Apocalipsis 22 - Chuya Qellqa 1992

¹ Huk angelmi chuyay-chuyay mayuta qawaykachiwarqa, chay mayuqa kawsay yakum kasqa. Chay yakuqa kasqa cristal hina chuyay-chuyaymi, chayqa lloqsimusqa Diospa hinaspa Corderopa trononmantam.

² Chay llaqtapa callenpa chawpinpiñataqmi mayupa kaylaw-waklawninpi kawsay qokuq sacha wiñasqa. Chay sachaqa killan-killanmi rurusqa watapi chunka iskayniyuq kutita, llaqenkunañataqmi kasqa kay pachapi llapallan runakuna hampikunankupaq.

³ Chaypiqa manañam ima ñakaypas kasqañachu. Diospa hinaspa Corderopa trononñam chaypiqa kanqa hinaptinmi serviqninkunañataq servinqaku.

⁴ Paykunaqa Diospa uyantam qawanqaku, urkunkupiñataqmi paypa sutin kanqa.

⁵ Chaypiqa manañam tutapas kanqañachu, chaypi yachaqkunaqa achkitapas, intitapas manañam necesitanqakuñachu. Paykunataqa Señor Diosllañam achkinqa, hinaptinmi wiña-wiñaypaq munaychakunqaku.

Jesucristopa kutimuynin hichpamusqanmanta

⁶ Angelñataqmi niwarqa: Kay nisqaykunaqa confiakunapaq hinaspa cheqappunim. Profetakunaman yachachiq Señor Diosmi angelninta kachamurqa imakunapas chaylla pasaqkunamanta serviqninkunaman qawachinanpaq.

⁷ ¡Chayllam hamusaq! ¡Mayna kusisqam kay libropi qellqasqaman hina Diospa willakusqan kasukuqkunaqa!

⁸ Ñoqa Juanmi kaykunata rikuspay uyarirqani. Kaykunata rikuykuspaymi hinaspa uyariykuspaymi qawachiwaqniy angelta hatunchanaypaq ñawpaqninpi qonqorakuykuptiymi,

⁹ payñataq niwarqa: ¡Ama chaytaqa ruwaychu! Ñoqaqa qampapas, wawqe-panikikunapapas, Diosmanta willakuqkunapapas chaynataq kay libropi qellqasqa kaqkuna kasukuqkunapapas serviqmasillanmi kani. ¡Hatunchaspaqa-hatunchay Diosllatayá! nispa.

¹⁰ Niwarqataqmi: Kay libropi qellqasqa profeciakunataqa amayá wichqaychu, chaykunapa pasakunan tiempoqa ñam hichpamuchkanña.

¹¹ Mana allin ruwaqqa mana allintaraqyá ruwachkachun, millakuypaq ruwaqpas millakuypaq kaqtaraqyá ruwachkachun, allin kaqkuna ruwaqñataqyá allin kaqkunataraq ruwachun, chuyanchakuqpas Diosllapaqñayá chuyanchakuchun, nispa.

¹² ¡Arí, chayllam hamusaq! Apamuchkanim premiotapas, chaytaqa sapakamamanmi imam ruwasqankuman hina qosaq.

¹³ Ñoqam kani Qallariypas, Tukupaypas, Punta kaqpas chaynataq Qepa kaqpas.

¹⁴ Mayna kusisqam pachankuna taqsakuqkunaqa, paykunaqa punkunta llaqtaman yaykuspam kawsay qokuq sachapa rurunta mikunqaku.

¹⁵ Ichaqa hawapim qepanqaku: Allqo hina kawsaqkunaqa, layqakunaqa, huchapakuqkunaqa, runa wañuchiqkunaqa, idolokuna yupaychaqkunaqa hinaspa llullakuqkunaqa.

¹⁶ Ñoqa Jesusmi kachamurqani angelniyta tukuy kaykunamanta iñiqkunaman willananpaq. Ñoqaqa kani sachapa sapin hina rey Davidpa mirayninmi, ñoqataqmi kani achikyaq chaskapas.

¹⁷ Chuya Espirituwan Corderopa novianmi kaynata ninku: ¡Hamuy! nispanku. Pipas uyariqqa nichun: ¡Hamuy! nispa. Pipas yakunayachikuqqa hamuspayá kawsachikuq yakuta mana imallapaq tomachun.

¹⁸ Haykam kay libropi qellqasqa profeciakuna uyariqkunamanmi kaynata nini: Pipas kaykunaman yapaptinqa, Diosmi paymanpas kay libropi qellqasqa kaq hatun castigokunata yapanqa.

¹⁹ Sichum pipas kay libropi qellqasqa profeciakunamanta qechuptinqa, chay qechuqpa tupaqnintam Diospas qechunqa kawsay qokuq sachamanta, chuya llaqtamanta hinaspa kay libropi qellqasqa kaqkunamanta.

²⁰ Kaykunamanta willakuqmi nirqa: “Arí, chayllam hamusaq”, nispa. ¡Amén! ¡Hamuyña Señor Jesús!

²¹ Señor Jesucristopa kuyakuyninyá qamkunawan kachun. Amén.