Efesios 2 - Chuya Qellqa 1992

Diospa kuyakuyninraykulla salvasqa kanamanta

¹ Huchaykichikrayku wañusqa hina kachkaptikichikmi Diosqa kawsarichisurqankichik.

² Wañusqa hinaqa karqankichik kay pachapi mana allin ruwaqkunata qatipakuspaykichikmi hinaspa wayrapi mana allin espiritukunapa kamachikusqanta kasukuspaykichikmi. Kunanpas chay mana allin espirituqa Diosta mana kasukuqkunapim munaychakuchkan.

³ Ñawpaqtaqa lliwmi ñoqanchikpas kawsarqanchik mana allin piensasqanchikkunaman hina munasqallanchikpi purikuspa hinaspa aychapa munasqallanta ruwaspa, chayraykum llapa runakunawan kuska castigopaqña karqanchik.

⁴ Aswanqa llakipayakuq Diosmi llumpayta kuyawaspanchik,

⁵ huchanchikrayku wañusqa hina kachkaptinchikpas Jesucristotawan kuskatam kawsariykachiwanchik. Chaynaqa, kuyakuyninraykullam Diosqa salvaykusurqankichik.

⁶ Diosqa Jesucristotawan kuskatam kawsariykachiwanchik, chaynataqmi hanaq pachapipas paywan kuskata tiyaykachiwanchikña.

⁷ Chaynataqa ruwarqa ancha-ancha kuyakuq kasqanta hinaspa mayna kuyawasqanchikta Cristo Jesuswan hamuq tiempokunapi qawachikunanpaqmi.

⁸ Kuyakuyninraykulla iñiptikichikmi Diosqa salvaykusurqankichik, chayqa manam qamkunamantachu aswanqa Diospa mana imallapaq qosusqaykichikmi.

⁹ Salvasqaqa kankichik manam imapas ruwasqaykichikraykuchu, chaynapi mana pipas alabakunanpaq.

¹⁰ Diospa ruwasqanmi kanchik, paymi unanchawarqanchik Cristo Jesuswan huklla kaspa allinkunata ruwananchikpaq, chaykunataqa Diosmi ñawpaqmantaraq ruwarqaña chayman hina kawsananchikpaq.

Cristopa Dioswan allinyanachiwasqanchikmanta

¹¹ Chaynaqa, mana judío kaqkuna, imaynam ñawpaq tiempopi kasqaykichiktayá yuyariychik, qamkunatam “qari kayninpi señalasqa judiokuna, mana señalasqakuna, nispa” nisurqankichik.

¹² Chay tiempokunapiqa Cristomanta karunchasqa kaspam Israel ayllumantapas rakisqa karqankichik, manam yacharqankichikchu pactota ruwaspan Diospa prometekusqantapas. Kay pachapim mana Diosniyuq hinaspa mana paypi suyaspa kawsarqankichik.

¹³ Kunanmi ichaqa Jesucristoman hukllawasqaña kachkanchik yawarnin chaqchusqanrayku. Qamkunam ñawpaqtaqa karupi karqankichik, kunanmi ichaqa hichpallanpiña kachkankichik.

¹⁴ Cristollam hawkayay apamuwaqninchikqa, paymi rakiwaqninchik perqata tuñirachispan judiokunatawan mana judío kaqkunata hukllawaruwanchik.

¹⁵ Judiokunaman ñawpaq leykuna qosqantam, Señorninchik Jesucristo wañuspan mana valeqpaqña ruwarun, chaynapim judiokunatapas hinaspa mana judío kaqkunatapas kikinmanña asuykachispan musoq ayllutaña ruwarun. Chaynatam paykunamanqa hawkayayta qorqa.

¹⁶ Cristom cruzpi wañusqanwan Dioswan allinyanachispan iskaynin llaqtakunata hukllamanña huñururqa, chaynataqa ruwarqa cheqninakusqankuta pasaypaqta chinkachispanmi.

¹⁷ Cristom hamuspan hawkayay allin noticiata willasurqankichik, Diosmanta karupi kaqkunamanpas chaynataq hichpapi kaqkunamanpas.

¹⁸ Chaynaqa, Cristontakamallam judío kaspapas mana judío kaspapas kikin Espiritupa yanapasqanmi Dios Taytamanqa asuykunchik.

¹⁹ Qamkunaqa manam huklaw llaqtayuq hinañachu kankichik nitaq huklaw llaqtayuq hinañachu, qamkunaqa Diosllapaqña kawsaqkunapa llaqtamasinñam hinaspa Diospa ayllunñam kankichik.

²⁰ Qamkunaqa apostolkunapa hinaspa profetakunapa hawanpi perqasqa wasi hinam kankichik, chay cimientopa esquinanpi hapiq rumiñataqmi kikin Jesucristo.

²¹ Paypim chay wasiqa allin hatarichisqa kachkan, chaynapi Señorpaq sapaqchasqan templo kanankukama.

²² Cristopim qamkunapas perqasqa hina paywan hukllawasqa kachkankichik, chaypim Diosqa Espirituntakama yachachkan.