Génesis 17 - Chuya Qellqa 1992

Pacto ruwasqan señalmanta

¹ Abramqa isqon chunka isqonniyuq watanpi kachkaptinmi Tayta Dios rikuriykuspan nirqa: Ñoqam kani Tukuy Atiyniyuq Tayta Dios, munasqayman hinayá kawsay.

² Qanwanmi pactota ruwasaq hinaspam nana-nanaqta mirachisqayki, nispa.

³ Chaymi Abramqa qonqoraykuspa pampakama kumuykurqa, hinaptinmi Dios kaynata nirqa:

⁴ Kaynam qanwan pacto ruwasqayqa kanqa: Qanmantam achka nacionkuna lloqsinqa.

⁵ Chaynaqa, manañam Abramñachu sutikiqa kanqa, aswanqa Abrahamñam, nana-nanaq runakunapa taytanñam qamqa kanki.

⁶ Anchallataña mirachiptiymi qanmanta hatarinqa reykuna chaynallataq nacionkunapas.

⁷ Pactotam qanwan ruwani chaynataq miraynikikunawanpas, qampa chaynallataq miraynikikunapaqpas wiña-wiñaypaq Diosnikichik kanaypaq.

⁸ Kay yachasqayki Canaán llapallan allpatam qanman, chaynallataq miraynikikunamanpas wiñaypaq qosqayki, hinaspam Diosnikichik kasaq, nispa.

⁹ Abrahamtam huktawan Dios nirqa: Kay pactotam kasukunki, qampas chaynallataq miraynikikunapas.

¹⁰ Kaymi kay pactoy, kaytam ruwayman churankichik qampas chaynallataq miraynikikunapas: Qamkunamanta kaq llapallan qarikunam qari kayninpi señalasqa kanqaku.

¹¹ Señalankichikqa qari kayninpa qarachanta kuchuspam, chaymi qamkunawan pacto ruwasqaypa señalnin kanqa.

¹² Kunanmantam qamkuna ukupi naceq lliw qari wawakuna pusaq punchawninpi qari kayninpi señalasqa kanqaku, señalasqam kanqa wasikipi naceqkunapas, mana miraynikimanta kaqkunapas, huklawmanta hamuspa qamkunawan yachaqkunapas chaynallataq qollqewan rantisqaykikunapas,

¹³ lliwmi señalasqa kanqaku. Chaynapim pacto ruwasqayqa cuerpoykichikpi wiñaypaq señal kanqa.

¹⁴ Ima qaripas mana señalasqa kaspanqa qamkunamantam qarqosqa kanqa, pactoyta mana kasukusqanrayku, nispa.

¹⁵ Abrahamtam huktawan Dios nirqa: Kunanmantaqa warmikipa sutinpas manañam Saraiñachu kanqa, aswanqa Sarañam.

¹⁶ Payta bendeciptiymi churikita wachakunqa, chaymi nacionkunapa maman kanqa, paymanta nacemuqkunam nacionkunapa reyninkuna hatarinqa, nispa.

¹⁷ Chaymi Abraham pampakama kumuykuspan asikurqa, hinaspanmi sonqonpi nirqa: ¿Pachak watayuq runapas yaqaraqchum churiyuq kanman? ¿Sarapas isqon chunka watayuqchum wachakunmanraq? nispa.

¹⁸ Hinaspanmi Diosta Abraham nirqa: Ima allinchá kanman qampa qayllaykipi Ismaelpa kawsakuyninqa, nispa.

¹⁹ Diosñataqmi nirqa: Cheqaptapunim warmiki Sara qampa churikita wachakunqa, hinaptinmi Isaacwan sutichanki, paywanmi wiñaypaq pactota ruwasaq, chaynallataqmi mirayninkunawanpas.

²⁰ Ismaelpaq mañakuwasqaykitapas uyarikim, paytapas bendecispaymi sinchillataña mirachisaq. Paypa mirayninkunamantam chunka iskayniyuq kamachikuqkuna hatarinqa, paymantam huk hatun nacionta hatarichisaq.

²¹ Pactoytam ichaqa Isaacwan sapinchasaq. Paytam wataman kunan hinata warmiki Sara wachakunqa, nispa.

²² Diosmi Abrahamwan rimayta tukuruspan pasakurqa.

²³ Chaynapim Abrahamqa chay punchawpi señalarqa churin Ismaelta, wasinpi naceqkunata chaynallataq qollqenwan rantisqan esclavonkunatapas. Diospa nisqanman hinam qari kayninkupa qarachanta kuchuspan señalarqa.

²⁴ Abrahamqa isqon chunka isqonniyuq watanpiñam karqa qari kayninpa qarachanta kuchuptinkuqa.

²⁵ Churin Ismaelñataqmi chunka kimsayuq watanpi karqa.

²⁶ Hina chay punchawllapim Abrahampas chaynataq churin Ismaelpas qari kayninkupi señalasqa karqaku.

²⁷ Paywan kuskataqmi wasinpi llapallan qarikunapas señalasqa karqaku, chaypi naceq esclavonkunapas chaynallataq huklawmanta qollqewan rantimusqankunapas.