2~Corintios 2 - Chuya Qellqa 1992

¹ Mana llakichinaypaqmi qamkunaman huktawan kutimuytaqa mana munarqanichu.

² Qamkunata llakirachiptiyqa ¿pitaq ñoqataqa kusichiwanman? Llakichisqaykunallam kusichiqniyqa kankichik.

³ Chayraykum qellqamurqaykichik chayamuptiy kusichiwanaykichikpaq manam llakichiwanaykichikpaqchu. Piensarqanim ñoqa kusisqa kaptiyqa llapallaykichik kusisqa kanaykichikta.

⁴ Punta kaq cartata qellqamuspayqa, sonqoypi hukmanyasqa ancha llakisqa hinaspa weqe ñawintinmi qamkunaman qellqamurqaykichik, ichaqa manam llakisqa kanaykichikpaqchu, aswanqa llumpay kuyasqayta yachanaykichikpaqmi.

Pablopa pampachasqanmanta

⁵ Pipas llakichiwaqniyqa manam ñoqallatachu llakichiwan, allinlla rimaypiqa qamkunatapas llapallaykichiktam llakichisunkichik.

⁶ Llapallaykichikpa chay runa corregisqaykichikqa allinmi, chayllapaqñayá kachun.

⁷ Chaynaqa, pampachaykuspayá kallpanchaykuychik, manaña llakipa intusqa kananpaq.

⁸ Chaymi ruegakuykichik payman kuyakuynikichikta qawachinaykichikpaq.

⁹ Kay asuntomantaqa ñawpaqmantaraqmi qellqamurqaykichikña, chaynapi kasukuq kasqaykichikta otaq mana kasukuq kasqaykichikmantapas yachanaypaq.

¹⁰ Pitapas pampachasqaykichiktaqa ñoqapas pampachanim, pitapas pampachaspayqa Cristopa qayllanpim qamkunarayku pampacharqani,

¹¹ chaynapi Satanaspas mana vencewananchikpaq, ñoqanchikqa yachanchikmi payqa pantachikuqllaña kasqanta.

Troas llaqtapi Pablo llakisqallaña kasqanmanta

¹² Troas llaqtaman Cristomanta allin noticiata willakuq chayaruptiymi, punkukuna kichakuykurqa Señorpa obranpi llamkanaypaq.

¹³ Sonqoymi ichaqa mana hawkachu karqa wawqenchik Titota mana tarisqayrayku, chayraykum paykunamanta despedikuykuspay Macedonia lawman pasakurqani.

Cristopa yanapakuyninwan vencenamanta

¹⁴ Ichaqa Diosmanyá gracias kachun Cristo Jesuspi vencechiwasqanchikmanta. Paymi ñoqanchiktakama perfumeta hina yachayninta tukuy hinastinman cheqechin.

¹⁵ Ñoqanchikqa Diospaqqa Cristopa miskillaña asnariynin hinam kanchik salvasqakuna ukupiqa,

¹⁶ chinkaqkunapaqñataqmi ichaqa wañunankupaq wañuchikuq asnay hina, salvakuqpaqñataqmi kawsay qokuq asnariy hina. ¿Pitaq kachkan kayta ruwananpaq hinaqa?

¹⁷ Ñoqaykuqa manam wakinkuna hinachu Diospa palabran willakusqaykuwan negociota ruwaniku. Aswanqa Cristopi kaspam cheqapta rimaniku Diospa qayllanpi hinaspa paypa kachasqankuna hina.