Éxodo 18 - Chuya Qellqa 1992

Moisesman suegron Jetropa watukusqanmanta

¹ Moisespa suegron Madián lawpi sacerdote Jetrom uyarirurqa, Moiseswan hinaspa Israelpa mirayninkunawan Tayta Diospa tukuy ima ruwasqanta, uyarirqataqmi imaynam Egipto nacionmanta Israelpa mirayninkunata Tayta Dios hurqomusqantapas.

² Moisesqa Egipto nacionpi kachkaspallaraqmi warmin Seforata iskaynin churinkunatawan suegron Jetropa kasqanman kacharqa, chaymi Jetro chaskiykurqa

³ Seforata iskaynin wawantinta. Moisesmi huknin churinta Gersonwan suticharqa, “ñoqaqa huklaw llaqtayuqmi kani runapa llaqtanpi”, nispan.

⁴ Huknin churintañataqmi Eliezerwan suticharqa, “Ñawpaq taytaykunapa Diosninmi Faraón wañuchiwananmanta libraykuwarqa”, nispa.

⁵ Diospa orqonpa hichpan chunniqpi Moisés samachkaptinmi suegron Jetro chayarurqa, Moisespa warmin Seforapiwan hinaspa iskaynin wawankunapiwan.

⁶ Hinaspam Moisesta nirqa: Ñoqa suegroykim warmikipiwan hinaspa iskaynin churikikunapiwan watukamuchkaykiku, nispa.

⁷ Chaymi suegronman Moisés taripaykuspan qonqoranpa kumuykurqa, hinaspam muchaykurqa. Chaymantam imaynam kasqankumanta tapunakuspanku carpaman yaykurqaku.

⁸ Chaypim suegronman Moisés willarqa, Tayta Diosqa Israel runakunarayku Faraonta chaynataq Egipto runakunatapas tukuy ima ruwasqanmanta. Willakurqataqmi hamusqankupi sasachakuykuna pasamusqantapas chaynataq imaynam paykunata Tayta Dios libramusqantapas.

⁹ Hinaptinmi Jetro kusikurqa Egipto runakunamanta libraspa Israel runakunapaq Tayta Dios tukuy allinkuna ruwasqanmanta.

¹⁰ Chaymi Jetro nirqa: Tayta Diosyá yupaychasqa kachun, paymi Faraonmanta chaynataq Egipto runakunapa makinpi ñakariynikichikmanta libramusurqankichik.

¹¹ Egipto runakunaqa hatun tukuspam Israel runakunata ñakarichirqaku, chayraykum vencesqa karqaku. Kunanmi yachani Tayta Diosqa llapa dioskunamantapas aswan atiyniyuq kasqanta.

¹² Hinaspam Jetroqa huk animalta apamuspan lliw kañana ofrendatawan chaynataq huk rikchaq ofrendakunatapas Diosman ofrecerqa. Chaymanmi Aaronpas chaynataq Israelpa llapa ancianonkunapas hamurqaku, Diospa qayllanpi Moisespa suegronwan mikunankupaq.

Queja arreglaqkunata Moisés churasqanmanta

¹³ Paqarinnintin punchawmi runakunapa quejanta arreglananpaq Moisés tiyaykurqa; runakunañataqmi Moisespa ñawpaqninpi pacha achikyaqmanta tutaykuykama sayarqaku.

¹⁴ Runakunapaq Moisés tukuy ruwasqanta qawaykuspanmi suegron nirqa: ¿Imatataq kay runakunawan ruwachkanki? ¿Imanasqataq sapallayki tiyanki hinaptin llapallan runakunañataq pacha achikyaymanta tutaykuykama ñawpaqnikipi sayanku? nispa.

¹⁵ Hinaptinmi Moisés nirqa: Diosta tapupunaypaqmi runakuna ñoqaman hamuwanku.

¹⁶ Imapas sasachakuyninku kaptinmi ñoqaman hamunku, hinaptinmi paykunapa sasachakuyninta arreglani, yachachinitaqmi Diospa decretonkunatapas chaynataq yachachikuyninkunatapas, nispa.

¹⁷ Chaymi Moisesta suegron nirqa: Manam allinchu chay ruwasqaykiqa.

¹⁸ Sapallaykiqa anchatam pisiparunki, pisiparunqakutaqmi qanman hamuq runakunapas. Sapallaykipaqqa kay ruwasqaykiqa sasallañam, sapallaykiqa manam ruwayta atiwaqchu.

¹⁹ Kunanyá kay rimapayasqayta uyariway, Diostaqyá qanwan kachun. Kay runakunapa rantinpiyá Diosman asuykuy hinaspa sasachakuyninkuta apaykuy.

²⁰ Paykunamanyá Diospa decretonkunatawan yachachikuyninkunata willay, hinaspayá imaynam kawsanankutawan imam ruwanankuta yachachiy.

²¹ Runakunamanta akllay chaypaq hina qarikunata, Dios respetaqkunata, cheqap rimaq qarikunata, qollqe kuyayta cheqniqkunata. Paykunatam churanki waranqa runakunapi, pachak runakunapi, pichqa chunka runakunapi chaynataq chunka runakunapi, kamachikuqkuna kanankupaq.

²² Paykunam tukuy tiempopi runakunapa quejanta arreglanqaku; sasan kaqkunatam apamusunki, paykunañataqmi fácil arreglana quejakunata arreglanqaku. Chaynapim kay sasa llamkaynikimanta samarinki, chaynatam paykuna yanapasunki.

²³ Sichum kaykunata ruwayman churanki, Diospas chaynata kamachisuptikiqa takyankim, runakunapas hawkallam wasinkuman kutikunqaku, nispa.

²⁴ Chaymi Moisés suegronpa nisqanta kasukuspan chaynata ruwarqa.

²⁵ Israel castakunamantam Moisés akllarqa chaypaq hina allin yachayniyuq qarikunata, hinaspam churarqa waranqa runakunapi, pachak runakunapi, pichqa chunka runakunapi hinaspa chunka runakunapi kamachikuqkuna kanankupaq.

²⁶ Paykunam runakunapa quejankunata tukuy tiempopi allichaqku. Sasan kaqkunatañataqmi Moisesman apamuqku, allichay atisqankutañataqmi paykuna allichaqku.

²⁷ Chaymantam suegronta Moisés aviarurqa, hinaptinmi llaqtanman kutikurqa.