Apocalipsis 21 - Chuya Qellqa 1992

Musoq cielomantawan musoq allpa pachamanta

¹ Chaymantam musoq cielotawan musoq allpa pachata rikurqani, ñawpaq cielowan kay pachaqa manam kasqañachu. Lamar qochapas manañam kasqañachu.

² Rikurqanitaqmi Diospa musoq chuya Jerusalén llaqtantapas, chayqa hanaq pacha Diospa qayllanmantam uraykamuchkasqa, chay llaqtaqa novionwan casarakunanpaq sumaqllaña pachasqa novia hinam kachkasqa.

³ Hinaptinmi hanaq pachamanta kayna hatun qapariyta uyarirqani: Kunanqa Diospa tiyanan trononqa kaypiñam runakunawan kachkan. Paymi runankunawan yachanqa, paykunaqa llaqtanmi kanqa, Diosñataqmi paykunapa Diosnin kanqa.

⁴ Diosmi paykunapa weqenta pichanqa, manañam wañuypas, llakikuypas, waqaypas, allwakuypas nitaq nanaypas kanqañachu. Ñawpaq kaqkunaqa pasarunñam, nispa.

⁵ Hatun tronopi tiyaqñataqmi kaynata niwarqa: Ñoqam tukuy imata musoqyachini, nispa. Huktawanmi niwarqa: “Qellqay: Kay nisqaykunaqa hapipakunapaqmi hinaspa cheqapmi” nispa.

⁶ Payqa niwarqataqmi: Ñam ruwasqaña. Ñoqam kani Qallariypas Tukupaypas, Ñawpaq kaqpas Qepa kaqpas. Pipas yakunayachikuqmanqa mana imallapaqmi pukyumanta kawsachikuq yakuta qosaq.

⁷ Pipas venceqqa tukuy kaykunatam herenciapaq chaskinqa, ñoqam Diosnin kasaq, payñataqmi churiy kanqa.

⁸ Manchatikunaqa, mana iñiqkunaqa, aychanwan millakuypaq kaq ruwaqkunaqa, runa wañuchiqkunaqa, huchapakuqkunaqa, layqakunaqa, idolokuna yupaychaqkunaqa hinaspa llullakuqkunaqa, azufreyuq nina lenwachkaq qochamanmi wischusqa kanqaku. Kayqa iskay kaq wañuymi.

Musoq Jerusalenmanta

⁹ Chaymantam asuykamuwarqa copayuqkama qanchis angelkunapa huknin, chay copakunaqa kachkasqa qepa kaq qanchis ñakariykunawan huntasqam, rimapayawaspanmi kaynata niwarqa: “Kayman hamuy, ñoqam noviata qawachisqayki payqa Corderopa casarasqanmi”, nispa.

¹⁰ Chuya Espiritum hatun alto orqoman aparuwarqa, hinaspam Jerusalén chuya llaqtata qawaykachiwarqa, chay llaqtaqa Diospa qayllan hanaq pachamantam uraykamuchkasqa.

¹¹ Chay llaqtaqa Diospa kanchayninwanmi achkirichkasqa, achkiriyninqa kasqa suma-sumaq jaspe alhaja rumipa achkiriynin hinaraqmi, chayqa kasqa Cristal hina rikukuqmi.

¹² Llaqtapa muyuriqninqa kasqa alto-altom hinaspa ancho perqayuqmi, punkunkunapas chunka iskayniyuqmi kasqa. Sapa punkupim huk ángel kasqa, sapa punkupitaqmi qellqasqa kasqa chunka iskayniyuq Israel ayllukunapa sutinpas.

¹³ Intipa qespimunan lawmanmi kasqa kimsa punku, intipa seqaykunan lawmanpas kimsa punkutaqmi kasqa, kimsa punkutaqmi kasqa norte lawmanpas chaynataq sur lawmanpas.

¹⁴ Llaqtapa muyuriqninpi perqakunapas kasqa chunka iskaynin cimientoyuqmi, sapa cimientopiñataqmi qellqasqa kasqa Corderopa chunka iskayniyuq apostolninkunapa sutinkupas.

¹⁵ Rimapayawaqniy angelpa makinpim kachkasqa qorimanta tupuna soqos, chayqa kasqa llaqtata, punkunkunata hinaspa perqankunata tupunanpaqmi.

¹⁶ Chay llaqtaqa kasqa cuadradom, largonpas anchonpas chay sayayllam kasqa. Angelmi chay llaqtata tupurqa tupuna soqosninwan, chayqa kasqa iskay waranqa iskay pachaknin kilometrom, largonpas, anchonpas chaynataq altonpas chay sayayllam kasqa.

¹⁷ Perqanta tupuruptinñataqmi kasqa soqta chunka pichqayuq metro. Angelqa runapa tupunanman hinallam tupurqa.

¹⁸ Chay llaqtapa muyuriqnin perqakunaqa kasqa jaspe alhaja rumiwan perqasqam, llaqtañataqmi kasqa qori puromanta cristalman rikchakuq.

¹⁹ Chay llaqtapa perqanpa cimientonkunaqa kasqa tukuy rikchaq suma-sumaq alhaja rumikunawan adornasqam: Punta cimientom kasqa jaspemanta, iskay kaqñataqmi zafiromanta, kimsa kaqñataqmi agatamanta, tawa kaqñataqmi esmeraldamanta,

²⁰ pichqa kaqñataqmi onicemanta, soqta kaqñataqmi cornalinamanta, qanchis kaqñataqmi crisolitomanta, pusaq kaqñataqmi berilomanta, isqon kaqñataqmi topaciomanta, chunka kaqñataqmi crisoprasomanta, chunka hukniyuq kaqñataqmi jacintomanta, chunka iskayniyuq kaqñataqmi amatistamanta.

²¹ Chunka iskayniyuq punkukunaqa kasqa chunka iskayniyuq perlaskunam; sapa punkukunaqa huk perlasllamanta ruwasqam kasqa. Llaqtapa callenñataqmi kasqa qori-puromanta cristal hina kanchariq.

²² Chay llaqtapiqa manam ima templotapas rikurqanichu, chay llaqtapa templonqa kasqa Tukuy Atiyniyuq Señor Dioswan, Corderollam.

²³ Chay llaqtaqa manam necesitanchu intipa nitaq killapa kanchaynintapas, aswanqa Diospa kanchayllanmi achkin, Corderollataqmi kanchayninpas.

²⁴ Nacionkunapas chay llaqtapa achkiyllanpim purinqaku, hinaptinmi kay pachapi reykunapas tukuy kapuqninkuta payman apamunqaku.

²⁵ Punkunkunapas manam wichqakunqachu punchawqa, nitaqmi chaypiqa tutapas kanqañachu.

²⁶ Nacionkunapas chaymanmi kapuqninkuta hinaspa sumaqllaña kayninkuta apamunqaku.

²⁷ Chay llaqtamanqa manam ima qachapas, millakuypaq kaqkuna ruwaqkunapas nitaq llullakunapas yaykunqachu. Chaymanqa yaykunqaku Corderopa wiñay kawsay libronpi sutinku qellqasqa kaqkunallam.