2~Pedro 2 - Chuya Qellqa 1992

Pantaykuna yachachikuqkunamanta

¹ Israel ukupiqa karqataqmi pantachikuq profetakunapas, chaynam qamkuna ukupipas pantay yachachikuqkuna kanqa. Paykunam mana musyachikuspalla pantay yachachikuykunata yachachinqaku, salvaqnin Señortapas neganqakum, chayqa kanqa kikinkupa condenasqa kanankupaqmi.

² Achkam qatinqaku paykunapa qanra vidankuta, paykunaraykum runakunapas cheqap ñanpa contranpi rimanqaku.

³ Qollqe ganakuyta munaspankum, allin yachachikuq tukuspanku qamkunamanta negociota ruwakunqaku, paykunaqa ñawpaqmantaraqmi sentenciasqaña kachkanku, chaylla chinkarunankupaq.

⁴ Diosqa manam huchallikuq angelkunatapas pampacharqachu, paykunataqa infiernoman wischuykuspanmi juicio punchawkama tutayaypi cadenasqata saqerurqa.

⁵ Diosqa manataqmi ñawpaq runakunatapas pampacharqachu, sinchi paratam kachaykamurqa huchasapa runakunaman, hinaspam salvacionmanta willakuq Noeytawan qanchis runakunallata salvarqa.

⁶ Chaynataqmi Sodoma Gomorra llaqtakunatapas uchpayanankama kañaspa chinkarachirqa, chaynapi qepa punchawkunapi Diosta mana kasukuq runakuna manchakuy yachanankupaq.

⁷ Allin ruwaq Lot sutiyuq runatam ichaqa librarqa, payqa mana allin runakunapa qanra vidanta qawaspanmi anchata llakikurqa.

⁸ Paykunapa chawpinpi yachaq Lotmi kay huchasapa runakunapa mana allinkuna ruwasqankuta qawaq hinaspa uyariq, chaymi sapa punchaw llumpayta sonqonpi llakikuq.

⁹ Señorqa yachanmi, sasachakuykunamanta serviqninkuna libraytaqa, mana allin runakunatañataqmi ñakarichisparaq juicio punchawpaq waqaychachkan.

¹⁰ Diosqa aswanraqmi castiganqa aychanpa munasqanpi hinaspa qanra vidapi puriqkunataqa, paykunaqa hatun tukusparaqmi atiyniyuqkunatapas desprecianku, nitaqmi manchakunkuchu hanaq pachapi atiyniyuqkunatapas.

¹¹ Angelkunaqa aswan atiyniyuqmi chay pantachikuq profetakunamantaqa, ichaqa manam paykunataqa Señorpa qayllanpiqa ñakay simiwanqa kaminkuchu.

¹² Chayna runakunaqa animalkuna hina mana yuyayniyuqmi hinaspa kikillankupaq munasqallanpi kawsaqkunam kanku, nacemurqakupas hapispa wañuchisqa kanankupaqmi, rimankupas mana yachasqankutam, ichaqa animalkuna hinam wañunqaku,

¹³ pitapas ñakarichisqankuman hinam ñakarinqaku. Paykunaqa kusisqapaq hapikuspankum millakuypaq kaqkunata punchaw pacha ruwanku, fiestaykichikpipas qamkunawan kuspa mikuspankum mana allinkunata ruwaspa kusikunku, paykunaqa penqakuypaq mana allin qanra runakunam.

¹⁴ Warmitapas waqllikuy ñawinkuwanmi qawanku, huchallikuytaqa manam aminkuchu, pisi iñiyniyuqkunatam engañanku, sonqonpim runapa kaqninta munapayanku, kaykunaqa ñakay runakunam.

¹⁵ Allin ñanta saqeruspankum pantaypiña purichkanku, Beorpa churin profeta Balaampa ruwasqantañam qatipakuchkanku, Balaammi qollqe ganayta munaspan mana allin kaqta ruwarqa;

¹⁶ chaymi mana rimaq china asno, runa hina rimaruspan huchanmanta anyarqa, hinaspam loco hina ruwasqanta harkakururqa.

¹⁷ Chayna runakunaqa kachkan mana yakuyuq pukyu hinam, wayrapa apasqan puyukuna hinam, paykunaqa sinchi tutayaypaqñam kachkanku.

¹⁸ Rimankupas yanqa mana pasaqkunatam, aychapa munasqan mana allin ruwaykunamanmi huchanmanta chayllaraq ayqekuqkunatapas aysanku.

¹⁹ Kikinkupuni mana allinkunapa esclavon kachkaspankupas, libre kaytaraqmi prometenku. Pipas vencechikuqqa venceqninpa munaychakusqanmi rikurirun.

²⁰ Salvaqninchik Señor Jesucristota reqsichkaspa kay pachapa qanra kayninkunamanta wanakuchkaspa kasqallan wichiqqa hinaspa chaykunawan vencechikuq runaqa, ñawpaq kasqanmantapas aswanraqmi rikurirun.

²¹ Paykunapaqqa aswan allinqa kanman karqa Diospa chuya ñanninta mana reqsiyninkum, reqsichkaspaña chuya kamachikuyta qepanchaspa qepaman kutikunankutaqa.

²² Paykunapim cumplikurun hukkaqninpa kayna nisqan: “Allqom kutichisqanta kaqllamanta mikurun, bañasqa kuchiñataqmi huktawan mitupi qochparun”.