Daniel 2 - Chuya Qellqa 1992

Rey Nabucodonosorpa mosqoyninmanta

¹ Iskay wataña munaychakuchkaspanmi rey Nabucodonosor mosqokururqa, chayraykum sonqon hukmanyaruptin manaña puñuytapas atirqachu.

² Hinaspam layqakunata, qatipaqkunata, qawaqkunata qayachirqa, qayachirqataqmi Caldea runakunamanta yachayniyuqkunatapas; chaynapim paykunaqa reypa qayllanman hamurqaku.

³ Hinaptinmi paykunata rey nirqa: Mosqorusqaypa imam ninanta mana yachaspaymi hukmanyasqa kachkani, nispa.

⁴ Chaymi Caldeamanta kaq yachayniyuqkuna Aram law rimayninkuman hina reyta nirqaku: Wiñaypaq kawsakuq reynillayku, imam ninanta willaykunaykupaqyá mosqosqaykita willaykuwayku, nispanku.

⁵ Chaymi rey nirqa: Ñoqaqa ñam tantearuniña; sichum mosqosqaytapas nitaq imam ninantapas mana willawaspaykichikqa tisapasqam kankichik, wasikichikpas ispakuna raqayñam rikurirunqa.

⁶ Mosqorusqaytawan imam ninanta willaykuwaptikichikmi ichaqa hatunchaspay regalokunata qosqaykichik, qamkunataqa ancha reqsisqatam ruwasqaykichik; chaynaqa imam mosqosqaytawan imam ninanta willaykuwaychik, nispa.

⁷ Chaymi paykuna yapamanta reyta nirqaku: Reynillayku, qamyá niykuwayku imam mosqorusqaykita, hinaptinqa imam ninantapas willaykusqaykikum, nispanku.

⁸ Reyñataqmi nirqa: Ñoqaqa yachanipunim qamkunaqa tiempo pasachiy munasqaykichikta, qamkunaqa imam tanteasqaytapas yachankichikñam.

⁹ Imam mosqorusqayta mana willawaptikichikqa llapallaykichikpaqmi huk castigolla kachkan, qamkunaqa tiempo pasarunanta munaspam llullakunata hinaspa yanqakunata niwanaykichikpaq tanteanakuchkankichik. Chaynaqa, imam mosqorusqayta niwaychik, chaynapim mosqoyniypa imam ninanta willaway atinaykichiktapas yachasaq, nispa.

¹⁰ Chaymi reyta Caldeamanta kaq yachayniyuqkuna nirqaku: Kay pachapiqa manam pipas kanchu qam reyniykupa mañakusqanta willakuy atiq runaqa, kunankamaqa manataqmi ima reypas, maynaña hatun kaspa otaq maynaña atiyniyuq kaspapas mañakusqaykita hinaqa, ima layqatapas, qawaqtapas nitaq Caldea lawpi yachayniyuqkunatapas mañakurqachu.

¹¹ Reynillayku, qampa mañakusqaykiqa ancha-ancha sasallañam, manam chaytaqa pipas willasunkimanchu. Atispaqa atinman dioskunallam, paykunaqa manam runakunawanchu yachanku, nispa.

¹² Chayta uyariykuspanmi reyqa llumpayta piñakururqa, hinaspam kamachirqa Babilonia nacionpi llapallan yachayniyuq runakunata wañuchinankupaq.

¹³ Chaynata rey kamaykachikamuptinmi Danieltawan kimsan amigonkunatapas wañurachinankupaq maskarqaku.

Reypa mosqoyninta Daniel willakusqanmanta

¹⁴ Reyta waqaychaq soldadokunapa capitannin Ariocmi, Babiloniapi yachayniyuq runakunata wañuchinanpaq lloqsirqa. Ichaqa Danielmi yachaywan sumaqta rimaspan

¹⁵ Ariocta tapurqa: ¿Imaynanpitaq reyqa utqayllaman kay kamachikuyta hurqoramun? nispa. Hinaptinmi Arioc imam pasakusqanmanta Danielman willarqa.

¹⁶ Chaymi reypa qayllanman Daniel yaykuspan mañakurqa suyaykunanpaq, chaynapi reypa mosqorusqantawan imam ninanta willaykunanpaq.

¹⁷ Wasinman kutiruspanmi Danielqa imam pasakusqanmanta Ananiasman, Misaelman hinaspa Azariasman willarqa,

¹⁸ chay pakasqa kaqkunamanta hanaq pacha Diospa yanapakuyninta mañakunankupaq; chaynapi Babilonia nacionpi wakin yachayniyuqkunatawan kuskata mana wañurachinankupaq.

¹⁹ Chay tutam Diospuni Danielman revelacionpi chay pakasqa kaqkunata qawachirqa, chaymi Danielqa hanaq pacha Diosta

²⁰ kaynata yupaycharqa: Wiñaymanta wiñaykama Diospa sutin bendecisqa kachun. Paymantam hamun tukuy yachaykunapas, paymantataqmi hamun tukuy atiypas.

²¹ Payllam tiempokunatawan punchawkunatapas tikran, payllam reykunata hurqon hinaspa churan, payllam yachayniyuqkunaman yachayta qon, payllataqmi yuyayniyuqmanpas yuyayta qon.

²² Payllam sasa entiendena kaqkunata runakunaman yachachin, pakasqa kaqkunatapas reqsichin. Payqa tutayaypiña kaqkunatapas reqsinmi, achkiypas paywanmi tarikun.

²³ Ñawpaq taytakunapa Diosnin, qanmanmi graciasta qoyki, qamtataqmi yupaychayki; qanmi yachayta qowarqanki, qamtaqmi atiytapas qowarqanki. Kunanmi imam mañakusqaykuta reqsiykachiwankiku, kunanmi reypa mosqorusqanta yachaykachiwankiku.

²⁴ Chaymantam Daniel rirqa Ariocwan rimaq. Paytam rey kamachirqa Babilonia nacionpi llapallan yachayniyuq runakunata wañuchinanpaq. Danielmi payta nirqa: Amayá wañuchiychu Babilonia nacionpi yachayniyuq runakunataqa. Ñoqatayá reyman pusaruway mosqoyninpa imam ninanta willamunaypaq, nispa.

²⁵ Hinaptinmi utqayman Arioc pusarqa Danielta rey Nabucodonosorpa ñawpaqninman hinaspam kaynata nirqa: Reynilláy, Judá nacionmanta preso hamuqkuna ukupim tariramuni mosqorusqaykipa imam ninantapas willakuyniki atiqta, nispa.

²⁶ Hinaptinmi Beltsasar sutiyuq Danielta rey tapurqa: ¿Yaqachum imam mosqorusqaytawan imam ninanta willaykuwankiman? nispa.

²⁷ Chaymi Daniel nirqa: Chay pakasqa kaqkuna mosqorusqaykitaqa manam willayta atisunkimanchu yachayniyuq runakunapas, qawaqkunapas, layqakunapas, qatipaq runakunapas.

²⁸ Ichaqa kachkanmi hanaq pachapi Dios, payllam kayna pakasqa kaqkunataqa reqsichin, hinaspam qanmanpas reynilláy Nabucodonosor hamuq punchawkunapi imam pasakunanmanta reqsichisunki. Ñoqam mosqoynikipi visión chaskisqaykita willasqayki.

²⁹ Reynilláy, qanmi camaykipi kachkaspayki hamuq punchawkunapi imam pasakunanmanta yuyaymanachkarqanki, hinaptinmi pakasqa kaqkunata reqsichiq qanman willasurqanki.

³⁰ Chay pakasqa kaqkunataqa ñoqamanpas qawachiwarqam; chaytaqa qawachiwarqa manam llapallan kawsaq runamantapas aswan yachayniyuq kasqayraykuchu, chaytaqa qawachiwarqa chay mosqorusqaykipa imam ninanta qanman willanaypaqmi chaynataq tukuy imam yuyaymanasqaykita yachanaykipaqmi.

³¹ Reynilláy, mosqoynikipim qawarqanki ñawpaqnikipi sayachkaqta hatunkaray kancharichkaq runa kaqllata hinaspa mancharikuypaq rikchayniyuqta.

³² Umanmi kasqa qorimanta, qasqonwan brazonkunañataqmi qollqemanta, wiksanmanta siki chakankamañataqmi kasqa broncemanta.

³³ Piernankunañataqmi kasqa fierromanta, chakinkunañataqmi kasqa fierrowan mituwan taqrusqa.

³⁴ Qawachkaptikim huk rumi kikillanmanta kururakamuspan chay runaman rikchakuqpa fierromanta mitumanta taqrusqa chakinpi hapirurqa, hinaspam ñutururqa.

³⁵ Chaynapim chay fierropas, kañasqa mitupas, broncepas, qollqepas hinaspa qoripas lliw ñutu allpa hinallaña rikurirurqa; cosecha tiempopi wayrapa apasqan erapi tamo hinallañam rikurirurqa, chaynapim maypi kasqanpas manaña yachakurqachu. Chay runa kaqlla sayaqta ñuturuq rumim ichaqa kay pachapas huntaykuyta hatu-hatun orqoman tikrakururqa.

³⁶ Chaynatam reynilláy mosqorqanki. Kunanñataqmi willasqayki chaypa imam ninanta.

³⁷ Reynilláy, qamqa kanki reykunapapas reyninmi, hanaq pacha Diosmi qosurqanki nacionkunata munaychakuspa atiywan kamachinaykipaq chaynataq ancha reqsisqa kanaykipaq.

³⁸ Qosurqankitaqmi tukuy hinastinpi runakunatapas, animalkunatapas hinaspa alton pawaqkunatapas, chaykunapi munaychakunaykipaq. Reynilláy, chay sayaqpa qorimanta umanqa qanmi kanki.

³⁹ Qampa qepaykitam huk rey hatarimunqa, ichaqa kamachikuyninmi qampamanta menoslla kanqa, chaypa qepantañataqmi bronceman rikchakuq kimsa kaq munaychakuq hatarimunqa, hinaspam tukuy kay pachapi munaychakunqa.

⁴⁰ Chaymantañataqmi tawa kaq munaychakuq hatarimunqa fierro hina fuertellaña. Imaynam fierroqa tukuy imata pakipaspan ñutun, chaynam paypas wakin munaychakuykunata pakipaspan ñutupanqa.

⁴¹ Reynilláy, rikurqankitaqmi chay sayaqpa chakinkuna hinaspa dedonkuna mitumanta parten, partenñataq fierromanta kasqantapas, chayqa chay munaychakuypa rakinasqa kananmantam nichkan; chaywanpas chay munaychakuypa partenqa kanqa fierro hina allin takyaqraqmi, qamqa fierrowan taqrunasqa mitutam rikurqanki.

⁴² Imaynam chay sayaqpa chakinpa dedonkuna wakin karqa fierromanta wakinñataq kañasqa mitumanta, chaynam chay munaychakuypas wakin kanqa allin takyaq, wakinñataq pisi atiyniyuqlla.

⁴³ Reynilláy, qanmi fierrowan mitu chaqrusqata rikurqanki, chaynam chay munaychakuypiqa runakunapas taqrunakunqaku, ichaqa imaynam fierrowan mitu mana laqanakunchu chaynam runakunapas mana hukllawanakunqachu.

⁴⁴ Chay reykuna munaychakuchkaptinkum hanaq pacha Dios hatarichinqa wiñaypaq mana tuñichiy atina munaychakuyta, chay munaychakuypa hawanpiqa manam hukqa munaychakunqachu. Aswanqa chay munaychakuymi llapallan munaychakuykunata ñutupaspan wiña-wiñaypaq takyanqa.

⁴⁵ Qamqa reynilláy, rikurqankim orqomanta huk rumi lloqsiramuspan mana pipas kumpaykamuchkaptillan kururakamuspan fierrota, bronceta, kañasqa mituta, qollqeta hinaspa qoritapas ñutuparusqanta. Hatu-hatun Diosmi qanman hamuq punchawkunapi imam pasananmanta qawachisurqanki, chayraykum chay mosqorusqaykiqa cheqap, chaypa imam ninanpas cheqaptaqmi, nispa.

⁴⁶ Chayta rey Nabucodonosor uyariykuspanmi, Danielpa ñawpaqninpi pampakama kumuykuspan kamachirqa Danielman ofrendakunata ofrecenankupaq chaynataq inciensotapas qontichipunankupaq.

⁴⁷ Hinaspam Danielta nirqa: Cheqaptapunipas qamkunapa Diosnikichikmi llapa dioskunapa Diosninqa, payqa reykunapapas Reyninmi, payllataqmi pakasqa kaqkunatapas reqsichin. Chayraykum qamqa kay pakasqa kaqkunata rikuykachiwanki, nispa.

⁴⁸ Danielta llumpayta hatunchaspanmi achkallaña regalokunata rey qorqa, hinaspam Babilonia lawpi gobernador kananpaq, chaynallataq chay nacionpi llapallan yachayniyuq runakunapa kamachiqnin kananpaq churarqa.

⁴⁹ Chaymantam reyta Daniel mañakurqa Sadracpaq, Mesacpaq hinaspa Abed-negopaq, hinaptinmi paykunata Babilonia lawpi kamachikuqkuna kanankupaq rey churarqa; Danielñataqmi reypa palacionpi qeparqa.