Éxodo 21 - Chuya Qellqa 1992

Criadokunapaq kamachikuykunamanta

¹ Israel runakunaman kay kamachikuykunata qonanpaqmi Moisesta Tayta Dios nirqa:

² Hebreokunamanta criadota rantispaykiqa soqta watam servichikunki, qanchis kaq watapiñataqmi mana imata pagaspalla libre lloqsikunqa.

³ Sapallan yaykumuspaqa sapallanmi lloqsikunqa, warmiyuq yaykumuspam ichaqa warmintin lloqsikunqa.

⁴ Criado kachkaptin, warmita patronnin qoptin, chay warmiñataq qaritapas otaq warmitapas wachakuruptinqa, chay warmim wawankunapiwan patronninpaq qepanqa, qosanñataqmi sapallan lloqsikunqa.

⁵ Sichu chay criado ninqa: “Patronniytam kuyani, kuyanitaqmi warmiytawan churiykunatapas; chaynaqa manam libreqa lloqsiymanchu” nispa , hinaptinqa

⁶ patronninmi Diospa santuarionman pusanqa, hinaspam punkuman otaq punkupa pilarninman asuykachispan alesnawan chay criadonpa rinrinta uchkurunqa, hinaptinmi kawsanankama chay patronninpa criadonña kanqa.

⁷ Pipas warmi churinta criadapaq rantikuruptinqa, chay warmiqa manam lloqsinqa qari criado hinachu.

⁸ Sichum patronnin chay criadanwan mana casarakuyta munaptinqa, chay criadataqa hina castamasinmi rantinqa, wischupakusqanraykum huklaw llaqtayuq runamanqa mana rantikunqachu.

⁹ Churinwan casarachispanmi ichaqa warmi churinta hina uywanqa.

¹⁰ Sichum patronnin chay criadanwan casado kachkaspa huk warmita casararuspanqa amam punta warmintaqa pisichinqachu mikunanta, pachanta nitaq casada derechontapas.

¹¹ Sichum chay criadapa kay kimsan derechonta patronnin mana ruwaptinqa chay criadam mana pagaspalla lloqsikunqa.

Runamasin wañurachiqpaq kamachikuykunamanta

¹² Pipas runamasinta maqaspa wañuchiqqa paypas wañuchisqataqmi kanqa.

¹³ Pipas mana wañuchiyta munachkaptin ichaqa Dios munarqa chay runapa makinpi wañunanta , hinaptinqa chay runam amparakunapaq akllasqay sitioman ayqekunqa.

¹⁴ Pipas runamasinta wañuchiyta munaspan qonqaymanta wañurachiptinmi ichaqa, altarniypiña pakakuptinpas hurqospa wañuchinkichik.

¹⁵ Pipas taytanta otaq mamanta maqaqqa wañuchisqam kanqa.

¹⁶ Pipas runamasinta aparuspa rantikuruptinqa otaq makinpiraq tariruptinkuqa, chay suwaqa wañuchisqam kanqa.

¹⁷ Pipas taytanta otaq mamanta ñakaqqa wañuchisqam kanqa.

¹⁸ Iskay runakuna peleaspa huknin runa rumiwan chamqarunman otaq takarunman, hinaptin mana wañuspa camachakurunman,

¹⁹ hinaspañataq hatariruspa hawapi tawnawan puriptinqa, amam chay maqaqnintaqa wañuchinkichikchu. Aswanqa chay onqoqmanmi, onqospa tiempo pierdesqanmanta pagapunqa, allinyanankamataqmi hampichinqapas.

²⁰ Pipas criadonta otaq criadanta kaspiwan waqtaspa wañurachispanqa, chay runaqa castigasqam kanqa.

²¹ Sichum huk punchaw otaq iskay punchawllapas kawsaptinmi ichaqa mana castigasqachu kanqa qollqenpa chanin kasqanrayku.

²² Sichum iskay qarikuna peleachkaspanku wiksayuq warmita malparirachispanku, cuerponta ichaqa mana imanarqakuchu hinaptinqa juezkunapa nisqanman hinam, qosanpa mañakusqan multata paganqaku.

²³ Chay warmi wañuruptinmi ichaqa wañuchiqninpas wañuchisqa kanqa.

²⁴ Runaqa ñawimantam ñawinwan paganqa, kirumantam kirunwan, makimantam makinwan, chakimantam chakinwan paganqa;

²⁵ ninawan puslluchiqqa paypas puslluchisqam kanqa, heridaruqpas heridasqam kanqa, qoyuyachiqpas qoyuyachisqam kanqa.

²⁶ Pipas maqaspan criadonpa otaq criadanpa ñawinta toqyarachispanqa, ñawinraykum libreta kachaykunqa.

²⁷ Pipas criadonpa otaq criadanpa kirunta wichirachispanqa, kirunraykum libreta kachaykunqa.

Qonqaymanta wañurachiqkunapaq kamachikuykunamanta

²⁸ Sichum huk toro, qaritapas otaq warmitapas waqraruspan wañurachiptinqa, chay torom rumiwan choqapasqa wañunqa, aychantapas amam mikunqakuchu, dueñonmi ichaqa mana huchayuq kanqa.

²⁹ Sichum chay toro waqrakuq kasqanta yachachkaspa dueñon mana cuidarqachu hinaptin pitapas wañurachiptinqa, chay torom rumiwan choqapasqa wañunqa, dueñonpas wañuchisqam kanqa.

³⁰ Sichum chay toroyuqta mana wañuchispanku multaylla multaptinkum ichaqa, wañuqpa ayllunkunaman juezpa nisqan multata paganqa.

³¹ Pipatapas qari churinta otaq warmi churinta waqraruptinqa, kay kamachikuyman hinam ruwasqa kanqa.

³² Pipatapas criadonta otaq criadanta toro waqraruptinqa dueñonmi paykunapa patronninman kimsa chunka masnin qollqeta paganqa, toroñataqmi rumiwan choqapasqa wañunqa.

³³ Pipas pozopa tapanta kicharunqa, otaq pozota toqospan mana tapanqachu hinaptin chayman toro kaspa otaq asno kaspapas wichiykuptinqa,

³⁴ pozopa dueñonmi chay animalpa dueñonman paganqa, chay wañusqa animalñataqmi pozoyuqpaqña kanqa.

³⁵ Pipa toronpas runamasinpa toronta waqraruspa wañurachiptinqa, chay wañuchiq torotam rantikuruspanku qollqetañataq igualman rakinakunqaku, wañusqa torotapas partenakunqakum.

³⁶ Sichum chay toro waqrakuq kasqanrayku lliwpa reqsisqan kachkaptin dueñonpas mana watarqachu , hinaptinqa chay wañuq toromantam huk torota sayachipunqa, chay wañusqa torotañataqmi paypaqña kanqa.