Éxodo 34 - Chuya Qellqa 1992

Musoq tabla rumikunamanta

¹ Moisestam Tayta Dios nirqa: Iskay tabla rumikunata labray punta kaqkunata hina, ñuturusqayki tabla rumikunapi qellqatam musoqmanta qellqasaq.

² Paqarinpaq alistakuy, paqarinmi Sinaí orqopa puntanman seqanki, chaypim ñoqawan tupasunchik.

³ Qanwanqa amam pipas seqamunqachu, amataqmi pipas chay orqomanqa rikurimunqachu. Chay orqopiqa amataqmi ovejatapas nitaq vacatapas michinqakuchu, nispa.

⁴ Chaymi Moisés, iskay tabla rumikunata punta kaqta hina labrarqa, hinaspam Tayta Diospa kamachisqanman hina tutapayta hatarispan Sinaí orqoman seqarqa. Labrasqan iskaynin tabla rumikunata aparikuspan.

⁵ Tayta Diosñataqmi puyupi uraykamuspan Moiseswan karqa, hinaspam sutinta willarqa.

⁶ Moisespa ñawpaqninta pasaspanmi Tayta Dios nirqa: “¡Ñoqaqa Tayta Diosmi kani, llakipayakuq, kuyapayakuq Diosmi kani, ñoqaqa llampu sonqom kani, mana chaylla piñakuruqmi kani, cheqap kuyapayakuqmi kani!

⁷ Ñoqaqa waranqantin miraykunakama kuyapayakuqmi kani, mana allin ruwaqtapas, mana kasukuqtapas, huchallikuqtapas pampachaykuqmi kani. Huchayuq runatam ichaqa, Tayta-mamakunamanta qallaykuspa willkanpa willkankunakama castigasaq”, nispa.

⁸ Hinaptinmi Moisés, apurawman pampakama kumuykuspan hatuncharqa,

⁹ hinaspam nirqa: Señorlláy, cheqaptapuni kuyawaspaykiqa ñoqaykuwanyá riy. Señorlláy, llaqtaykiqa rumi sonqo runakunam, mana allin ruwasqaykutawan huchaykuta pampachaykuspayá runaykikunapaqña chaskiykullawayku, nispa.

Musoq pactomanta

¹⁰ Tayta Diosmi nirqa: Ñoqam llapallan runaykikunapa ñawpaqninpi pactota ruwasaq, kay pachapi nitaq maylaw nacionpipas mana pipapas ruwasqantam admirakuypaq milagrokunata ruwasaq, maymi qampa kasqaykipim llapallan Israel runakuna ñoqapa ruwasqayta rikunqaku, mancharikuypaqmi qanwan ruwasqaykunaqa kanqa.

¹¹ Kunan kamachisqayta kasukuychik, ñoqam ñawpaqnikichikmanta wischusaq amorreokunata, cananeokunata, heteokunata, ferezeokunata, heveokunata hinaspa jebuseokunata.

¹² Yaykunaykichik allpapi yachaqkunawanqa amam ima contratotapas ruwankichikchu, yanqañataqmi urmachisuqnikichik rumi hina kanmanku.

¹³ Aswanqa altarninkunatam tuñichinkichik, yupaychasqanku rumikunatapas pakipankichikmi, Asera sutiyuq idolonkutapas ñutunkichikmi.

¹⁴ Amam qonqorakunkichikchu idolokunapa ñawpaqninpiqa; huk dioskunata yupaychanaykichiktaqa manam munanichu, ñoqa Tayta Diosqa celosom kani.

¹⁵ Chay nacionpi runakunawanqa amam ima contratotapas ruwankichikchu, paykunaqa chuchumikaruq casada warmi hinam idolonkupaq animalkunata wañuchispa aychantapas mikuchisunkichikman.

¹⁶ Yanqataq churikichikkunatapas chaypi kaq warmikunawan casarachiwaqchik, hinaptin chuchumikaruq casada warmi hina churikichikkunatapas diosninkunaman pusanman hinaspa chaykunataña yupaychachinman.

¹⁷ Yanqañataq ima metaltapas chulluchispa idolokunata ruwawaqchik.

Watapi fiestakuna ruwanankumanta

¹⁸ Kamachisqayman hinam mana levadurayuq tanta fiestata ruwankichik, qanchis punchawmi mana levadurayuq tantata Abib sutiyuq killapi mikunkichik, chaytaqa ruwankichik chay killapi Egipto nacionmanta lloqsimusqaykichikraykum.

¹⁹ Lliw piwi churikichikmi ñoqapaq kanqa, ñoqapaqtaqmi sapaqchanki vacaykikunapa, ovejaykikunapa hinaspa cabraykikunapa punta kaq orqo wawankunatapas.

²⁰ Asnopa punta wawantañataqmi huk carnerowan cambianki, mana cambiaspaykiqa chay asnochapa kunkantam qewirunki. Piwi churikichiktapas cambiankichikmi, mana ofrendayuqqa amam pipas rikurimuwanqachu.

²¹ Soqta punchawmi llamkankichik, qanchis kaq punchawpim ichaqa samankichik, tarpuy kaptin otaq cosecha kaptinpas samankichikmi.

²² Pascua fiestamanta qanchis semananmanmi trigo cosecha qallariy fiestata ruwankichik, ruwankichiktaqmi cosecha tukuy fiestatapas. Chay fiestatam sapa wata, cosecha tukuyta ruwankichik.

²³ Watapim kimsa kutita qamkunamanta llapallan qarikuna asuykamuwanqa, ñoqa Tayta Diosmi, Israel runakunapa Diosnin kani.

²⁴ Ñawpaqnikichikmantam wakin nacionkunata wischuspay allpaykichikta mirachisaq. Watapi kimsa kutitakama qayllayman hamunaykichikkamaqa manam pipas allpaykichiktaqa hapikuykunqachu. Ñoqam Diosnikichik kani.

²⁵ Sacrificasqaykichik animalpa yawarnintaqa amam levadurayuq tantatawan kuskataqa ofrecewankichikchu; Pascua fiestapi animal wañuchisqaykichikpa aychantapas amataqmi paqarinnintin punchawkamaqa puchuchinkichikchu.

²⁶ Allpaykichikpi wiñaqmanta punta cosechasqaykichiktaqa allin kaqnintam ñoqa Tayta Diospa wasiyman apamuwankichik. Amam uña cabrachataqa mamanpa lechenpiqa yanunkichu.

Diospa pactonta Moisés qellqasqanmanta

²⁷ Moisestam Tayta Dios nirqa: Kay nisqayta qellqay, kay nisqayman hinam qanwan hinaspa Israelpa mirayninkunawan pactoyta ruwani, nispa.

²⁸ Moisesmi Tayta Dioswan chay orqopi karqa tawa chunka punchaw tawa chunka tuta, manam mikurqachu nitaqmi yakutapas tomarqachu. Chaypim tabla rumikunapi pactonta otaq chunkantin kamachikuykunata Tayta Dios qellqarqa.

²⁹ Chaymantam Moisés Sinaí orqomanta uraykamurqa chunkantin kamachikuykunata iskay tabla rumikunapi marqarikuspan, ichaqa manam musyakurqachu Tayta Dioswan rimasqanrayku uyan kancharisqantaqa.

³⁰ Aaronwan Israelpa mirayninkunañataqmi Moisespa uyanta kancharichkaqta qawaykuspanku, mancharikuymanta mana asuykuyta atirqakuchu.

³¹ Chaymi Moisés qayaptin Aaronwan llaqtapa kamachiqninkuna payman asuykurqaku, hinaptinmi paykunawan Moisés rimarqa.

³² Chaymantam Israelpa llapallan mirayninkuna asuykaramuptinku Sinaí orqopi Tayta Diospa kamachimusqanman hina kamachirqa.

³³ Paykunawan rimayta tukuruspanmi Moisés huk velowan uyanta tapakuykurqa.

³⁴ Tayta Dioswan rimaq yaykuspanmi Moisés uyan tapakusqan velota lloqsimunankama hurqokuykuq, lloqsiramuspanñataqmi Tayta Diospa kamachimusqanta Israelpa mirayninkunaman willaq.

³⁵ Israelpa mirayninkuna, Moisespa uyan kanchariqta qawaptinkum payqa kasqallan tapakuykuq Tayta Dioswan rimaq yaykunankama.