Daniel 6 - Chuya Qellqa 1992

Leonkunapa uchkuman Danielta wischuykusqankumanta

¹ Rey Dariom tantearuspan munaychakuyninpi pachak iskay chunka kamachikuqkunata churarurqa.

² Chay kamachikuqkunapa hawanpiñataqmi kimsa kamachiqninkunata churarqa, reypa imapas ruwasqankuna allin lloqsinanpaq. Chay kimsa kamachikuqkunapa hukninmi karqa Daniel.

³ Danielqa wakin kamachikuqkunamantapas chaynataq llapallan gobernadorkunamantapas ancha reqsisqam rikurirurqa, admirakuypaq espirituyuq kasqanrayku. Chaymi reyqa tantearurqa, lliw munaychakuyninpi kamachikunanpaq Danieltaña churaruyta.

⁴ Chayraykum kamachikuqmasinkunapas hinaspa lliw gobernadorkunapas Danielpa pantasqanta maskarqaku chayman hina acusanankupaq, ichaqa manam ima pantaytapas tarirqakuchu; Danielqa imatapas yachaywanmi ruwarqa.

⁵ Chayraykum chay runakuna ninakurqaku: Danieltaqa manam imamantapas acusayta atichwanchu, acusaspaqa acusachwan Diosninpa leyninkunaman hinallam, nispanku.

⁶ Chaymi Danielpa kamachikuqmasinkunawan gobernadorkuna reypa kasqanman rispa nirqaku: Wiñaypaq kawsakuq rey Darío,

⁷ munaychakuynikipi tarikuq kamachikuqkuna, capitankuna, consejaqnikikuna hinaspa lliw gobernadorkunam tanteanakuruniku huk kamachikuyta decretaspa cumplichinaykipaq: “Kimsa chunka punchaw ama pipas huk diostaqa nitaq huk runatapas mañakuchunkuchu, mañakuspaqa mañakuchunku qam reynillaykuta. Pipas chayta mana kasukuqqa leonkunapa kasqan uchkuman wischusqa kachun.

⁸ Chaynaqa, reynillayku, kikikipuni decretaykuspa firmaykuy, chaynapi Persia nacionpa hinaspa Media nacionpa leyninman hina mana yanqachasqa kananpaq”, nispanku.

⁹ Chaynapim rey Darioqa chay decretota firmaykurqa.

¹⁰ Chay decreto firmasqa kasqanta Daniel yacharuspanmi wasinman rispan cuartonpa Jerusalén lawman qawaq ventanankunata kichaykurqa. Hinaspam qonqoranpa kimsa kutikama sapa punchaw Diosninta mañakuspan graciasta qorqa, imaynam ñawpaqta ruwasqanta hina.

¹¹ Hinaptinmi cheqniqnin runakuna huñunakuruspanku Danielta tarirurqaku wasinpi Diosninta mañakuchkaqta hinaspa yupaychachkaqta.

¹² Chaymi utqayman kallpaspanku decretasqanmanta reyta nimurqaku: Reynillayku, qanmi huk kamachikuyta firmaspa decretarqanki: “Kimsa chunka punchaw ama pipas huk diostaqa nitaq huk runatapas mañakunankupaq, mañakuspaqa qamllata mañakusunaykipaq, pipas mana chayta kasukuqqa leonkunapa kasqan uchkuman wischuykusqa kanankupaq. Reynillayku ¿chaynachu icha manachu?” nispanku. Hinaptinmi rey nirqa: Arí, chaynapunim, chay decretasqayqa Mediapa chaynataq Persiapa kamachikuyninkunaman hinaqa mana yanqachay atinam, nispa.

¹³ Chaymi paykuna nirqaku: Reynillayku, Judá nacionmanta presokunawan hamuq Danielqa manam manchakusunkichu, nitaqmi kamachisqayki decretotapas kasukunchu, aswanqa sapa punchawmi kimsa kutita Diosninta mañakun, nispanku.

¹⁴ Chayta rey Darío uyariykuspanmi llumpayta llakikururqa, hinaspam inti seqaykunankama, tukuy imata ruwaspa Danielta librananpaq yuyaymanarqa.

¹⁵ Ichaqa chay runakunam reypa qayllanman kutispanku yapamanta nirqaku: Reynillayku, qamqa sumaqtam yachanki Mediapa, Persiapa leyninkuman hinaqa ima kamachikuypas, decretopas, reypa firmasqanña kaspaqa manaña yanqachay atina kasqantaqa, nispanku.

¹⁶ Chaymi reyqa pusachimurqa Danielta, leonkunapa kasqan uchkuman wischuykunankupaq. Manaraq wischuykuchkaptinkum Danielta rey nirqa: Mana samaykuspa servisqayki Diosnikiyá qamta librasunki, nispa.

¹⁷ Danielta wischuykuspam hatun rumiwan leonkunapa uchkunta wichqarurqaku, reypas anillonwanmi chay rumita sellaykurqa, sellaykurqakutaqmi ancha reqsisqa kamachikuqkunapas, chaynapi Danielpa contranpi tanteasqanku mana yanqachasqa kananpaq.

¹⁸ Reyñataqmi palacionman kutispan cenaytapas mana munarqachu, uywanakusqan warmikunatapas manam pusachimurqachu, hinaspam chay tutaqa puñuytapas mana tarirqachu.

¹⁹ Achikyaramuptinmi hatariruspan leonkunapa kasqan uchkuman kallparqa.

²⁰ Chayaruspanmi llakillawanña Danielta qayarqa: Kawsaq Diospa serviqnin Daniel, mana samaspa servisqayki Diosniki ¿yaqachu leonkunamanta libraykusunki? nispan.

²¹ Hinaptinmi Daniel nimurqa: Wiñaypaq kawsakuq reynilláy,

²² Diosniymi angelninta kachamuspan leonkunapa siminta wichqarurqa mana imanawananpaq. Diosqa yachanmi mana huchayuq kasqayta chaynataq qayllaykipipas ima mana allintapas mana ruwasqayta, nispa.

²³ Chaymi reyqa anchallataña kusikuspan kamachikurqa, Danielta leonkunapa uchkunmanta hurqomunankupaq. Hurqoruspa qawaptinkum mana ima heridallanpas kasqachu, Diosninpi hapipakusqanrayku.

²⁴ Chaymantam rey kamachikuptin, Daniel acusaq runakunata pusamurqaku, hinaspam warmintinta churintinta wischuykurqaku leonkunapa kasqan uchkuman, hinaptinmi manaraqpas pampaman chayaykuchkaptinku leonkuna pawaykuspa tisaparurqa, llapallan tullunkupas chamchakunankama.

²⁵ Chaymi rey Darío huk cartata llaqtakunaman, nacionkunaman, tukuy rikchaq rimayniyuqkunaman kayna niqta apachirqa: Ñoqa rey Dariom munachkani hawkalla tarikunaykichikta.

²⁶ Munaychakusqaypi llapallan runakunatam decretaspay kamachimuykichik Danielpa Diosninta manchakuywan kasukunaykichikpaq. Payqa kawsaq Diosmi, wiñaypaq takyaq Diosmi, kamachikuyninpas mana haykapipas tukuqmi, munaychakuyninpas mana haykapipas puchukaqmi.

²⁷ Paymi salvaqninchikpas chaynataq libraqninchikpas, kay pachapipas hanaq pachapipas payllam milagrokunata ruwan, payllataqmi Danieltapas libraykun leonkunapa mikusqan kananmanta.

²⁸ Danielqa ancha reqsisqam karqa rey Dariopa munaychakuyninpipas chaynataq Persia nacionniyuq rey Ciropa munaychakuyninpipas.