta wakchayachinqa.

³¹ Ñawpaq sumaqllaña cosechakunatapas manañam rikunqakuñachu, llumpay muchuy kasqanrayku.

³² Diosmi chaynatapuni utqayman ruwanqa, chaypaqmi iskay kutikama mosqorqanki.

³³ Chaynaqa, kunanpuni maskay allin yuyayniyuq chaynataq yachayniyuq runata hinaspa churay Egipto nacionpi kamachikunanpaq.

³⁴ Kaytawan ruway: Sapa llaqtapi kamachikuqkunata churay, chaynapi Egipto nacionpi qanchisnintin wata sumaqllaña cosechakunamanta, pichqa costalmanta hukninta huñuspa waqaychanankupaq.

³⁵ Chaynaqa, kay hamuq allin watakunapiyá qampa qawasqaykita llapallan kawsayta huñuchunku. Llapa trigokunatayá sapa llaqtapi taqechunku, muchuy tiempopi runakuna mikunankupaq.

³⁶ Hinaptinmi Egipto nacionpaq chay kawsaykuna waqaychasqa kanqa, chaynapi qanchis wata muchuypi runakuna yarqaymanta mana wañurunankupaq, nispa.

Egiptopi José kamachikusqanmanta

³⁷ Faraonpaqwan yanapaqninkunapaqmi Joseypa nisqankuna allinpaq rikchakapurqa.

³⁸ Hinaptinmi runankunata Faraón nirqa: José hina Diospa espiritunwan kaq runataqa manam maypipas tarichwanchu, nispa.

³⁹ Chaymi Joseyta Faraón nirqa: Diosllam tukuy kaytaqa willasurqanki, qam hina yuyayniyuq hinaspa yachayniyuq runaqa manam pipas kanchu.

⁴⁰ Qanmi kay palacioypi kamachikunki, lliw runaykunam kamachisqaykita kasusunki. Ñoqallañam rey kasqayrayku qanmanta masqa kasaq, nispa.

⁴¹ Faraonqa nirqataqmi: Kunanmi Egipto nacionpi kamachikunaykipaq churayki, nispa.

⁴² Hinaspanmi makinmanta sellanan anillota hurqoykuspa Joseyman churaykurqa, fino linomanta pachawan pachaykachispam kunkanmanpas qorimanta collarta churaykurqa.

⁴³ Hinaspam Joseytaqa allinnin carretapi muyuchimurqa, puntan riqkunañataqmi qaparirqaku: “¡Pay pasananpaq ñanmanta asuriychik!” nispanku. Chaynatam José Egipto nacionpi kamachikuqpaq churasqa karqa.

⁴⁴ Faraonqa nirqataqmi: Ñoqa rey kachkaptiypas Egipto nacionpi runakunaqa qam kamachiptillaykim tukuy imatapas ruwanqaku, nispa.

⁴⁵ Joseytam Faraón suticharqa “Zafnat-panea” nispan. Casarachirqañataqmi On llaqtapi sacerdote Potiferapa warmi churin Asenatwan, chaynapim Joseyqa Egipto nacionpi allin reqsisqa karqa.

⁴⁶ Joseyqa kimsa chunka watayuqmi karqa, Egiptopi rey Faraonpa qayllanman pusaptinkuqa. Joseymi rey Faraonpa palacionmanta lloqsirqa lliw Egipto nacionpi purimunanpaq.

⁴⁷ Qanchis watam chakrakunapi cosecha alli-allinta qespirqa.

⁴⁸ Chaymi Joseyqa, lliw Egipto allpapi wiñaq kawsaykunamanta qanchisnintin wata huñurqa. Muyuriqnin chakrakunamanta huñuspam sapa llaqtapi waqaycharqa.

⁴⁹ Joseymi trigota huñururqa lamar qochapi aqota hinaña, manaña yupaypas atinankama.

⁵⁰ Manaraq muchuy chayamuchkaptinmi, Joseypa churinkuna iskayña karqa, paykunatam warmin Asenat wachakurqa. Asenatqa On llaqtapi sacerdote Potiferapa churinmi karqa.

⁵¹ Joseymi piwi kaq churinta Manaseswan suticharqa: “Diosmi tukuy llakiyta qonqaykachiwan chaynataq aylluykunatapas” nispa.

⁵² Huknin churintañataqmi Efrainwan suticharqa: “Diosmi ñakarisqay nacionpi miraykachiwan” nispa.

⁵³ Egipto nacionpi kawsaykunapa sumaqllaña qespinan qanchis watakunam pasarurqa.

⁵⁴ Hinaptinmi Joseypa nisqanman hina qanchis wata muchuy qallaykurqa, chay muchuyqa llapallan nacionkunapim karqa. Egipto nacionpim ichaqa mikuy karqa, trigota huñusqankurayku.

⁵⁵ Chaymantam Egipto nacionpipas muchuy qallaykurqa. Hinaptinmi llapa runakuna rey Faraonta mikuyta mañakurqaku. Chaymi Faraonñataq nirqa: Joseyman rispa imam nisusqaykichikta ruwamuychik, nispa.

⁵⁶ Egipto nacionpi llumpayta muchuy miraruptinmi, José kicharqa taqekunapa kasqan wasikunata, trigota runakunaman rantikunanpaq, Egipto nacionpi aswan-aswan muchuy kasqanrayku.

⁵⁷ Llapallan nacionkunapi llumpay muchuy kaptinmi, huklaw llaqtakunamantapas Egipto nacionman riqku, kawsaykunata Joseymanta rantimunankupaq.