Ester 6 - Chuya Qellqa 1992

Mardoqueo librasqa kasqanmanta

¹ Chay tutam reyqa mana puñuyta atispan kamachikurqa munaychakuyninpi tukuy ima pasakusqanmanta qellqasqa librota apamuspa qayllanpi leenankupaq.

² Chay qellqapim tarirurqaku eunuco Bigtanpa chaynataq eunuco Terespa, imaynam reypa contranpi hatarispanku wañurachiy munasqankumanta Mardoqueopa denunciasqanta.

³ Chaymi rey tapurqa: ¿Imatataq Mardoqueoman chay ruwasqanmanta qorqaku otaq ruwarqaku? nispa. Hinaptinmi reypa serviqninkuna nirqaku: Manam imallatapas paypaqqa ruwarqakuchu, nispanku.

⁴ Chay ratom Amanqa, Mardoqueota warkuchinanpaq reyta mañakuq hamuspan reypa palacionpa hawa pationpi kachkarqa. Reyñataqmi tapukurqa: ¿Pitaq patiopi kachkan? nispa.

⁵ Chaymi reypa serviqninkuna nirqaku: Amanmi, nispanku. Hinaptinmi rey nirqa: Yaykumuchun, nispa.

⁶ Yaykuramuptinmi Amanta rey tapurqa: ¿Imatataq ruwachwan reypa hatunchay munasqan runata? nispa. Amanñataqmi sonqollanpi piensarirqa: ¿Pitataq reyqa hatunchayta munanman ñoqamanta mastaqa? nispa.

⁷ Chaymi reyta Amán nirqa: Reypa hatunchay munasqan runapaqqa

⁸ reypa pachankunata apamuspa pachachichunku, reypa caballonpi sillaykachispa reypa coronawan umanman churachichunku.

⁹ Reypa pachantawan caballonta kamachikuqkunapa kamachiqninman qochunku, chaynapi reypa hatunchay munasqan runata pachachinanpaq hinaspa chay silladapa puntanta rispan kaynata qayaykachakunanpaq: “Kaynatam reyqa hatunchay munasqan runataqa ruwanqa”, nispa.

¹⁰ Chaymi Amanta rey nirqa: Utqayman pachaykunata hurqomuy, caballoytapas pusamuspa palaciopa punkunpi tiyaq judío Mardoqueowan, ama qonqaykuspa nisqaykiman hina paywan ruwamuy, nispa.

¹¹ Hinaptinmi Amán chay pachakunata hapiykuspan chaynataq caballotapas alistaykuspan Mardoqueota pacharachispan caballopi silladata llaqtapa plazanta muyuchimurqa, hinaspam ñawpaqninta kaynata qaparistin rirqa: ¡Kaynatam reyqa ruwan hatunchay munasqan runataqa! nispa.

¹² Chaymantam Mardoqueoqa kutirirqa reypa palacionpa punkunman, Amanñataqmi ancha llakisqallaña penqakuymanta umantapas tapakuykuspan wasinman kallpaylla kutikurqa.

¹³ Chayaruspanmi Amanqa tukuy ima pasamusqanta warmin Zeresman chaynataq amistadninkunamanpas willakurqa; chaymi consejaqninkuna warmin Zerespiwan kaynata nirqaku: Sichum chay judío Mardoqueopa ñawpaqninpi wichiyta qallaykuspaqa manañam atipayta atiwaqchu, nispanku.

¹⁴ Paykunawan rimachkaptinmi reypa serviqninkuna chayaruspanku utqayllaman Esterpa convido ruwasqanman Amanta pusarqaku.