Daniel 5 - Chuya Qellqa 1992

Perqapi qellqa rikurirusqanmanta

¹ Rey Belsasarmi munaychakuyninpi waranqa yanapaqninkunapaq hatun convidota ruwarqa, hinaspam paykunawan kuska vinota upyakurqaku.

² Vinota upyachkaspanmi Belsasar kamachikurqa Jerusalenpi templomanta abuelon Nabucodonosorpa apamusqan qorimanta qollqemanta vasokunata apamunankupaq; aparamuptinkum rey Belsasarqa, reqsisqa runankunawan, warminkunawan hinaspa churiwachankunawan vinota upyakurqaku.

³ Chaynapim Jerusalén llaqtapi Diospa templonmanta saqueamusqanku qorimanta vasokunata apamurqaku. Chay vasokunapim reyqa reqsisqa runankunawan, warminkunawan hinaspa churiwachankunawan vinota upyakurqaku.

⁴ Llapallanku vinota upyakuspankum qorimanta, qollqemanta, broncemanta, fierromanta, kullumanta hinaspa rumimanta idolonkunata hatuncharqaku.

⁵ Hinaptinmi qonqaymanta huk maki rikuriruspan candeleropa chimpanpi estucasqa perqapi qellqayta qallaykurqa. Chayta rikuruspanmi

⁶ reyqa llumpayta hukmanyarurqa, manchakuymantam umanmanta chaki pampankama katkatatarqa.

⁷ Chaymi qaparispan qayachirqa qawaqkunata, Caldeapi yachayniyuqkunata hinaspa adivinaqkunata. Paykunatam nirqa: Wak qellqata leey atiqqa chaynataq imam ninanta willaykuwaqniyqa sumaqllaña grosella pachawan pachachisqam kanqa, kunkanmanpas qorimanta collarwanmi wallqachisaq, munaychakuyniypipas payqa kimsa kaq kamachikuqmi kanqa, nispa.

⁸ Chaynapim reyta serviq yachayniyuq runakunaqa reypa ñawpaqninman hamurqaku, ichaqa manam mayqanninkupas chay qawasqanku qellqa leeyta atirqakuchu, manataqmi chaypa imam ninan kasqantapas reyman willayta atirqakuchu.

⁹ Rey Belsasar llumpayta mancharikuptinmi uyanpas ayayarurqa. Ancha reqsisqa kamachikuqkunapas manam ima ruwakuytapas atirqakuchu.

¹⁰ Reypa qaparisqantawan ancha reqsisqa runakunapa qaparisqanta reina uyariruspanmi, chay convido salaman yaykuspan nirqa: Wiñaypaq kawsakuq rey, amayá mancharikuychu, nitaq uyaykipas ayayachunchu.

¹¹ Kay munaychakusqayki nacionpiqa kachkanmiki chuya dioskunapa espiritunpa huntaykusqan runa. Abueloyki rey Nabucodonosorpa tiemponpim chay runaqa dioskuna hina allin yachayniyuq chaynataq allin yuyayniyuq kasqanta qawachikurqa. Chayraykum abueloyki Nabucodonosorqa payta churarurqa layqakunapa, qawaqkunapa, Caldeapi kaq yachayniyuqkunapa hinaspa adivinaqkunapa kamachiqnin kananpaq.

¹² Sutinmi Daniel, paytam Beltsasarwan abueloyki suticharqa, payqa kachkan admirakuypaq espirituyuqmi, yachaypapas hinaspa yuyaypapas huntaykusqanmi; yachantaqmi mosqoykunapa chaynataq sasa entiendena watuchikunapa imam ninantapas. Payqa sasachakuykuna allichaytapas atinmanmi. Chaynaqa, Danieltayá qayamuychik, paymi chay qellqapa imam ninantaqa willasunkichik, nispa.

¹³ Qayllanman Danielta pusaruptinkum rey tapurqa: ¿Qamchu kachkanki abueloy Nabucodonosorpa Judá nacionmanta preso pusamusqan Daniel?

¹⁴ Uyarirqanim dioskunapa espiritunwan huntasqa kasqaykita hinaspa ancha yuyayniyuq chaynataq llumpay yachayniyuq kasqaykitapas.

¹⁵ Ñoqam pusachimurqani ancha yachayniyuq runakunatawan layqakunata, wak qellqata leespanku imam ninanta willawanankupaq, ichaqa manam atinkuchu, nitaqmi imam ninantapas yachankuchu.

¹⁶ Qanmantam ichaqa uyarirqani tukuy imakunapapas imam ninan willakuy atisqaykita chaynataq ima sasallaña kaqtapas allichay atisqaykita. Chaynaqa, sichum wak qellqata leeykuspa imam ninanta niykuwaptikiqa sumaqllaña grosella pachawanmi pachachisqayki, kunkaykimanpas qorimanta collartam wallqachisqayki, munaychakuyniypipas kimsa kaq kamachikuq kanaykipaqñam churasqayki, nispa.

¹⁷ Hinaptinmi reyta Daniel nirqa: Regaloykikunaqa hina qampaq kachun, premio qowanaykitapas hukman qoykuy. Chaywanpas reynilláy, ñoqaqa wak qellqata leeykuspaymi imam ninantapas willaykusqayki.

¹⁸ Tukuy imapa hawanpi munaychakuq Diosmi, taytayki Nabucodonosorta nacionkunapi munaychakunanpaq, hatunchasqa kananpaq hinaspa reqsisqa kananpaq churarqa.

¹⁹ Chaynata hatuncharuptinmi lliw nacionkunapi runakunapas, huk rikchaq rimayniyuqkunapas, katkatataspa payta manchakurqaku, chaynapim runakunataqa munasqanman hina wañurachiqpas otaq kawsachiqpas, hatuncharuqpas otaq usuchiqpas.

²⁰ Aswanqa hatun tukuruspa sonqonpi hoqarikuruptinmi rey kayninmantapas wischururqa, qechururqataqmi reqsisqa kaynintapas.

²¹ Paytaqa runakuna ukumanta wischuruptinkum animal hinaña rikurirurqa, hinaspam purun asnokunawan kawsaspa torokunawan kuskaña pastota mikurqa, cuerpontapas sullam nuyurqa. Chaynam tarikurqa, tukuy imapa hawanpi munaychakuq Diospa llapallan runakunapa kamachikuyninpi munaychakusqanta reqsikunankama, reqsikurqataqmi chay kamachikuykunataqa munasqanman hina pimanpas Dios qosqantapas.

²² Chaynaqa, Nabucodonosorpa miraynin rey Belsasar, qampas chaykunata yachachkaspaykim mana uchuychakurqankichu.

²³ Aswanraqmi qamqa hanaq pachapi kaq Diospa contranpi hoqarikurqanki. Templonpi vasokunata aparachimuspaykim ancha reqsisqa runaykikunawan, warmikikunawan hinaspa churiwachaykikunawan, chay vasokunapi vinota upyakuchkankichik. Hinaspam qollqemanta, qorimanta, broncemanta, fierromanta, kullumanta, rumimanta idolokunata yupaycharqanki. Chay idolokunaqa mana qawakuqmi, mana uyarikuqmi hinaspa mana ima musyaqmi. Kawsachisuspayki tukuy ruwasqaykita nanachikuq Diostam ichaqa mana yupaycharqankichu.

²⁴ Chayraykum paypuni wak qellqaq makitaqa kachamurqa.

²⁵ Wak qellqaqa nichkan: “MENE, MENE, TEKEL, UPARSIN”, nispam.

²⁶ Wak qellqapa imam ninanqa kaymi: MENE ninanqa: Diosmi munaychakuynikipa punchawninta yupaspan puchukarachin, ninanmi.

²⁷ TEKEL ninanqa: Balanzapi pesasuptikim qamqa mana llasaqña kachkanki, ninanmi.

²⁸ PARSIN ninanqa: Munaychakuynikim iskayman rakinasqa kaspan Media lawpi hinaspa Persia lawpi kaqkunamanña qosqa kanqa, ninanmi.

²⁹ Chaynata Daniel willaykuptinmi, rey Belsasar kamachikurqa sumaqllaña grosella pachawan Danielta pachachinankupaq chaynataq qorimanta collarwanpas wallqachinankupaq, hinaspam Danielqa munaychakuyninpi kimsa kaq kamachikuq kasqanta llapallanman willachimurqa.

³⁰ Chay tutallam Caldeapa reynin Belsasarta wañurachirqaku.

³¹ Hinaptinmi Media lawmanta kaq rey Darioña munaychakururqa. Darioqa soqta chunka iskayniyuq watanpim kachkarqa.