Ezequiel 2 - Chuya Qellqa 1992

Ezequielta Tayta Dios qayasqanmanta

¹ Tayta Diosmi kaynata nimuwarqa: Runapa churin sayariy, ñoqam rimapayasqayki, nispa.

² Chaynata niwachkaptinmi Tayta Diospa Espiritun ñoqaman huntaykuwarqa, hinaptinmi sayarirachiwaptin rimapayawasqanta uyarirqani.

³ Paymi kaynata niwarqa: Runapa churin, qamtam Israelpa mirayninkunaman kachasqayki. Paykunam ñoqapa contraypi hoqarikurunku. Paykunapas chaynataq ñawpaq taytankupas kunan punchawkamam mana kasuwankuchu.

⁴ Ñoqaqa kachachkayki mana kasukuq rumi sonqo runakunamanmi. Paykunamanmi ñoqa Tayta Diospa imam nisqayta nimunki.

⁵ Uyarisunaykipaq mana uyarisunaykipaqpas willamunkim, paykunaqa mana kasukuq miraykunam. Chaynapim yachanqaku chawpinkupi huk profeta kasqanta.

⁶ Runapa churin, paykunataqa chaynataq imam nisusqaykitapas amam manchakunkichu. Kichkapa intusqan hinaña kaspapas otaq atoq-atoq urukunapa chawpichasqanña kaspapas, amam ima rimasqankutapas manchakunkichu, amataqmi paykunapa qayllanpiqa hukmanyankichu. Paykunaqa mana kasukuq runakunam.

⁷ Qamqa imam nisqaytam willanki uyariptinku otaq mana uyariptinkupas. Paykunaqa mana kasukuqkunam kanku.

⁸ Chaynaqa, runapa churin, imam nisqaytayá uyariy. Amayá chay runakuna hina mana kasukuqqa kaychu. Simikita kichariy hinaspa imam qosqayta mikuy, nispa.

⁹ Chaymi qawarispay rikurqani huk makita, qellqasqa rollota haywarimuwachkaqta.

¹⁰ Qawachkaptiymi chay librota ñawpaqniypi mastariykurqa, hinaptinmi ñawpaqninpipas chaynataq qepanpipas aya takikuna, nanaywan hapichikuykuna hinaspa sasachakuykuna qellqasqa kasqa.