Daniel 8 - Chuya Qellqa 1992

Carnerotawan chivatota revelacionninpi Daniel rikusqanmanta

¹ Kimsa wataña rey Belsasar munaychakuchkaptinmi ñoqa Daniel punta revelacionniypa qepanta huk revelaciontawan rikurqani.

² Chay revelacionniypim reypa yachanan Susa llaqtapi kachkasqani, chay llaqtaqa Elam lawpim kachkan; chaypim Ulai mayupa patanpi kachkasqani.

³ Qawarispaymi mayupa patanpi huk carnerota rikururqani, chay carneroqa iskay waqrayuqmi kasqa. Chay waqrankuna hatunkama kachkaptinpas huknin waqram hukninmantaqa aswan hatun kasqa. Chay hatun waqraqa huknin waqranpa qepantañam wiñaramurqa.

⁴ Qawachkaptiymi chay carneroqa intipa seqaykunan lawman, norte lawman hinaspa sur lawman takarqa; manam ima animalpas chay carneropa ñawpaqninpiqa sayayta atirqachu, manataqmi pipas paypa atiyninmantaqa librakuyta atirqachu. Munasqanman hina imatapas ruwaspanmi aswan-aswan hatunyarqa.

⁵ Chay rikusqaypi yuyaymanachkaptiymi intipa seqaykunan lawmanta, pampatapas manaña saruykuspan altollantaña huk chivato pawamuchkasqa. Chay chivatoqa kasqa iskaynin ñawinkunapa chawpinpi huk hatun waqrayuqmi.

⁶ Chay chivatom, mayu patanpi rikusqay iskay waqrayuq carneropa kasqanman piñasqallaña kallpamuspan tukuy kallpanwan waqraparurqa.

⁷ Waqrapaspanmi chay carneropa iskaynin waqranta pakirurqa, hinaspanmi chay carnerota pampaman choqaruspan saruparurqa. Manam pipas chay chivatomanta carnerota libraykunanpaq karqachu; chaynapim chay carneroqa chivatopa ñawpaqninpi manaña sayayta atirqachu.

⁸ Chay chivatom aswan atiyniyuq rikurirurqa, chayna atiyniyuqllaña kachkaptinmi hatun waqran pakikururqa, hinaptinmi chay waqrapa rantinpi tawa waqrakunaña wiñaramurqa, chay tawa waqrakunaqa tawa lawmanmi qawarqa.

⁹ Huknin waqramantam huk taksa waqracha wiñaramurqa, chay waqracham sur lawman llumpayllataña wiñarurqa, wiñarurqataqmi intipa qespimunan lawmanpas chaynataq sumaq allpa lawmanpas.

¹⁰ Cielokunapi chaskakunapa kasqankamam llumpayta wiñarurqa, hinaspam wakin chaskakunata pampakama wichirichimuspa saruparqa.

¹¹ Chaskakunapa kamachiqninpa contranpi hatunchakuruspanmi, Diosman sapa punchaw ofrecesqanku ofrendatapas qechurachirqa, santuariotapas millakuypaqtam ruwarunqa.

¹² Mana kasukusqanraykum Diospaq sapaqchasqa tropakunapas hinaspa sapa punchaw Diosman ofrecesqanku ofrendakunapas paypa makinmanña churasqa karqa, cheqap kaqkunatapas pampakunamanraqmi wikaparqa, tukuy ima ruwasqanpipas payqa allinpunim lloqsirqa.

¹³ Uyarichkaptiymi huk chuya angelñataq angelmasinta kaynata tapurqa: ¿Haykapikamataq kay qawachisqa kaqkuna kanqa? ¿Haykapikamataq Diosman sapa punchaw ofrenda qoy michakusqa kanqa? ¿Haykapikamataq kay mana kasukusqankurayku purmachisqa kaqkuna kanqa? ¿Haykapikamataq paypa makinman Diospa santuarionpas qosqa kanqa? ¿Haykapikamataq sarupasqa chay chaskakunapas kanqa? nispa.

¹⁴ Hinaptinmi huknin angelñataq nirqa: Waranqa pachak pichqa chunka punchawkuna pasanankamam chay ofrendakunaqa mana ofrecesqachu kanqa tutaykuytapas nitaq achkiykuytapas, chaymantañam Diospa santuarionqa huktawan chuyanchasqa kanqa, nispa.

¹⁵ Ñoqa Danielmi chay revelacionniypi qawasqay kaqkuna yachaykuyta munaspa yuyaymanachkarqani. Qonqaymantam runaman rikchakuq ñoqapa ñawpaqniypi rikurirurqa.

¹⁶ Chaymi uyarirqani Ulai mayupa patanmanta kayna qaparimuqta: ¡Gabriel, chay runaman willay kay visionpa imam ninanta! nispa

¹⁷ Chaynapim payqa ñoqapa kasqaykama asuykamuwarqa, chaymi manchakuyllawanña qonqoranpa kumuykuptiy niwarqa: “Runapa churin, kay imam qawasqaykiqa tukupay tiempokunapaqmi”, nispa.

¹⁸ Rimapayawachkaptinmi pampaman pakchanpa mana musyakuqña wichiykurqani, chaymi sayarichiwaspan

¹⁹ niwarqa: Kunanmi willasqayki tukupay tiempokunapi imaynam Diospa piñakuynin kananmanta.

²⁰ Chay iskay waqrayuq carnero rikusqaykiqa Media nacionpa hinaspa Persia nacionpa reyninkunam.

²¹ Chay chivatoñataqmi Grecia nacionpa reynin, chay iskaynin ñawinkunapa chawpinpi kaq waqranñataqmi Grecia nacionpa punta kaq reynin.

²² Rikurqankitaqmi imaynam chay punta kaq waqran pakiruptin chaypa, rantinpi tawa waqrakunaña wiñaramusqantapas. Chay waqraqa huk munaychakuymi, chaymantam tawa kamachikuqkuna lloqsimunqaku, paykunaqa manam punta kaq munaychakuq hina ancha atiyniyuqchu kanqaku.

²³ Chay tawa kamachikuqkunapa munaychakuynin tukuykuchkaptinmi, chaynataq mana kasukuqkunapa tukuy mana allin ruwasqanku pasaypaqña rikuriruptinmi, llumpay hatun tukuq hinaspa sakri-sakri rey hatarimunqa.

²⁴ Chay reyqa llumpay atiyniyuqmi rikurirunqa, ichaqa manam kikinpa atiyninraykuchu chaynaqa kanqa; payqa admirakuypaqtam tukuy imatapas purmachinqa, tukuy ima ruwasqanpipas allinpunim lloqsinqa, atiyniyuq runakunatam wañuchinqa, Diospa llaqtantapas wañuchinqam.

²⁵ Sakrillaña kasqanraykum runakunata llumpayta engañanqa. Sonqonpi hatunchakuspanmi hawka kawsakuqkunatapas achkallataña wañuchinqa. Payqa kamachikuqkunapa kamachiqninpa contranpim hatarinqa, aswanqa vencesqam kanqa, ichaqa manam runakunapa atiyninwanchu.

²⁶ Chay kimsa wata partenpi imakunam pasananmanta rikusqaykiqa cheqappunim. Chay rikusqaykimantaqa amam pimanpas willakunkichu, chayqa unay watakunamantañam cumplikunqa.

²⁷ Ñoqa Danielmi eqoyaruspay achka punchawkuna onqorurqani, chaymantañam allinyaykuspay reypa kaqninkunata huktawan ruwarqani, ichaqa chay imam rikusqaykunawanmi muspaypi hina tarikurqani, chayqa karqa mana entiendey atinam.