Éxodo 36 - Chuya Qellqa 1992

¹ Chaynatam Bezaleelwan Aholiabpas hinaspa lliw maestrokunapas ruwanqaku, imaynam Tayta Diospa yachay qosqanman chaynataq yuyay qosqanman hina, chaynapi Tayta Diospa kamachisqanman hina carpapi tukuy ima serviciokunata allinta ruwanankupaq.

Achkallaña ofrendakuna apamusqankumanta

² Moisesmi Bezaleelta hinaspa Aholiabta qayarqa, qayarqataqmi Tayta Diospa yachay qosqan llapallan yachayniyuq runakunatapas; chay runakunaqa kikillankumantam imapas ruwaypi yanapakunankupaq prometekurqaku.

³ Paykunam Moisesmanta Israelpa mirayninkunapa lliw ofrenda apamusqankuta chaskirqaku, chaywan carpapi serviciokunata ruwanankupaq. Israelpa mirayninkunaqa hinallam ofrendankuta sapa punchaw apamuqku.

⁴ Chayraykum carpa ruwaq maestrokuna sapakama llamkayninkuta saqeykuspa hamuspanku,

⁵ Moisesta nirqaku: Llaqtaqa Tayta Diospa kamachikusqanta ruwanapaq necesitasqanchikmantapas aswan achkatañam aparamunku, nispa.

⁶ Chaymi Moisesqa maymi yachasqanku campamentopi kaynata kamachirqa: “Qaripas warmipas amaña imatapas ruwachunkuñachu carpapaq ofrendata apamunankupaqqa”, nispa. Chaynata nispanmi ofrenda apamunankuta harkakururqa,

⁷ carpa ruwanankupaq materialkuna puchu-puchuña kasqanrayku.

Santuariota ruwasqankumanta

⁸ Allinnin maestrokunam carpata ruwarqaku. Chunka cortinakunatam lino qaytumanta, morado qaytumanta, grosella qaytumanta hinaspa guindo qaytumanta ruwarqaku. Chay cortinakunapim querubinkunata suma-sumaqta bordarqaku.

⁹ Sapa cortinapa sayayninmi karqa chunka iskayniyuq metro parten, anchonñataqmi karqa iskay metro, llapan cortinakunam karqa chay sayayniyuqkamalla.

¹⁰ Pichqa cortinakunatam sapakamata tinkinaspa sirarqaku, chaynallatam wakin pichqa cortinakunawanpas ruwarqaku.

¹¹ Chay pichqantin tinkinasqa cortinakunapa kaylaw-waklaw patanpim azul cordonmanta ojalkunata churarqaku. Chaynallatam huknin pichqantin tinkinasqa cortinakunapipas ruwarqaku.

¹² Ruwarqakutaqmi cordonmanta pichqa chunka ojalkunatapas, chaykunatam punta kaq pichqantin tinkinaspa sirasqa cortinapa patanpi churarqaku, chaynallatam ruwarqaku huknin pichqantin tinkinaspa sirasqa cortinapa patanpipas; chay ojalkunaqa karqa chimpa-chimpapuram.

¹³ Ruwarqakutaqmi qorimanta pichqa chunka corchetekunatapas, chaykunawanmi punta kaq pichqantin tinkinaspa sirasqa cortinata huknin pichqantin tinkinaspa sirasqa cortinaman tinkirqaku, chaynapim carpaqa hukllaman huñusqa karqa.

¹⁴ Ruwarqakutaqmi cabrapa pelonmanta chunka hukniyuq cortinakunatapas, chaytaqa ruwarqaku carpapa hawanta qatanankupaqmi.

¹⁵ Chay cortinakunapa sayayninmi karqa chunka kimsayuq metro parten, anchonñataqmi karqa iskay metro.

¹⁶ Pichqa cortinatam sapakamata tinkinaspa sirarqaku, soqtantin cortinakunatapas hina chaynallatam sirarqaku.

¹⁷ Chay pichqata tinkinaspa sirasqa cortinapa patanpim cordonmanta pichqa chunka ojalkunata churarqaku, chay soqtata tinkinaspa sirasqa cortinakunapa patanpipas hina chayna pichqa chunkatam churarqaku.

¹⁸ Ruwarqakutaqmi broncemanta pichqa chunka corchetekunatapas, chaykunawanmi cordonmanta ojalkunata hapichirqaku, chaynapim carpaqa chullallaman tinkisqa karqa.

¹⁹ Ruwarqakutaqmi carneropa pukaman teñisqa qalasninmanta qatatapas, chaypa hawanpaqñataqmi huk qatata fino qalasmanta ruwarqaku.

²⁰ Carpapa tablankunatañataqmi acacia sachamanta ruwarqaku, hinaspam allinta sayachirqaku.

²¹ Sapa tablapa sayayninmi karqa tawa metro parten, anchonñataqmi parte metro masnin.

²² Tablapura tupanachisqa kananpaqmi sapa tablapi iskay espigakuna karqa. Chaynatam carpapa llapallan tablankunata ruwarqaku.

²³ Iskay chunka tablakunatam carpapa alleq lawninpaq ruwarqaku.

²⁴ Ruwarqakutaqmi qollqemanta toqoyuq tiyanakunatapas tawa chunkata, iskay toqom sapa tablapaq karqa, chaymanmi tablapa iskay espigankuna yaykurqa.

²⁵ Carpapa ichoq lawninpaqpas iskay chunka tablakunatam ruwarqaku.

²⁶ Qollqemantam toqoyuq tawa chunka tiyanakunata ruwarqaku, iskay tiyanakunam sapa tablapa tiyananpaq karqa.

²⁷ Carpapa qepa lawninpaqñataqmi otaq intipa seqaykunan lawninpaqñataqmi soqta tablakunata ruwarqaku.

²⁸ Carpapa qepa esquinankunapaqmi iskay tablakunata ruwarqaku.

²⁹ Chay iskay tablakunam huklla kananpaq pampanmanta altonpi punta kaq anillokama tinkinasqa karqa, chaynatam esquinankunapaq chay iskay tablakunawan ruwarqaku.

³⁰ Pusaq tablakunatam ruwarqaku, chay pusaq tablakuna tiyananpaqñataqmi qollqemanta chunka soqtayuq tiyanakuna karqa, iskay tiyanam sapa tablapa tiyananpaq karqa.

³¹ Carpapa huklawnin tablakunapaqpas acacia sachamantam pichqa listonkunata ruwarqaku.

³² Kaylaw waqtanpi tablakunapaqpas pichqa listonkunatam ruwarqaku, pichqa listonkunatañataqmi qepa lawninpi tablakunapaq ruwarqaku.

³³ Chawpipi kaq listonmi tablakunapa chawpinta pasarqa kaylaw patanmanta waklaw patankama.

³⁴ Chay tablakunatam qoriwan llusirqaku, hinaspam qorimanta anillokunata churarqaku chayninta listonkuna pasananpaq; listonkunatapas qoriwanmi llusirqaku.

³⁵ Ruwarqakutaqmi morado qaytumanta, grosella qaytumanta, puka qaytumanta, kawpusqa linomanta velotapas; chay velopa hawanpim iskay querubinkunata kuyayllapaqta bordarqaku.

³⁶ Chay velota warkunankupaqñataqmi acacia qerumanta tawa pilarkunata ruwaspanku qoriwan llusirqaku, hinaspam qorimanta ganchokunata churarqaku; chay pilarkuna tiyananpaqmi qollqeta chulluchispa toqoyuq tawa tiyanakunata ruwarqaku.

³⁷ Ruwarqakutaqmi carpapa punkunpaq suma-sumaq bordasqa cortinatapas, chay cortinaqa karqa morado qaytumanta, grosella qaytumanta, guindo qaytumanta hinaspa kawpusqa linomantam.

³⁸ Chay cortinapaqmi acacia qerumanta pichqa pilarkunata ganchoyuqtakama ruwarqaku. Chay pilarkunapa puntanmi anillonkunapiwan qoriwan llusisqa karqa. Chay pichqa pilarkunapa tiyanankunañataqmi broncemanta karqa.