Efesios 3 - Chuya Qellqa 1992

Mana judío kaqkunaman Pablopa willakusqanmanta

¹ Ñoqa Pablom, Jesucristo servisqayrayku preso kachkani mana judío kaqkunapa allinnikichikpaq.

² Qamkunaqa yachankichikñam Diospa kuyakuyninmanta qamkunawan llamkanaypaq kamachiwasqanta.

³ Diosmi pakasqa kaqkunata reqsichiwarqa, chaykunamantaqa ñawpaqtaraqmi asllatapas qellqamurqaykichikña.

⁴ Chayta leespaykichikmi yachankichik Cristomanta pakasqa kaqkuna yachasqayta.

⁵ Kaykunataqa ñawpaq tiempopi runakunamanqa Diosqa manam reqsichirqachu, kunanmi ichaqa sapaqchakusqan apostolninkunaman hinaspa profetakunaman Espirituntakama reqsichin.

⁶ Pakasqa kaqkunaqa kaymi: Jesucristomanta allin noticiawanmi mana judío kaqkuna judiokunapa herencia chaskiqmasinña rikurirunku, paykunawan hukllaña kasqankuraykum Cristo Jesuspi Diospa promesan chaskiqmasinña karunku.

⁷ Diosmi kuyakuyninpi atiyninta qoykuwarqa, Jesucristomanta allin noticiata willakunaypaq.

⁸ Llapallan iñiqkunamanta mana valeqpaq hapikuchkaptiypas, Diosqa ñoqata kuyawaspanmi kunawarqa, mana judío kaqkunaman Cristomanta hatun valorniyuq pakasqa kaq allin noticiata willakunaypaq.

⁹ Tukuy imapas unanchaq Diosmi qallariymantapuni kikillanpaq waqaychakusqanta, llapallanman willakunaypaq kunaykuwarqa.

¹⁰ Chaynapim altokunapi atiyniyuqkunapas hinaspa munaychakuqkunapas iñiqkunata hukllamanña huñunasqata qawaspanku yachanqaku Diosninchikqa mana haypay atina yachayniyuq kasqanta.

¹¹ Diosmi ñawpaqmantapuni imam munasqanta Señorninchik Jesucristowan ruwarqa.

¹² Jesucristoman iñiywan hapipakuspallam mana manchakuspa Diosmanqa asuykunchik.

¹³ Chaynaqa, qamkunarayku ñakarisqaywanqa amayá hukmanyaruychikchu, chayqa aswanraq alabakunaykichikpaqmi.

Cristopa kuyakuyninmanta

¹⁴ Chayraykum qonqorakuykuspay Dios Taytanchikta mañakuchkani.

¹⁵ Paymantam lliw ayllukuna hanaq pachapi kaqkunapas chaynataq kay pachapi kaqkunapas sutinkuta chaskinku.

¹⁶ Taytanchiktam mañakuchkani hatu-hatun kayninman hina Espiritunpa atiyninwan sonqoykichikta kallpanchananpaq.

¹⁷ Chaynapim iñisqaykichikman hina Cristoqa sonqoykichikpi yachanqa, hinaptinmi sapichakusqa hinaspa allin cimientasqa hina kuyanakuypi takyankichik.

¹⁸ Chaynapim llapallan iñiqkunawan kuska Cristopa kuyawasqanchikta yachankichik, mayna anchom, mayna largom, mayna ukum hinaspa mayna hatun kasqanta.

¹⁹ Mañakuchkanitaqmi imawanpas mana tupachiy atina Cristopa kuyakuyninta yachanaykichikpaqpas, chaynapi Dioswan huntasqa kanaykichikpaq.

²⁰ Chaynaqa, Diosllatayá hatunchasun, payllam ñoqanchikpiqa atiyninwan ruwan mañakusqanchikmantapas hinaspa piensasqanchikmantapas aswan llimparichkaqtaraq.

²¹ Diosninchikqa Jesucristontakamayá llapallan iglesiakunapi wiña-wiñaypaq hatunchasqa kachun. Amén.