Ester 7 - Chuya Qellqa 1992

Amán warkusqa kasqanmanta

¹ Reymi Amanwan kuska rirqa reina Esterpa convido ruwasqanman.

² Chay iskay kaq punchaw convidopi vinota tomachkaptinkum Esterta rey nirqa: Reina Ester ¿imatataq munanki? ¿Imataq mañakuyniki? Mañawaptikiqa munaychakusqay naciontapas partentam qoykusqayki, nispa.

³ Chaymi reina Ester nirqa: Reynilláy, kuyapayariwaspaykiqa chaynataq allinpaq rikchakapusuptikiqa kay mañakuyniyta uyariykullaway: Vidaytawan llaqtaypa vidanta salvaykuy.

⁴ Llaqtamasiykunawan kuskam rantikusqa, ñakarichisqa, wañuchisqa, chinkachisqa kanaykupaqña citasqa kachkaniku. Sichum esclavo kanaykupaq rantikusqa kaspaqa upallakuykuymanmi, manam umayki nanachiq hamuymanchu karqa, nispa.

⁵ Hinaptinmi reina Esterta rey Asuero tapurqa: ¿Pitaq chayqa? ¿Maypitaq kachkan chayta ruway munaq runaqa? nispa.

⁶ Chaymi reina Ester nirqa: ¡Contraykupi sayariq enemigoyku mana allin runaqa kay Amanmi! nispa. Amanñataqmi chayta uyariruspan reypa chaynataq reinapa qayllanpi mancharikurqa.

⁷ Hinaptinmi reyqa piñakuruspa convidomanta hatarispa palaciopa huertanman pasakurqa. Amanñataqmi reypa wañuchinanta musyakuruspan hinapi qeparurqa, reina Esterta vidanta salvaykunanpaq ruegakuspan.

⁸ Huertamanta convido wasiman rey kutiramuspanmi Amanta tarirurqa reina Esterpa waqtanpi pakcharayachkaqta, chaymi qaparispan nirqa: ¿Palacioypipunichu reina Estertapas abusayta munanki? nispa. Chaynata rey niruptinmi Amanpa uyanta taparurqaku.

⁹ Chaymi reyta Harbona sutiyuq eunucon nirqa: Amanpa wasinpim iskay chunka iskayniyuq metro sayayniyuq warkuna kachkan, chaytam Amán ruwachirqa reypa favorninpi rimariq Mardoqueota warkuchinanpaq, nispa. Reyñataqmi nirqa: Chaynaqa, Amanta chaypi warkuramuychik, nispa.

¹⁰ Hinaptinmi Amanta warkururqaku Mardoqueopaq ruwachisqan warkunapi, chayñam reypa piñakuynin tanirurqa.