Génesis 13 - Chuya Qellqa 1992

Abrammanta Lot rakikusqanmanta

¹ Abrammi warmintin llapa imanta aparikuspan Egiptomanta Neguev lawman kutimurqa, paywantaqmi sobrinon Lotpas kutimurqa.

² Abramqa apu runam karqa, animalninkunapas, qorinpas, qollqenpas achkallañam kapurqa.

³ Neguev lawmantam allimanta kutirqa ñawpaq yachasqan Bet-elkama. Chay sitioqa tarikurqa Bet-elmanta Haiman rinapim.

⁴ Chaypim ñawpaqta altar ruwasqanpi Tayta Diosta yupaycharqa.

⁵ Abrampa sobrinon Lotpapas karqam ovejankuna, vacankuna chaynataq carpankunapas.

⁶ Chaymi huk hawaqllapi kuska yachanankupaq allpa manaña hayparqachu animalninku achka-achka kasqanrayku.

⁷ Chaynapim Abrampa michiqninkuna Lotpa michiqninkunawan piñanakuqku. Chaypitaqmi cananeokunapas, ferezeokunapas yacharqaku.

⁸ Hinaptinmi Lotta Abram nirqa: Ñoqanchikpiqa amayá piñanakuyqa kachunchu, nitaq michiqninchikkunapipas, ñoqanchikqa aylluntinmi kanchik.

⁹ Kayqaya allpaqa ñawpaqnikipi. Mañakuykim ñoqamanta rakikunaykipaq. Ichoq lawman riptikiqa alleq lawmanmi risaq, alleq lawman riptikiñataqmi ichoq lawman risaq, nispa.

¹⁰ Hinaptinmi Lot qawarirqa Jordán mayupa qechwankunata Zoar llaqtakama yakuyuq kasqanta, Tayta Diospa huertan hinaraq kasqanta, Egipto allpamanraqmi rikchakurqa. Chaynaqa, karqa Sodomatawan Gomorrata Tayta Dios manaraq purmarachichkaptinmi.

¹¹ Chaymi Lot akllakuykurqa Jordán mayupa qechwankunata, hinaspam intipa qespimunan lawman ripukurqa. Chaynapim rakinakururqaku.

¹² Abrammi Canaán allpapi yacharqa, Lotñataqmi qechwa law llaqtakunapi yacharqa hinaspanmi kaypi chaypi carpanta sayachistin Sodoma llaqtakama chayarurqa.

¹³ Sodomapi runakunaqa llumpay mana allin runakunam karqaku, Tayta Diospa contranpim millakuypaq kaqkunata ruwaspa anchata huchallikuqku.

¹⁴ Lot sapaqchakuruptinmi Abramta Tayta Dios nirqa: Maymi kasqaykimanta hanay lawta, uray lawta, intipa qespimunan lawta, chaynallataq intipa seqaykunan lawtapas qawariy.

¹⁵ Kay qawasqayki allpatam qanmanwan miraynikikunaman wiña-wiñaypaq qosqaykichik.

¹⁶ Miraynikikunatam ñutu allpata hinaña mirachisaq, manam pipas yupayta atinqachu.

¹⁷ Hatarispayki kay allpata patan-patan muyumuy, kay allpatam qosqayki, nispa.

¹⁸ Chaymi Abramqa carpanta astarqa Hebrón lawpi Mamre sutiyuq runapa encina sachankunapa kasqanman, chaypim Tayta Diosta yupaychananpaq huk altarta ruwarqa.