Apocalipsis 15 - Chuya Qellqa 1992

Angelkunamantawan qanchis qepa kaq castigokunamanta

¹ Hanaq pachapim ancha admirakuypaq señalta rikurqani: Qanchis angelkunam kachkasqa qanchis qepa kaq ñakariykuna hapirisqakama, chay ñariykunawanmi Diospa piñakuynin tukururqa.

² Rikurqanitaqmi ninawan chaqrusqa cristal kaqlla lamar qochatapas. Rikurqanitaqmi manchakuypaq animaltawan imagennintapas chaynataq marcantawan sutinpa numeron mana chaskispa venceqkunatapas, paykunaqa chay cristal kaqlla lamar qochapa patanpim Diospa qosqan arpantinkama sayachkasqaku.

³ Paykunam Diosta serviq Moisespa takintawan hinaspa Corderopa takinta kaynata takirqaku: “Tukuy Atiyniyuqmi Señor Diosnillayku”, tukuy ruwasqaykikunaqa hatu-hatun admirakuypaqmi, ñannikikunaqa cheqapmi hinaspa allinpunim, nacionkunapi munaychakuq Reymi kanki,

⁴ Señorllayku, ¿pitaq mana manchakusunkimanchu? ¿Pitaq mana yupaychasunkimanchu? Qamllam chuyaqa kanki, chayraykum llapa nacionkuna hamuspanku hatunchasunki, allin ruwaq kasqaykitam qawaykachikunki.

⁵ Kaykunapa qepantañataqmi rikurqani Diosman asuykuna carpa kichakuykuqta.

⁶ Chay templomantam lloqsiramurqa qanchis angelkuna qanchis castigokuna aparisqa, paykunaqa linomanta sumaq kancharichkaq pachayuqmi hinaspa qasqonkupas qorimanta chumpiwan watasqakamam kasqaku.

⁷ Runaman rikchakuq tawan kawsaqkunapa hukninmi qanchis angelkunaman qoykarirqa qorimanta copakunata, chay copakunaqa kasqa Diospa piñakuyninwan huntasqam, payqa wiña-wiñaypaq kawsaqmi.

⁸ Temploñataqmi Diospa kanchariyninmanta hinaspa atiyninmanta lloqsimuq qosniwan huntasqa karqa. Chay templomanqa manam pipas yaykuyta atirqakuchu, qanchis angelkunapa apasqan qanchis castigokuna tukunankama.