2~Samuel 8 - Chuya Qellqa 1992

Enemigonkunata David vencesqanmanta

¹ Chaykunapa qepantam filisteokunata David venceruspan paykunapi munaychakurqa, hinaspam Meteg-ama llaqtata paykunamanta qechururqa.

² Moab tropakunatapas venceruspanmi pampaman siriykachispan cordelwan tupurqa; cordelwan iskay kuti tupusqapi kaqkunam wañuchisqa karqaku, cordelwan huk kuti tupusqapi kaqkunañataqmi kawsarqaku. Moab runakunapi David munaychakuptinmi impuestota pagarqaku.

³ Rey Davidqa vencerurqataqmi Rehobpa churin Soba nacionpa reynin Hadad-ezertapas, paytaqa vencerurqa Eufrates mayu lawpi allpankunata kutichikunanpaq richkaptinmi.

⁴ Paykunamantam waranqa qanchis pachaknin sillada soldadokunata David presocharurqa. Chakiwan riq tropakunamantapas iskay chunka waranqatam presocharurqa. Carreta aysaq caballokunapa ankunta kuchurachispanmi pachak carretakunallapaqña caballokunata puchuykachirqa.

⁵ Damasco lawmantam Siria nacionniyuq tropakuna hamururqaku Soba nacionpa reynin Hadad-ezerta yanapanankupaq; Davidmi ichaqa Siria nacionpa tropankunamanta iskay chunka iskayniyuq waranqa soldadokunata wañurachirqa.

⁶ Hinaspam rey David tropankunata churarurqa Damasco law Siria nacionpi, chaymi Siria nacionniyuq runakuna Davidta servispanku impuestota pagarqaku. Chaynatam rey Davidta mayman peleaq riptinpas Dios vencechirqa.

⁷ Hadad-ezerpa soldadonkunapa qorimanta escudokuna apamusqankuta David qechuruspanmi Jerusalén llaqtaman aparqa.

⁸ Chaynataqmi Hadad-ezerpa munaychakusqan Beta llaqtapa chaynataq Berotai llaqtapa nana-nanaq broncentapas rey David hapikuykurqa.

⁹ Hadad-ezerpa lliw tropankunata David vencerusqanta Hamat nacionpa reynin Toi yacharuspanmi,

¹⁰ churin Joramta rey Davidman kacharqa qorimanta, qollqemanta hinaspa broncemanta serviciokunata apachispan, Hadad-ezerta rey David guerrapi vencerusqanmanta rimaykuspan felicitamunanpaq. Rey Toiqa chayta ruwarqa Hadad-ezerwan guerrapi kasqanraykum.

¹¹ Rey Davidmi Jorampa apamusqan serviciokunata Tayta Diospaq sapaqcharqa, sapaqcharqataqmi munaychakusqan nacionkunamanta qorita qollqeta apamusqantapas.

¹² Chay nacionkunam karqa: Edom, Moab, Amón, Filistea, Amalec. Sapaqcharqataqmi Hadad-ezerwan peleaspan qechumusqantapas. Hadad-ezerqa karqa Rehobpa churin Soba nacionpa reyninmi.

¹³ Siria tropakunata vencerusqanmanta kutimuchkaspanmi, chunka pusaqniyuq waranqa Edom nacionpa tropakunata kachi wayqopi vencerurqa. Chaynapim rey Davidqa ancha reqsisqa rikurirurqa

¹⁴ Chaymantam rey Davidqa soldadonkunata Edom nacionpi churarurqa, chaynapim Edom runakunaqa Davidtaña servirqaku. David mayman peleaq riptinpas Tayta Diosmi vencechirqa.

Davidpa tropan kamachiqkunamanta

¹⁵ Israel nacionta David kamachikuspanmi llapallan runankunapaq mana pimanpas sayapakuspa allin arreglota ruwarqa.

¹⁶ Sarviapa wawan Joabmi llapallan tropankunapa capitannin karqa. Ahiludpa churin Josafatñataqmi imapas sucedekusqanmanta qellqaq karqa.

¹⁷ Ahitobpa churin Sadocpiwan Abiatarpa churin Ahimelecñataqmi sacerdotekuna karqaku. Seraiasñataqmi karqa secretario.

¹⁸ Joiadapa churin Benaiam Ceret ayllumantawan Pelet ayllumanta kaq soldadokunata kamachirqa. Davidpa churinkunañataqmi sacerdotekuna karqaku.