Apocalipsis 5 - Chuya Qellqa 1992

Rollomantawan Corderomanta

¹ Chay trononpi tiyaqpa alleq lawninpim rikurqani huk rollota hawanpipas ukunpipas qellqasqata hinaspa qanchis sellowan selloykuspa wichqasqata.

² Rikurqanitaqmi huk atiyniyuq angeltapas, paymi qaparispan tapukurqa: ¿Pitaq kay rollota kichananpaq chaynataq sellosqakunatapas paskananpaq hina kanman? nispa.

³ Ichaqa manam hanaq pachapipas nitaq kay pachapipas nitaq uku pachapipas karqachu chay rollota kichaykuy atiqqa nitaq qawaykuqllapas.

⁴ Chaymi ñoqa anchata waqarqani, chay rollota kichananpaq hina chaynataq qawaykunallanpaqpas hina mana pipas kaptin.

⁵ Chaymi huknin anciano niwarqa: Ama waqaychu, leonwan sutichasqa Judá ayllumanta kaq rey Davidpa mirayninmi vencerunña, rollopa qanchis sellonta paskaspa kichananpaq, nispa.

⁶ Hinaptinmi Diospa trononpa chawpinpi hinaspa tawa kawsaqkunapa chawpinpi chaynataq ancianokunapa chawpinpi rikurqani huk Cordero sayachkaqta, payqa maqapasqa hinam kasqa. Chay Corderoqa kasqa qanchis waqrayuqmi hinaspa qanchis ñawiyuqmi. Chay ñawinkunaqa tukuy kay pachaman kachasqa Diospa qanchis espiritunkunam.

⁷ Chay Corderom hamuruspan rollota chaskiykurqa tronopi tiyaq Diospa alleq makinmanta.

⁸ Chay rollota chaskiykuptinñataqmi chay tawan kawsaqkuna iskay chunka tawayuq ancianokunapiwan Corderopa qayllanpi qonqorakuykurqaku. Llapallan ancianokunaqa arpayuqkamam apachkasqaku incienso huntayuq qorimanta copakunata. Chay inciensoqa chuya llaqtanpa Diosta mañakuyninkum.

⁹ Paykunam kay musoq takita takirqaku: “Sellosqa rollota paskaspa kichanaykipaq hinaqa qamllam kanki, Qamqa sacrificasqam karqanki, Diospaqmi yawarnikiwan rantiwarqankiku llapallan runakunapa miraykunamanta, tukuy rikchaq rimayniyuqkunamanta, llaqtakunamanta hinaspa nacionkunamanta.

¹⁰ Diosniykupaqmi munaychakuq sacerdotekunataña ruwawarqankiku, chaymi kay pachapi munaychakusaqku”, nispanku.

¹¹ Rikuruspayñataqmi uyarirqani, trononpa muyuriqninpi achkallaña angelkunapa qapariyninta, chaynallataq kawsaqkunapa hinaspa ancianokunapa qapariyninkutapas. Paykunaqa kasqaku wara-waranqantinmi.

¹² Paykunam qaparispa nirqaku: “Sacrificasqa kaq Corderollam, munaychakuyta, apu kayta, yachayta, kallpata, hatunchasqa kayta, qapaqchasqa kayta, chaynataq yupaychasqa kayta chaskinanpaq hinaqa”, nispanku.

¹³ Hanaq pachapi, kay pachapi, uku pachapi hinaspa lamar qochapi kaqkunata tukuy ima unanchasqankunapa kayna nisqantam uyarirqani: “Trononpi tiyaqwan chaynataq Corderoyá wiña-wiñaypaq qapaqchasqa, yupaychasqa, hatunchasqa, chaynataq atiyniyuqpaq hapisqa kachun”, niqta.

¹⁴ Chay tawa kawsaqkunañataqmi nirqaku: ¡Amén! nispa. Iskay chunka tawayuq ancianokunañataqmi qonqorakuykuspanku hatuncharqaku.