1~Tesalonicenses 4 - Chuya Qellqa 1992

Diospa agradonpaq kawsanamanta

¹ Wawqe-panillaykuna, qamkunatam yachachirqaykichik Diospa munasqanman hina kawsanaykichikpaq. Chaynatam qamkuna kawsachkankichik, Señor Jesusraykum ruegakuspa mañakuykiku aswanraq chaynata kawsanaykichikpaq.

² Qamkunaqa yachankichikñam Señor Jesuspa kamachikuynin qomusqaykutaqa.

³ Diosqa munan mana huchayuq kanaykichiktam hinaspa huchapakuymanta rakikunaykichiktam.

⁴ Sapakamayá warmillaykichikwan kaychik ama huchallikuspa chaynataq respetaspa.

⁵ Amayá aychaykichikpa mana allinkuna munaynintaqa ruwaychikchu, Diosta mana reqsiq runakuna hinaqa.

⁶ Chaynaqa, amayá pipas runamasintaqa kamichunchu nitaq engañachunchu, Señorqa tukuy chaykunataqa vengakunqam. Ñam chaykunamantaqa willarqaykikuña.

⁷ Diosqa manam millakuypaq hucha ruwaypi purinapaqchu qayawarqanchik, aswanqa payllapaqña kawsanapaqmi.

⁸ Chaynaqa, kay yachachisqayta wischupakuqqa, manam runatachu wischupakun aswanqa Chuya Espíritu qosuqnikichik Diostam.

⁹ Wawqe-panintin kuyanakuymanta qellqamunaykutaqa manañam necesitankichikñachu, Diosqa ñam yachachisurqankichikña imaynam kuyanakunaykichikmantaqa.

¹⁰ Chaynatam Macedonia lawpi llapallan wawqe-panikunawanpas ruwachkankichik, chaywanpas ruegakuykichikmi aswan mastaraq kuyanakunaykichikpaq.

¹¹ Hawkalla kawsakuspayá imam ruwanaykichikta ruwaychik, makikichikwanyá llamkaychik imaynam kamachisqaykuman hina.

¹² Chaynapi Diosta mana reqsiqkunapas respetasunaykichikpaq chaynataq imapas mana pisipusunaykichikpaq.

Señor Jesuspa kutimunanmanta

¹³ Wawqe-panillaykuna, munachkanikutaqmi wañuqkunamanta yachanaykichiktapas, chaynapi mana suyakuyniyuqkuna hina ama llakikunaykichikpaq.

¹⁴ Imaynam Jesuspa wañukusqanpi hinaspa kawsarimusqanpi creenchik, chaynataqmi Jesucristopi iñikuspa wañukuqkunata Jesucristotawan kuskata Dios kawsarichimunanpipas creenchik.

¹⁵ Kaykunataqa kikin Señorpa nisqanman hinam nikiku, Señorpa kutimunankama qepaspa kawsaqkunaqa manam wañuqkunataqa ñawpasunchu.

¹⁶ Kikin Señorpunim uraykamunqa, hanaq pachamanta kamachikuy qapariyninwan, angelkunata kamachiqpa qayakuyninwan hinaspa Diospa trompetanpa waqayninwan, hinaptinmi Cristopi iñispa wañuqkuna puntata kawsarimunqaku.

¹⁷ Chaymantañataqmi kay pachapi kawsaqkuna paykunawan kuska altoman hoqarisqa kasunchik puyukunapa kasqanpi Señorwan tupananchikpaq, paywanmi wiñaypaq kasunchik.

¹⁸ Kay palabrakunawanyá kallpanchanakuychik.