Apocalipsis 9 - Chuya Qellqa 1992

¹ Trompetanta pichqa kaq ángel tocaykuptinmi chaskata rikurqani cielomanta kay pachaman wichiykamuqta, chay chaskam uku pachapa llaventa chaskirqa.

² Chay uku pachata kichaykuptinmi qosniriramurqa hatu-hatun hornomanta hina, chay qosnim intitawan wayrata tutayarachirqa.

³ Chay qosnimanta aqaruway urukuna lloqsiramuspanmi kay pachaman mastarikururqa, chaykunam atiyta chaskirqaku atoq-atoqkuna hina llapa runata kachunanpaq.

⁴ Chaykunam kamachisqa karqaku kay pachapi qorakunata, imapas verde kaqkunata hinaspa sachakunata mana imananankupaq, kamachisqaqa karqa Diospa sellonwan urkunpi mana marcasqa runakunallata kachunanpaqmi.

⁵ Ichaqa manam runakunata wañuchinanpaqchu kamachisqaqa karqaku, aswanqa pichqa killantin kachuspa ñakarichinallanpaqmi. Chay kachusqankupa nanayninqa karqa atoq-atoqpa kachukuynin hinam.

⁶ Chay punchawkunapim runakuna wañuyta maskanqa, ichaqa manam tarinqakuchu, wañuyta munaptinkupas wañuymi paykunamanta ayqekunqa.

⁷ Chay aqaruwaykunaqa kasqa guerrapaq alistasqa caballokuna hinam, umankupim kasqa qorimanta coronakuna hina, uyankuñataqmi kasqa runapa uyan hina.

⁸ Chukchanmi kasqa warmipa chukchan hina, kirunñataqmi kasqa leonpa kirun hina.

⁹ Cuerpon harkaqñataqmi kasqa fierromanta qasqo harkachikuna hinaraq, raprankupa qapariyninñataqmi kasqa caballokunapa aysasqan guerraman riq carretakuna hinaraq.

¹⁰ Chupankuñataqmi kasqa atoq-atoq hina ulluyuq, chaywanmi runakunata ulluspa pichqa killatapuni ñakarichirqa.

¹¹ Chay aqaruway urukunapa kamachiqninqa kasqa uku pachapi munaychakuq angelmi, sutinñataqmi kasqa hebreo rimaypi Abadón, griego rimaypiñataq Apolión, chay sutiqa “chinkachiq” ninanmi.

¹² Punta kaq ¡Ay! nisqanqa pasarunñam; ichaqa iskayraqmi hamuchkan.

¹³ Trompetanta soqta kaq ángel tocaykuptinmi huk qayakuyta uyarirqani. Chay qayakuymi Diospa qayllanpi qori altarpa hawanpi tawa waqrachakunapa chawpinmanta uyarikamurqa.

¹⁴ Chay qaparimuqmi soqta kaq trompetayuq angelta nimurqa: Kachariy Eufrates mayupa patanpi watasqa tawa angelkunata, nispa.

¹⁵ Hinaptinmi chay tawan angelkuna kachaykusqa karqa, chaynapi llapa runakunamanta kimsa kaq partenta wañuchinanpaq. Paykunam chay horapaq, chay punchawpaq, chay killapaq hinaspa chay watapaq preparasqa karqaku.

¹⁶ Uyarirqanitaqmi sillada tropakunapa haykam kasqantapas, paykunaqa kasqa iskay pachak wara-waranqam.

¹⁷ Visionniypim qawachiwarqa caballokunapi silladakunata, paykunaqa kasqaku puka, azul hinaspa qellu colorniyuq qasqo harkachikunawan churasqam. Chay caballokunapa umanqa kasqa leonpa uman hinam, chay caballokunapa siminmantam lloqsimusqa nina, qosni hinaspa azufre.

¹⁸ Runakunapa kimsa kaq partenmi wañururqa chay caballokunapa siminmanta lloqsimuq kimsa castigowan otaq ninawan, qosniwan hinaspa azufrewan.

¹⁹ Chay caballokunapa kallpanqa kasqa siminpiwan chupanpim. Chay chupankunaqa kasqa maqta uru hina umayuqmi, chaywanmi kachukusqa.

²⁰ Chay castigokunamanta lluptiq runakunapas manataqmi wanakurqakuchu mana allinkuna ruwayninkumantaqa. Manam wanakurqakuchu demoniokuna yupaychaymanta nitaq qorimanta, qollqemanta, broncemanta, rumimanta hinaspa kullumanta idolokuna hatunchaytapas. Chay idolokunaqa manam rikukunchu, manam uyarikunchu, manataqmi purinchu.

²¹ Chay runakunaqa manataqmi wanakurqakuchu runakuna wañuchisqankumantapas, layqa ruwasqankumantapas, hukwan-hukwan pierdekusqankumantapas nitaq suwakusqankumantapas.