Génesis 23 - Chuya Qellqa 1992

Sara wañukuptin pampasqankumanta

¹ Saram kawsarqa pachak iskay chunka qanchisniyuq watankama

² Payqa Quiriat-arba llaqtapim wañukurqa, chay llaqtapa huknin sutinmi Hebrón. Hebronqa tarikun Canaán allpapim. Sara wañukuptinmi Abraham llumpayta waqarqa.

³ Chaymi warminpa ayanta saqeykuspan Het ayllukunawan rimaq rirqa,

⁴ hinaspam nirqa: Ñoqaqa huklaw llaqtayuqmi qamkuna ukupi yachani. Chaynaqa, warmiy pampanaypaqyá allpata rantikuwaychik, nispa.

⁵ Chaymi Hetpa mirayninkuna nirqaku:

⁶ Taytayku uyariykuwayku: Qamqa Diospa akllasqan runam ñoqayku ukupi kanki, ayaykitaqa allinnin sepulturapiyá pampaykuy, manam mayqanniykupas michakusqaykikuchu, nispanku.

⁷ Chaymi Abraham hatariykuspa Het ayllukunapa qayllanpi kumuykuspan

⁸ nirqa: Sichum warmiypa ayan pampanayta munaspaykichikqa uyariykuwaspayá Zoharpa churin Efronta rimapayaykaysiwaychik,

⁹ allpanpi kaq Macpela sutiyuq machayta rantikuruwananpaq. Preciontam pagapusaq chaynapi qamkuna ukupi pampakunayku allpa kananpaq, nispa.

¹⁰ Efronpas chaypim tarikurqa Het runakunawan kuska. Chaymi llaqtapa punkunta llapallan yaykuqkuna uyarichkaptinku chaynataq Hetpa mirayninkunapa qayllanpi Abrahamta nirqa:

¹¹ Taytalláy, kayqaya allpapas machaypas makikipi, llaqtamasiykunapa qayllanpim mana qollqellapaq qoyki, chaypiyá wañukuqnikita pamparamuy, nispa.

¹² Hinaptinmi Abrahamqa chay Het ayllukunapa ñawpaqninpi huktawan kumuykuspan

¹³ Efronta nirqa: Ama hina kaspayá uyariykuway: Chay allpapa preciontayá chaskiykuway, chaynapi warmiypa ayanta chaypi pampamunaypaq, nispa.

¹⁴ Chaymi Abrahamta Efrón nirqa:

¹⁵ Taytalláy uyariykuway: Chay allpaqa cuestan tawa kilo parten qollqem, ¿ñoqanchikpiqa mayna achkamá chayqa? Chaypiyá warmikipa ayanta pampamuy, nispa.

¹⁶ Hinaptinmi Efronpa nisqanta Abraham uyarispan, Het ayllukunapa qayllanpi tawa kilo parten qollqeta pagarqa, negociantekunapa paganan preciota.

¹⁷ Chaynapim Mamrepa chimpan Macpela lawpi Efronpa allpan, chaypi machaypas chaynataq sachankunapas

¹⁸ Abrahampaña karqa. Chaytaqa rikurqakum Het runakunapas chaynataq llaqtapa punkun yaykuqkunapas.

¹⁹ Chayta ruwaruspanmi, warmin Sarapa ayanta Abraham pamparqa, Mamrepa chimpan Macpela machaypi. Mamre llaqtapa huknin sutinmi karqa Hebrón. Chayqa kachkan Canaán allpapim.

²⁰ Chaynapim Het ayllukunamanta rantisqan allpawan machaypas pampakunankupaq Abrahampaña karqa.