Apocalipsis 4 - Chuya Qellqa 1992

Hanaq pachapi Diosta yupaychasqankumanta

¹ Chaymantam rikurqani hanaq pachapi punku kicharayachkaqta. Punta qayakuy uyarisqaymi trompetapa waqaynin hina karqa, ñoqawan rimaspanmi kaynata nirqa: ¡Kayman qespimuy, kaykunapa qepanman imakunam pasakunantaqa ñoqam qawachisqayki! nispa.

² Chaypunillam Espiritupa atiyninwan huntasqa rikurirurqani, hinaspam rikururqani hanaq pachapi tronota chaynataq tronopi huk tiyaqtapas.

³ Chay tiyaqpa rikchayninqa jaspe alhaja rumimanwan cornalina nisqanku alhaja rumimanmi rikchakusqa. Trononpa muyuriqninpiñataqmi kasqa huk chirapa esmeralda alhaja rumi hina llipipipichkaq.

⁴ Chay tronopa muyuriqninpim iskay chunka tawayuq tronokunata rikurqani, chaypim iskay chunka tawayuq ancianokuna tiyachkasqaku, paykunam yuraq pachayuqkama hinaspa umankupi qorimanta coronayuqkama kachkasqaku.

⁵ Chay tronomantam lloqsimusqa llipyakuna, rayokuna hinaspa qapariykuna. Trononpa ñawpaqninpiñataqmi rupachkasqa qanchis mecherokuna, chaykunaqa kasqa Diospa qanchis espiritunkunam.

⁶ Trononpa ñawpaqninpiñataqmi kasqa cristal hina chuyay-chuyay lamar qocha. Chay tronopa waqtanpi hinaspa muyuriqninpiñataqmi kasqa tawa kawsaqkuna, chay kawsaqkunaqa kasqa qepanpi hinaspa ñawpaqninpi achkallaña ñawiyuqkamam.

⁷ Punta kaqmi rikchakusqa leonman, iskay kaqñataqmi rikchakusqa malta toroman, kimsa kaqñataqmi kasqa runa hina uyayuq, tawa kaqñataqmi rikchakusqa pawachkaq ankaman.

⁸ Chay tawantin kawsaqkunaqa kasqa soqta raprayuqkamam, raprankunañataqmi kasqa hawanpipas ukunpipas ñawikunawan huntasqa, paykunam tuta punchaw mana samaykuspa nirqaku: “¡Chuyam, chuyam, chuyam Tukuy Atiyniyuq Señor Diosqa, payllam ñawpaq kaqpas, kunan kaqpas chaynataq hamuq kaqpas!” nispanku.

⁹ Runaman rikchakuq chay kawsaqkunam, trononpi tiyaq wiña-wiñaypaq kawsakuq Diosta sapa kuti yupaychaspa hinaspa hatunchaspa graciasta qoptinkuñataqmi,

¹⁰ iskay chunka tawayuq ancianokuna wiña-wiñay kawsaqpa otaq tronopi kaqpa qayllanpi qonqorakuspanku coronankuta ñawpaqninman churaykuspanku kaynata yupaychasqaku:

¹¹ “Señor Diosnillayku, hatunchaytapas, yupaychaytapas, atiytapas chaskinaykipaq hinapunim kanki. Qanmi tukuy ima kaqkunatapas unancharqanki, munaynikiman hina unanchaptikim tukuy imapas kachkan”, nispanku.