Ezequiel 15 - Chuya Qellqa 1992

Israel runakunata mana valeq uvas plantawan rikchanachisqanmanta

¹ Tayta Diosmi rimapayawaspan kaynata niwarqa:

² Runapa churin, ¿imapitaq uvaspa kaspin wakin sachakunapa kullunmanta aswan allin?

³ ¡Uvaspa kaspinqa manam imapaqpas servinchu! ¡Manam ima warkukunallapaqpas servikunchu!

⁴ Uvas kaspiqa yantallapaqmi servikun, sichum puntankunata nina ruparuptin chawpinñataq carbonyarunman hinaspaqa ¿yaqachu imallapipas servikunmanraq?

⁵ Sichum manaraq ruparuchkaspa mana imapaqpas servikuchkaspaqa aswanchiki carbonyaruspaqa manaña imapaqpas valenqachu, nispa.

⁶ Chayraykum ñoqa Tayta Dios kaynata nini: Imaynam uvaspa kaspinta rupananpaq ninaman wischuykunku, chaynatam Jerusalenpi yachaqkunatapas ninaman wischuykusaq.

⁷ Paykunapa contranpim ñoqaqa sayarisaq, ninapa rupayninmantaña ayqeruptinkupas hina ninam paykunataqa kañanqa. Paykunapa contranpi hatariptiymi Tayta Dios kasqayta yachankichik.

⁸ Contraypi hatarisqankumantam nacionninkutapas pasaypaqta chunnichisaq. Ñoqa Tayta Diosmi chaynata nini.