2~Corintios 9 - Chuya Qellqa 1992

Iglesiakunapaq ofrendamanta

¹ Iñiqkunapaq yanapakuy ofrenda huñunaykichikmantaqa yanqañam qellqamuykichikman.

² Yachaniñam yanapakuy munasqaykichiktaqa, chaymi Macedonia lawpipas kusikuywan willakuni: Acaya lawpi kaqkunaqa qayna watamantaraqmi yanapakunankupaq chaylla karqaku, nispay. Chayta yachaykuspankum Macedonia lawpi kaqkunapas yaqa llapallanku yanapakuyta munarqaku.

³ Chaywanpas kachamuchkanim kay wawqekunata chaynapi qamkunamanta kaypi alabakusqay mana yanqa kananpaq, aswanqa nisqayman hina listolla kanaykichikpaq.

⁴ Yanqañataq Macedonia lawpi kaqkunawan hamuspayku mana listotachu tarimuykikuman, chayna kaptinqa qamkunapi confiakusqaykumantachá penqaypi kaymanku.

⁵ Chayraykum kay wawqekunata mañakurqani puntata watukamusunaykichikpaq, chaynapi manaraq hamuchkaptiyku prometekusqaykichik kuyakuy ofrenda huñuypi yanapasunaykichikpaq, chaynapim chay ofrendaykichikqa kuyakuynikichikmanta kanqa, manam mañasqaykuman hinachu.

⁶ Kaytam nikichik: Pipas aslla tarpuqqa asllatam cosechanqa, achka tarpuqñataqmi achkata cosechanqa.

⁷ Sapakamayá sonqonpi tanteasqanman hina qochun, amayá llakikuspachu nitaq obligasqa hinachu, Diosqa kusikuywan qoqtam kuyan.

⁸ Diosqa mirayniyuqtam mana imaykichikpas pisipusunaykichikpaq imatapas qosunkichik, chaynapi wakin runakunamanpas yanapanaykichikpaq.

⁹ Chuya Qellqapim kaynata nin: “Wakchakunamanmi imallantapas qoykarin, allin ruwasqanqa wiña-wiñaypaqmi”, nispa.

¹⁰ Tarpuqman muhu qoqmi hinaspa mikuqman tanta qoqmi qamkunapaqpas tarpuynikichikta achkayachinqa, achkayachinqataqmi allin ruwaynikichiktapas.

¹¹ Chaynapim apuyachisqa kankichik tukuy sonqoykichikwan qonaykichikpaq, ofrendaykichikta apaptiykum wawqe-panikunapas Diosman graciasta qonqaku.

¹² Kay yanapakuyta wawqe-panikunaman apaspaqa manam imapas pisisqallankutachu qonchik, aswanqa qosqaykichikraykum paykunaqa anchata Diosman graciasta qonqaku.

¹³ Kay yanapakuywanmi runakunaman allin noticiata chaskispa kasukusqaykichikta qawachinkichik, chaymi paykunapas Diosta yupaychanqaku. Yupaychanqakutaqmi paykunapaqwan llapallan runakunapaq ofrenda qosqaykichikmantapas.

¹⁴ Chaynataqmi paykunaqa tukuy kuyakuywan qamkunapaq Diosta mañakunqaku, hatun kuyakuyninta qamkunaman qawachisusqaykichikmanta.

¹⁵ Diosman gracias kachun mana imayna niy atiy qokuyninmanta.