Éxodo 40 - Chuya Qellqa 1992

Santuariota hatarichisqankumanta

¹ Moisestam Tayta Dios nirqa:

² Punta killapa punta kaq punchawninpim santuariotawan ñoqaman asuykuna carpata sayachinki.

³ Chaymanmi pacto ruwasqay Arcata churanki, hinaspam chay Arcapa kananta velowan tapanki.

⁴ Apaykunkitaqmi mesatawan candelabrotapas, hinaspam mecheronkunata ratachinki.

⁵ Incienso kañana qorimanta altartañataqmi Arcapa ñawpaqninpi churanki, churankitaqmi carpapa punkunpi cortinatapas.

⁶ Sacrificiokunata kañanapaq altartañataqmi carpapa punkunpa ñawpaqninpi churanki.

⁷ Lavatoriotapas yakuyuqtam altarmanta carpaman rinapi churanki.

⁸ Sayachinkitaqmi carpapa muyuriqninpi cortinatapas, hinaspam patioman yaykuna punkupi cortinata churanki.

⁹ Chaymantam ñoqapaq sapaqchaspa tallina kaq aceitewan ñoqaman asuykuna carpaman tallinki, tallinkitaqmi chaypi tukuy ima kaqkunamanpas chaynataq lliw servicionkunamanpas. Chaynapim ñoqapaq chuyanchasqa kanqa.

¹⁰ Tallinkitaqmi kañana altarmanpas, servicionkunamanpas, chaynatam altarta ñoqapaq chuyanchanki, chaynapim altarqa chuya kanqa.

¹¹ Tallinkitaqmi lavatoriomanpas hinaspa tiyananmanpas. Chaynatam chuyanchanki.

¹² Aarontawan churinkunatam ñoqaman asuykuna carpapa punkunman asuykachinki, hinaspam chaypi bañachinki.

¹³ Serviwananpaq pachakunawan Aaronta pachachispaykim paymanpas aceiteta tallinki, chaynapim sacerdotey kananpaq sapaqchanki.

¹⁴ Chaymantam churinkunatapas asuykachispa tunicawan pachachinki.

¹⁵ Paykunatapas taytankuta hinam sacerdoteykuna kanankupaq aceitewan tallispa sapaqchanki. Aceitewan tallisqaykiraykum wiñaypaq sacerdoteykunaña lliw mirayninkunapiwan kanqaku, nispa.

¹⁶ Moisesmi Tayta Diospa tukuy kamachisqanman hina ruwarqa.

¹⁷ Chaynapim iskay kaq watapa punta kaq killapa punta kaq punchawninpi santuario sayachisqa hinaspa armasqa karqa.

¹⁸ Moisesmi santuariota sayachirqa hinaspam toqoyuq tiyanankunata churarqa. Tablankunatapas sayachispam listonninkunata ustuchirqa. Sayachirqataqmi pilarninkunatapas.

¹⁹ Diosman asuykuna carpapa hawanmanmi qatanta churarqa, hinaspam chaypa hawanman huknin qatanwan qatapaykurqa, chaynataqa ruwarqa imaynam Moisesman Tayta Diospa kamachisqanman hina.

²⁰ Chunkantin kamachikuytapas Arcapa ukunmanmi churarqa, Arcapa varillankunatapas ustuchirqam, Arcapa hawanmanñataqmi tapanta churarqa.

²¹ Chaymantam Arcata apaykurqa Tayta Diosman asuykuna carpaman hinaspam “Chuyay-chuyay” lugarmanta “Chuya” lugarta rakinaq velota churarqa, chaynataqa ruwarqa imaynam Moisesman Tayta Diospa kamachisqanman hinam.

²² Diosman asuykuna carpamanmi mesata apaykurqa, hinaspam carpapa norte lawninpi, velopa ñawpaqninpi churaykurqa.

²³ Chay mesapa hawanpim Diospa tantankunata patanarqa, chaynataqa ruwarqa imayna Moisesman Tayta Diospa kamachisqanman hina.

²⁴ Candelabrotapas Diosman asuykuna carpapa sur lawninpi hinaspa mesapa chimpanpim churarqa.

²⁵ Tayta Diospa ñawpaqninpim mecherokunatapas ratachirqa, imaynam Moisesman Tayta Diospa kamachisqanman hina.

²⁶ Chay carpamantaqmi qorimanta altartapas churarqa, velopa ñawpaqninpi.

²⁷ Chaypa hawanpim miski asnaq inciensota kañarqa imaynam Moisesman Tayta Diospa kamachisqanman hina.

²⁸ Churarqataqmi Diosman asuykuna carpapa punkunpi cortinatapas.

²⁹ Lliw kañana altartapas Diosman asuykuna carpapa punkunman churarqa, hinaspam animalta sacrificaspa lliw kaña ofrendata chaynataq kawsaykunamanta ofrendatapas chay altarpa hawanpi kañarqa, imaynam Moisesman Tayta Diospa kamachisqanman hina.

³⁰ Lavatoriotapas altarmanta carpaman rinapim churarqa, chay lavatorioqa mayllakunankupaq yakuyuqmi karqa.

³¹ Chaypim Moisespas, Aaronwan churinkunapas makinkutawan chakinkuta mayllakurqaku.

³² Chaynatam mayllakuqku Diosman asuykuna carpaman yaykuspankupas chaynataq altarman asuykuspankupas, imaynam Moisesman Tayta Diospa kamachisqanman hina.

³³ Moisesmi hatarichirqa patiopa muyuriqninpi cortinakunata chaynataq patioman yaykuna punkupi cortinatapas, chay patiopim Diosman asuykuna carpawan altar karqa. Chaynatam Moisés ruwayta tukururqa.

Carpapa hawanpi puyu rikurisqanmanta

³⁴ Hinaptinmi Diosman asuykuna carpata puyu tapaykuptin Tayta Diospa atiynin carpaman huntaykurqa.

³⁵ Chaymi carpaman Moisés mana yaykuyta atirqachu chaypa hawanpi puyu kasqanrayku, Diospa atiynin carpaman huntaykusqanrayku.

³⁶ Diosman asuykuna carpamanta puyu hoqarikuruptinñataqmi samasqankumanta Israelpa mirayninkuna maymi rinankuta pasaqku.

³⁷ Puyu mana hoqarikuptinqa manam riqkuchu puyu hoqarikunan punchawkama.

³⁸ Tayta Diospa puyunmi Diosman asuykuna carpapa hawanpi punchaw karqa, tutanñataqmi kancharichkaq nina, chaynam karqa Israelpa mirayninkuna mayman riptinkupas.