2~Samuel 3 - Chuya Qellqa 1992

¹ Saulpa ayllunkunam Davidpa ayllunkunawan unay tiempo guerrapi karqaku. Ichaqa munaychakuyninpi David aswan-aswan sapinchakuptinmi, Saulpa ayllunpa atiyninñataq allimanta chinkarqa.

Davidpa Hebrón llaqtapi naceq churinkunamanta

² Hebrón llaqtapi Davidpa naceq churinkunam kaykuna: Piwi churin Amón. Paymi karqa Jezreel llaqtayuq Ahinoampa wawan.

³ Iskay kaq churin Quileab, paymi karqa Carmel llaqtayuq Nabalpa viudan Abigailpa wawan. Kimsa kaq churin Absalón, paymi karqa Gesur nacionpa reynin Talmaipa churin Maacapa wawan.

⁴ Tawa kaq churin Adonías, paymi karqa Haguitpa wawan. Pichqa kaq churin Sefatías, paymi karqa Abitalpa wawan.

⁵ Soqta kaq churin Itream, paymi karqa Eglapa wawan. Chaykunam Davidpa Hebrón llaqtapi naceq churinkuna karqaku.

Abnerwan David contrato ruwasqankumanta

⁶ Saulpa ayllunkunawan Davidpa ayllunkuna guerrapi kasqankuraykum, Abnerqa Saulpa ayllun ukupi llumpay atiyniyuq rikurirurqa.

⁷ Saulpam karqa uywanakusqan Rizpa sutiyuq warmin, paymi karqa Ajapa churin. Paywanmi Abner puñururqa. Chaymi Abnerta Is-boset nirqa: ¿Imanasqataq taytaypa uywanakusqan warmiwan puñururqanki? nispa.

⁸ Chaymi Is-bosetpa nisqanwan Abner sinchita piñakuruspan nirqa: ¿Ñoqaqa Judá llaqtata serviq allqochu karqani? Ñoqaqa aswanmi taytayki Saulpa ayllunkunata chaynataq amistadninkunatapas servirqani. Qamtapas manam Davidpa makinmanqa qoykurqaykichu. ¿Hinachkaptinchu chay warmiwan huchallikusqaypaq tumpawanki?

⁹ Diosyá sinchita castigawachun Tayta Diospa prometesqanman hina Davidta mana yanapaptiyqa.

¹⁰ Saulpa ayllunmanta kamachikuy atiyninta qechuspaymi Davidman qosaq Israelpi chaynataq Judapi munaychakunanpaq; Dan llaqtamanta qallaykuspa Beerseba llaqtakama munaychakunanpaq, nispa.

¹¹ Is-bosetñataqmi Abnerta manchakuspan mana imatapas nirqachu.

¹² Chaymantam Abnerqa runankunata kacharqa Davidman kaynata nimunankupaq: ¿Pipataq kay nacionqa? contratota ruwasunchik, ñoqam yanapasqayki Israelpa reynin kaptikiqa, nispa.

¹³ Davidñataqmi nirqa: Allinmi, contratotayá ruwasun, ichaqa ñoqaman hamuspaykiqa Saulpa warmi churin Micaltam pusamuwanki, mana chayqa, manam chaskisqaykichu, nispa.

¹⁴ Saulpa churin Is-bosetmanpas Davidqa runankunatam kacharqa kaynata nimunankupaq: Warmiy Micalta kutichipuway, paytaqa pachak filisteokunapa qari kayninpa qarachanwanmi hurqomurqani, nispa.

¹⁵ Hinaptinmi Is-bosetqa Micalta qosan Paltielmanta qechurachimuspan pusachimurqa. Paltielqa Laispa churinmi karqa

¹⁶ Qosan Paltielñataqmi waqastin payta Bahurim llaqtakama qatirqa. Chaypim Paltielta Abner kamachirqa: Kutiy, nispa. Hinaptinmi Paltielqa kutikurqa.

¹⁷ Chaymantam Abnerqa Israelpi ancianokunawan rimaspan nirqa: Qamkunaqa unayñam David reynikichik kananta munarqankichik.

¹⁸ Chaynaqa, kunanyá reynikichikpaq churaychik. Tayta Diosmi Davidman prometespan nirqa: “Serviqniy Davidwanmi filisteokunamanta chaynataq lliw enemigonkunamanta Israel runaykunata librasaq”, nispa.

¹⁹ Abnerqa Benjamín runakunawanpas rimaruspanmi Hebrón llaqtaman Davidwan tupamunanpaq rirqa, Israel runakunawan Benjamín runankunapa tukuy ima tanteasqankuta willamunanpaq.

²⁰ Abnermi iskay chunka soldadonkunawan Hebrón llaqtaman chayarurqa, hinaptinmi Davidqa convidota ruwachispan Abnerman chaynataq hamuqmasinkunamanpas mikuchirqa.

²¹ Chaypim Davidta Abner nirqa: Kunanmi rispay llapallan Israel runakunata huñuramusaq, paykunawan contratota ruwaspayki munaychakunaykipaq, nispa. Abnerta David aviaruptinmi hawkalla pasakurqa.

Abnerta Joab wañurachisqanmanta

²² Davidpa tropankunawan Joabmi guerrapi vencespanku enemigonkumanta tukuy ima qechumusqankuta aparikuspa kutimurqaku. Abnerqa manañam Davidwanchu Hebrón llaqtapi karqa, payqa aviarusqanraykum hawkallaña pasakurqa.

²³ Llapa tropankunawan Joab chayaramuptinmi kaynata willaykurqaku: Nerpa churin Abnermi reyman hamusqa hinaptinmi allinllata chaskiykuspa aviaruptin hawkalla kutikurqa, nispanku.

²⁴ Chaymi Joabqa reypa qayllanman rispan nirqa: ¿Imatataq kayta ruwarunki? Abner qawaqniki hamuchkaptinqa ¿imanasqataq allinllata kachaykurqanki?

²⁵ ¿Manachu yacharqanki Nerpa churin Abnerqa engañasunaykipaq hamusqanta? Payqa imam ruwasqaykitapas, mayman risqaykitapas wateqaqmi hamurqa, nispa.

²⁶ Joabmi Davidwan rimasqanmanta lloqsiramuspan, Davidpa mana yachasqanta, Abnerta maskamunankupaq runankunata kacharqa, chaymi hayparuspanku Sira sutiyuq pozomantaña Abnerta kutichimurqaku.

²⁷ Hebrón llaqtaman Abner kutiramuptinmi llaqtapa punkunpa huklawninman Joab pusarurqa mana pipa uyarisqanta rimanankupaq, ichaqa espadawan wiksanpi tuksiruspanmi wañurachirqa, wawqen Asael wañurachisqanmanta vengakuspa.

²⁸ Chayta yacharuspanmi David nirqa: Ñoqapas, kamachisqay llaqtapas Nerpa churin Abner wañusqanmantaqa Tayta Diospa ñawpaqninpiqa wiñaypaq mana huchayuqmi kaniku.

²⁹ Joabqa lliw mirayninkunapiwanyá kay huchamanta castigasqa kachunku, ayllunpi ama faltachunchu yawarpakuywan ñakariq, lepra onqoywan ñakariq, wistukunapas, guerrapi wañuqkunapas, mikuymanta muchuqkunapas, nispa.

³⁰ Joabmi wawqen Abisaipiwan Abnerta wañurachirqaku, chaynataqa ruwarqaku Gabaón lawpi peleachkaptinku wawqenku Asaelta Abner wañurachisqanraykum.

³¹ Chaymantam Joabta runankunatawan David kamachirqa: Pachaykichikta llikipakuspa, qachqa pachawan churakuychik hinaspa Abnerpa wañukusqanmanta waqaychik, nispa. Rey Davidmi chakanapi kaq ayapa qepanta qatirqa.

³² Hebrón llaqtapi Abnerta pamparuptinkum rey David qaparispa sepulturapa waqtanpi waqarqa, llapa runakunapas waqarqakum.

³³ Abnermanta aya takita rey David takispanmi nirqa: Abner ¿imanasqataq mana yuyayniyuq hina wañurunki?

³⁴ Makikiqa manam chaqnasqachu karqa, chakikipas manam manyasqachu karqa, mana allin runakunapa wañuchisqan hina wañurunaykipaqqa, nispa. Llapa runakunapas aswanraqmi waqarqaku.

³⁵ Chaymantam Davidta achkillapiraq mikunanpaq ruegarqaku, Davidñataqmi juraspan nirqa: Diosyá castigawachun tantata otaq imatapas manaraq inti seqaykuchkaptin mikuruptiyqa, nispa.

³⁶ Llapallan runakunam yachaykurqaku reypa tukuy imakuna ruwasqanta. Chay ruwasqankunatam llaqtaqa allinpaq hapirqa.

³⁷ Chay punchawmi llapallan Israel runakuna allinta yacharurqaku, Nerpa churin Abner wañusqanmanta rey Davidqa mana huchayuq kasqanta.

³⁸ Serviqninkunatam rey David nirqa: Yachasqaykichikpi hinapas kunanmi Israelpi hatun atiyniyuq kamachikuq wañurun.

³⁹ Chaymi Diospa sapaqchasqan rey kachkaspaypas mana ima ruwayta atinichu Sarviapa wawankuna rumi sonqo munaysapa kasqankurayku. Tayta Diosyá mana allin ruwaqmanqa imam ruwasqanman hina pagapuchun, nispa.