Ester 8 - Chuya Qellqa 1992

Judío runakunapa favorninpi decretomanta

¹ Rey Asueroqa hina chay punchawllapim judío runakunapa enemigon Amanpa wasintapas reina Esterman qoykurqa. Mardoqueoñataqmi reypa qayllanman yaykurqa; chaynataqa ruwarqa ayllun kasqanta Ester willakusqanraykum,

² Chaymi reyqa Amanmanta qechusqan anillota hurqoykuspan Mardoqueoman qoykurqa. Esterpas Amanpa tukuy kapuqninkunatam Mardoqueoman nanachikunanpaq kunaykurqa.

³ Reina Estermi huktawan reyta rimapayarqa, hinaspam ñawpaqninpi kumukuykuspan waqakuywan ruegakurqa Amanpa decreto ruwasqankunata chinkachinanpaq, chaynapi judiokunapa contranpi tanteasqankuna ama cumplikunanpaq.

⁴ Reymi qori varanta Esterman haywariykurqa, chaymi hatariykuspan reypa ñawpaqninpi

⁵ kaynata nirqa: Sichum allinpaq rikchakapusunki, sichum kuyapayariwaspa mañakuyniyta allinpaq qawanki chaynataq kuyakuynikipas ñoqapaq kaptinqa, mañakuykim huk kamachikuyta qellqaspa munaychakusqayki provinciakunaman apachinaykipaq, chaynapi Agag castamanta kaq Hamedatapa churin Amanpa decretasqankuna yanqachasqa kananpaq. Paymi llapallan provinciakunapi judiokuna puchukachisqa kanankupaq cartakunata apachirqa.

⁶ ¿Imanispataq qawayman llaqtamasiykuna ñakariypi kaptinkuqa? ¿Imaynamá aylluykunapa puchukasqantaqa qawakuyman? nispa.

⁷ Chaymi reina Estertawan judío Mardoqueota rey Asuero nirqa: Amanpa wasintapas reina Estermanmi qoykuniña, Amantapas judiokunapa contranpi sayarisqanmantam warkurachiniña.

⁸ Chaynaqa, tanteasqaykichikman hinayá ñoqapa sutiypi judío runakunaman qamkunaña qellqaychik hinaspa anilloywan sutiypi selloychik. Reypa sutinpi qellqasqa chaynataq anillonwan sellasqa decretotaqa manam yanqachayta atinmankuchu, nispa.

⁹ Chaymi Siván sutiyuq kimsa kaq killapa iskay chunka kimsayuq punchawninpi reypaq qellqaqkunata qayachimurqaku, hinaptinmi Mardoqueopa tukuy kamachisqanta qellqarqaku judiokunaman, gobernadorkunaman chaynataq kamachikuqkunamanpas; Indiamanta qallaykuspa Etiopiakama pachak iskay chunka qanchisniyuq provinciakunaman, sapa provinciapa imaynam qellqankuman hina chaynataq rimayninkuman hina. Qellqarqakutaqmi judío runakunamanpas imaynam qellqasqankuman chaynataq rimayninkuman hina.

¹⁰ Chay cartakunatam rey Asueropa sutinpi qellqaspa anillonwan sellarqaku, hinaspam caballokunapi silladakunawan utqayman cheqechirqaku.

¹¹ Chay decretowanmi rey kamachirqa llapa llaqtakunapi kaq judiokunata huñunakuspanku vidankuta defiendenankupaq; ima runakunaña otaq maylaw provinciakunamantaña armasqa hamuptinkupas, warmitapas wawatapas lliwta wañuchispa puchukachinankupaq hinaspa tukuy kapuqninkutapas apakunankupaq.

¹² Chaynataqa kamachikurqa huk punchawllapi rey Asueropa munaychakusqan lliw provinciakunapi ruwanankupaqmi; chaypaqmi akllarurqaku adarwan sutichasqa chunka iskayniyuq killapa chunka kimsayuq punchawninta.

¹³ Llapa runakuna yachanankupaqmi sapa provinciapi chay decretopa copian cheqechisqa karqa, chayman hina llapa judiokuna listolla kaspa enemigonkumanta vengakunankupaq.

¹⁴ Reypa kamachikuyninman hinam chay decretota apaqkuna utqayllamanña lloqsirqaku ancha kallpaq caballokunapi. Chay decretoqa Susa llaqtapipas willakusqam karqa.

¹⁵ Mardoqueoñataqmi reypa qayllanmanta lloqsirqa reypa yuraqniyuq azul pachanwan pachasqa, umanpipas qorimanta hatun coronayuq hinaspa linomanta morado capayuq; chaymi Susa llaqtapi yachaqkuna kusikuymanta qaparirqaku.

¹⁶ Chay punchawmi llapa judiokunapaq karqa ancha kusikuy chaynataq hatunchasqa kananku punchaw.

¹⁷ Reypa kamachikusqan decreto chayasqan provinciakunapiwan llaqtakunapim, llapa judiokuna anchallataña kusikuspanku convidokunata hinaspa fiestakunata ruwarqaku. Huklaw llaqtayuq runakunapas judiokunata manchakusqankuraykum judío kaymanña tikrakurqaku.