Génesis 14 - Chuya Qellqa 1992

Lotta Abram librasqanmanta

¹ Chay punchawkunapim Sinarpa reynin Amrafel, Elasarpa reynin Arioc, Elampa reynin Quedorlaomer chaynallataq Goimpa reynin Tidal guerrata hatarichirqaku

² Sodomapa reynin Berapa, Gomorrapa reynin Birsapa, Admapa reynin Sinabpa, Zeboimpa reynin Semeberpa hinaspa rey Belapa contranpi (Belapa huknin sutinmi karqa Zoar).

³ Chay pichqantin reykunam Sidim qechwapi, Puchqo lamar qochapa kasqanpi huñunakururqaku.

⁴ Kay reykunam chunka iskayniyuq wata rey Quedorlaomerta servirqaku, ichaqa chunka kimsayuq wataman richkaspankum contranpi hatarirurqaku.

⁵ Chaymi qatiqnin watapiñataq rey Quedorlaomer hamurqa paywan huklla kaq reykunapiwan, hinaspam Astarot Karnaim llaqtapi Refaim runakunata vencerurqaku, Zuz runakunatañataqmi Ham llaqtapi vencerurqaku, Em runakunatañataqmi Save-quiriataim llaqtapi vencerurqaku.

⁶ Hor runakunatañataqmi Seir llaqtapa orqonkunapi vencerurqaku, hinaspam chunniqpa hichpanpi tarikuq El-parán nisqanku pampakamaraq qatirqaku.

⁷ Chaymanta kutiramuspankum chayarurqaku En-mispat llaqtakama (chaypa huknin sutinmi Cades) hinaspankum Amalec runakunapa allpanta hapikuykurqaku chaynallataq Hazezon-tamar llaqtapi yachaq Amor casta runakunapa allpantapas.

⁸ Hinaptinmi Sodomapa reynin, Gomorrapa reynin, Admapa reynin, Zeboimpa reynin hinaspa Belapa otaq Zoarpa reynin lloqsispanku Sidim qechwapi pelearqaku

⁹ Elampa reynin Quedorlaomerwan, Goimpa reynin Tidalwan, Sinarpa reynin Amrafelwan hinaspa Elasarpa reynin Ariocwan. Kay tawa reykunam pichqa reykunawan pelearqaku.

¹⁰ Sidim qechwaqa brea qochakunawan huntam tarikurqa, chaymi Sodomapa reyninwan Gomorrapa reynin lluptichkaspanku chayman wichiykurqaku, wakiqninñataqmi orqokunaman lluptirqaku.

¹¹ Chaymi venceruq reykunañataq Sodomapa Gomorrapa tukuy ima kapuqninta apakuspa pasakurqaku.

¹² Abrampa sobrinon Lottapas Sodomapi yachachkaqta hapiruspankum tukuy ima kapuqnintawan kuskata presota aparurqaku.

¹³ Hinaptinmi huk lluptiruq runañataq hebreo casta Abramman willaykamurqa, Amor casta Mamrepa encina sachankunapa kasqanpi yachachkaptin. Mamreqa karqa Escolpa chaynataq Anerpa wawqenmi. Paykunam Abramwan huklla karqaku.

¹⁴ Maypacham Abram sobrinon Lot preso kasqanta yachaykuspanmi, wasinpi naceq serviqninkunamanta kimsa pachak chunka pusaqniyuqta pusarikuspan chay reykunata Dan llaqtakama qatirqa.

¹⁵ Tutaykuruptinmi serviqninkunata rakinaruspan kayninta chayninta yaykuspa vencerurqaku, hinaspankum Damasco llaqtapa hanaynin Hoba lawkama qatirqaku.

¹⁶ Tukuy ima apasqankuta qechumuspanmi kutichimurqa, sobrinon Lotta kapuqninkunatawan, warmikunatawan wakin runakunatapas.

Abramta Melquisedec bendecisqanmanta

¹⁷ Quedorlaomerta chaynallataq paywan kaq reykunata venceruspa Abram kutimuptinmi Sodomapa reynin tariparqa Save qechwaman, chay qechwapa huknin sutinmi karqa reypa qechwan.

¹⁸ Salempa reynin Melquisedecpas vinotawan mikuytam apamurqa. Payqa Tukuy Atiyniyuq Diospa sacerdotenmi karqa.

¹⁹ Paymi Abramta bendecispan nirqa: Abram, kay pacha hanaq pacha unanchaq Diosyá bendecisunki.

²⁰ Tukuy Atiyniyuq Dios yupaychasqa kachun, paymi enemigoykikunata vencechisurqanki, nispa. Chaymi Abramqa lliw kutichimusqanmanta diezmonkunata qoykurqa.

²¹ Abramtam Sodomapa reynin nirqa: Runakunallata qoykuwaspayki wakin qechumusqayki kaqkunataqa apakuy, nispa.

²² Hinaptinmi Abram nirqa: Kay pacha hanaq pacha unanchaq Tukuy Atiyniyuq Tayta Diosrayku juraspaymi nirqani:

²³ Manam qampa kaqtaqa ni huk qaytullantapas nitaq usutaykipa watullantapas hapisaqchu, nispay. Yanqañataqmi niwaq: “Ñoqam Abramtaqa apuyarachirqani”, nispayki.

²⁴ Runaykunapa mikusqanmanta huktaqa manam imatapas munanichu. Ichaqa riqmasiy Aner, Mamre hinaspa Escol tupaqninkuta apakuchunku, nispa.