Cantares 3 - Chuya Qellqa 1992

¹ Puñunaypim kuyasqayta tutankuna maskarqani, ichaqa maynataña maskaspaypas manam tarirqanichu.

² Chaymi hatarispay, llaqtaman lloqsispa callekunapi, plazakunapi kuyasqayta maskarqani. Ichaqa maynataña maskaspaypas manam tarirqanichu.

³ Llaqta waqaychaq guardiakunatam tapukurqani: ¿Icha kuyakusqayta rikukullawaqchik karqa? nispay.

⁴ Paykunamanta rakikuykuspallaymi ancha kuyasqayta tarirurqani. Makinmanta hapikuruspaymi mamaypa wasinman pusanaykama, wachakuwaqniypa wasinman pusanaykama, mana kachaykurqanichu.

Qarim nin:

⁵ Jerusalenpi sipaskuna, luwichukunaraykuyá, tarukakunaraykuyá, ancha kuyakusqayta ama rikchachinaykichikpaq prometeykuwaychik, kikinmanta rikcharinankamayá hina puñukuchun.

Kimsa kaq taki Takiqkunam ninku:

⁶ ¿Pitaq wak, chunniqmanta qespimuchkan? Qosni hinaraq, mirrapa inciensopa asnayninwan, tukuy rikchaq olorkunawan perfumasqallaña.

⁷ ¡Qawariychik, Salomonpa carretanmi! Israelpa tropakunamanta akllasqa soqta chunka soldadokunapa chawpintam hamuchkan.

⁸ Paykunaqa llapallankum espadayuqkama, llapallankum guerrapi pelamuqkuna. Sapakamam wiqawninpi espada watasqa, tutayaypi imapas kaptin defiendenankupaq.

⁹ Rey Salomonmi Líbano lawpi sachakunamanta carretankunata ruwachikurqa.

¹⁰ Qollqemanta pilarniyuqta, wasan takyachiqtañataq qorimanta, tiyanantañataqmi pukay-pukay telamanta. Chay trononpa ukuntam Jerusalenpi sipaskuna, kuyakuyllawanña pachachirqaku.

¹¹ Sión llaqtapi sipaskuna, lloqsimuychik, rey Salomontayá qawariychik casarakunan punchawpaq sinchi kusikunan punchawpaq mamanpa ruwapusqan coronawan churasqata.