1~Timoteo 4 - Chuya Qellqa 1992

Iñiyninku qepanchakuqkunamanta

¹ Cheqaptam Chuya Espirituqa willawanchik tukupay punchawkunapiqa wakinkunam iñiyninkuta qepanchakunqaku hinaspa engañakuq espiritutaña kasukuspanku, demoniokunapa yachachikuyninkunataña chaskispanku,

² iskay uya llulla runakunatañam uyarinqaku, chay runakunapaqa concienciankupas qarayasqañam kachkan.

³ Chayna runakunam harkakunqaku: Ama casarakuychikchu, kay-wak mikuytaqa ama mikuychikchu, nispanku. Diosmi lliw mikuykunataqa unancharqa payman agradecekuspa mikunanchikpaq, chaymi iñiqkunaqa cheqap kaqta yachasqanchikrayku imatapas mikuchwanchik.

⁴ Diospa tukuy ima unanchasqanqa allinmi, chaymi ima mikuytapas mana wischupakunanchikchu, chaytaqa Diosman agradecekuspam chaskikunanchik.

⁵ Diospa palabranwan hinaspa Diosta mañakusqanchikraykum chay mikuykunaqa chuyanchasqaña.

Jesucristopa allin serviqninmanta

⁶ Sichum kaykunata wawqe-paninchikkunaman yachachispaykiqa, Jesucristopa allin serviqnin hinaspa iñisqanchik palabrakunapi allin yachayniyuqmi kanki, chay yachasqaykitam allinta qatichkanki.

⁷ Amayá mana pasaq cuentokunataqa uyariychikchu, aswanqa Diospa munasqanpaq kaqkunataña ruway.

⁸ Cuerponchikwan ejercicio ruwayqa asllatam yanapawanchik, Diospa munasqan kaqkuna ruwaymi ichaqa lliwpi allinpaq yanapawanchik, kayqa kunan kawsaypipas hinaspa hamuq kawsaypipas allinninchikpaqmi.

⁹ Kay palabraqa cheqapmi, chaymi lliw runakuna chaskinanku.

¹⁰ Chayraykum ñakaristinpas llamkanchik wiñay kawsaq Diosninchikpi hapipakuspa. Payqa llapa runapa salvaqninmi, ichaqa tukuymanta llalliqtaqa haykam iñiqkunatam salvan.

¹¹ Kaykunata kamachispa yachachiy.

¹² Jovenraq kasqaykiraykuqa ama piwanpas despreciachikuychu, aswanqa iñiqkunapa ejemployá kay: Rimaynikipi, allin kawsaynikipi, kuyakuynikipi, iñiynikipi chaynataq chuya sonqo kaynikipipas.

¹³ Chayamunaykama iñiqkunapa qayllanpi Chuya Qellqanta leey, chaynata yachachispayki wawqe-paninchikkunata kallpanchay.

¹⁴ Qampi kaq Diospa atiynintaqa amayá qonqaruychu, kaytaqa profeciaman hina iglesiapi ancianokuna makinkuta hawaykiman churaykuspanku mañakuptinkum chaskirqanki.

¹⁵ Kaykunataqa yuyaywanyá ruway hinaspa allinta takyay, chaynapi imaynam aswan-aswan ñawpaqman risqaykita qawanankupaq.

¹⁶ Kikikitayá cuidakuy hinaspa imam yachachisqaykimantapas. Chaypitaqyá takyay, chaynata ruwaspam kikikipas salvakunki chaynataq uyarisuqnikikunatapas salvanki.