Génesis 18 - Chuya Qellqa 1992

Abrahamman Diospa prometesqanmanta

¹ Mamre lawpi encina sachankunapa kasqanpi, sinchita rupamuptin carpapa punkunpi Abraham tiyachkaptinmi Tayta Dios payman rikuriykurqa.

² Abrahammi qawarispan rikururqa kimsa runakuna sayachkaqta, chaymi chaskinanpaq utqayllamanña kallpaspan, ñawpaqninkupi pampakama kumuykuspan

³ nirqa: Señorlláy, kuyapayariwaspaykiqa amayá chayllaqa pasakuychu.

⁴ Yakuta aparachimuptiyá chakikichikta mayllakuykuspa kay sachapa llantunpi samariychik.

⁵ Mikuytapas aparamusaqyá mikuykuspa kallpata hapinaykichikpaq, chayñayá pasakunkichik, chayraykuchá kay serviqnikichikpa kasqayman chayaykamurqankichik, nispa. Hinaptinmi paykuna nirqaku: Nisqaykiman hinayá ruway nispanku.

⁶ Chaymi Abrahamqa Sarapa kasqan carpaman kallparqa, hinaspam Sarata nirqa: Utqayman iskay chunka kilo harinata chapuy hinaspa tantata ruway, nispa.

⁷ Chaymantam Abrahamqa vacakunapa kasqanman kallpaspan huknin allin wira malta torota hapispan criadonman qoykuptin payñataq nakaruspan mikuyta chaylla yanuramurqa.

⁸ Chaymantam Abrahamqa chay mikuyta chaynallataq quesillotawan lecheta apamuspan paykunaman qoykurqa, hinaspanmi sachapa llantunpi paykuna mikunankukama ladonkupi sayarqa.

⁹ Paykunañataqmi Abrahamta tapurqaku: ¿Maypitaq warmiki Sara kachkan? nispanku. Abrahamñataqmi nirqa: Wak carpapim kachkan, nispa.

¹⁰ Hinaptinmi huknin nirqa: Wataman kunan hinatam huktawan watukamusqayki, chaypaqqa warmiki Sarapas wawayuqñam kanqa, nispa. Sarañataqmi Abrahampa qepanpi kaq carpapa punkunpi sayaykuspa uyarimuchkarqa.

¹¹ Abrahamwan Saraqa llumpay yuyaqñam karqaku. Sarapaqa manañam killanpas hamurqañachu.

¹² Chaymi Saraqa sonqollanpi asikuspan nirqa: ¿Qosaypas chaynataq ñoqapas yuyaqña kachkaspaykuchum wawayuqraq kaspa kusisqa kaymanku? nispa.

¹³ Chaymi Abrahamta Tayta Dios nirqa: ¿Imanasqataq Saraqa asikun “Imaynataq yuyaqña kachkaspay wachakuymanraq” nispaqa?

¹⁴ ¿Kanmanchu Diospaq imapas mana ruway atinan? Wataman kunan hinatam huktawan watukamusqayki, chaypaqqa Sarapas wawayuqñam kanqa, nispa.

¹⁵ Chayta niykuptinmi Sara mancharikurqa hinaspam llullakuspan nirqa: Manam asikurqanichu, nispa. Diosñataqmi nirqa: Cheqaptapunim asikurqanki, nispa.

Sodoma llaqtapaq Abraham mañakusqanmanta

¹⁶ Chaymantam chay runakunaqa Sodoma lawman rirqaku. Abrahampas paykunawanmi lloqsirqa aviamunanpaq.

¹⁷ Chaymi Tayta Dios yuyaymanarirqa: Abrahammanqa manam ima ruwanaytapas pakaymanchu.

¹⁸ Abrahampa mirayninkunaqa ancha hatun nacionmi kanqa, payraykum llapallan nacionkunata bendecisaq.

¹⁹ Abrahamtaqa akllarqani churinkunata hinaspa wakiqnin mirayninkunatapas kamachinanpaqmi, chaynapi munasqayman hina allin kaqkunata ruwaptinku prometesqaykuna cumplinaypaq, nispa.

²⁰ Chaymi Abrahamta Tayta Dios nirqa: Sodoma llaqtapi Gomorra llaqtapi runakunapa huchankum paqway millakuypaqña rikurirun.

²¹ Chaynaqa, rispay qawaramusaq, niwasqankupi hinachus ruwayninku kachkan icha manachus, chaynapim yachamusaq, nispa.

²² Hinaptinmi chay visitakunamanta iskay runakuna rakikuykuspanku Sodoma lawman pasarqaku, Abrahamñataqmi Tayta Dioswan qeparurqa.

²³ Chaymi Abrahamqa Diosman asuykuspa tapurqa: ¿Allin ruwaq runakunatapas mana allin runakunatawan kuskatachu puchukarachinki?

²⁴ Pichqa chunkalla allin ruwaq runakuna wak llaqtakunapi kaptinpas ¿puchukarachiwaqchu? ¿Manachu chay pichqa chunka allin ruwaqkunarayku pampachaykuwaq?

²⁵ Tukuy kay pachapa Juezninmi qamqa kanki, chaynaqa ¿Manachum allin kaqta ruwawaq? amayá allin ruwaqta mana allin ruwaqtawan kuskataqa puchukarachiychu, nispa.

²⁶ Chaymi Tayta Dios nirqa: Sichu pichqa chunka allin ruwaq runakunata Sodoma llaqtapi tarispayqa paykunaraykum chay llaqtata pampachasaq, nispa.

²⁷ Hinaptinmi Abraham nirqa: Señornilláy, mana imapaq valeq ñutu allpa chaynataq uchpa hina kachkaspaypas mañakullaykim.

²⁸ Sichum pichqa chunkapaq faltanman pichqa, hinaptinqa ¿Puchukarachiwaqchu pichqa faltasqanrayku? nispa. Tayta Diosñataqmi nirqa: Tawa chunka pichqayuqllataña tarispaypas manam puchukachisaqchu, nispa.

²⁹ Yapamanta rimapayaspanmi Abraham nirqa: Ichapas tawa chunkalla kachkanku, nispa. Hinaptinmi Dios nirqa: Tawa chunkallataña tarispaypas manam puchukachisaqchu, nispa.

³⁰ Huktawanmi Abraham nirqa: Señornilláy ama piñakuychu huktawanyá rimapayaykusqayki. Ichapas kimsa chunkalla kachkanku, nispa. Tayta Diosñataqmi nirqa: Kimsa chunkallataña tarispaypas manam puchukachisaqchu, nispa.

³¹ Hikutaspanmi Abraham nirqa: Diosnilláy, rimapayachkaspayqa niykullasqaykiyá. Ichapas iskay chunkalla kachkanku, nispa. Chaymi Señorñataq nirqa: Iskay chunkallataña tarispaypas manam puchukachisaqchu, nispa.

³² Kasqallanmi ruegakuspan Abraham nirqa: Señornilláy, amayá piñakuykuychu, kunanllañayá rimapayaykusqayki. Ichapas chaypiqa chunkalla kachkanku, nispa. Hinaptinmi Dios nirqa: Chunkallataña tarispaypas manam puchukachisaqchu, nispa.

³³ Chaymantam Abrahamwan rimayta tukuruspan Tayta Dios pasakurqa, Abrahamñataqmi maymi kasqanman kutikurqa.