1~Samuel 9 - Chuya Qellqa 1992

Saúl rey kasqanmanta

¹ Benjaminpa castan ukupim karqa huk allinnin qari-qari Cis sutiyuq runa, payqa karqa Abielpa churinmi, Abielñataqmi Zerorpa, Zerorñataqmi Becoratpa, Becoratñataqmi Afiapa.

² Cispa churinmi karqa Saúl, kuyayllapaq joven, Israel ukupiqa manam pipas pay hina sumaq rikchayniyuq hatunkaray runaqa karqachu, hombronkamallam haypaqku llapa runakunapas.

³ Huk punchawmi Cispa china asnonkuna chinkarurqa, chaymi churin Saulta nirqa: Hatarispa hukkaqnin criadonchikta pusarikuspayki asnonchikkunata maskaramuy, nispa.

⁴ Chaymi Saúl rirqa Efraín law orqokunaman, chaymantam pasarqa Salisa lawkama, ichaqa manam asnokunata tarirqachu. Saalim lawman rispapas, Benjamín castakunapa allpanman rispapas manam tarirqachu.

⁵ Zuf law allpaman chayaruptinkum criadonta Saúl nirqa: Hakuchik kutikusunña, taytayqa asnonkunamantapas mastaqa ñoqanchikmantachá llakikuchkan, nispa.

⁶ Criadonñataqmi nirqa: Amaraq kutisunchu, kay llaqtapim kachkan Dios serviq runa. Paytaqa llaqtantin runakunam llumpayta respetanku. Paypa imapas rimarisqanqa cumplekunpunim, asnonchik maypi kasqantapas willaykuwasunchikmi. Paypata hakuchik, maypim maskamunanchiktapas niykuwasunchikmi, nispa.

⁷ Chaymi Saúl nirqa: Hakuchikyá, ichaqa ¿imatataq payman apasun? qepinchikpiqa manam ima mikuyllanchikpas kanñachu, ¿Imatataq chay Diospa runanman qoykusun? nispa.

⁸ Hinaptinmi Saulta criadon nirqa: Kachkanmi qollqechay, chaytachiki qoykusun, chaynapi mayman rinanchiktapas niykuwananchikpaq, nispan.

⁹ Ñawpaq watakunapim, Israel casta runakuna Diosta tapukuq rispankuqa, kaynata niqku: “Qawaqpata hakuchik”, nispanku; kunan “profetawan” sutichasqanchiktam, ñawpaqtaqa “qawaqwan” sutichaqku.

¹⁰ Chayraykum criadonta Saúl nirqa: Chay nisqaykiqa allinmi, hakuyá, nispa. Hinaspankum pasarqaku Diospa profetampa kasqan llaqtaman.

¹¹ Chay llaqtaman wichayta qespichkaspankum, tuparurqaku yakuman hamuq sipaskunawan, hinaspam tapukurqaku: ¿Hinapichu qawaq kachkanman? nispa.

¹² Sipaskunañataqmi nirqaku: Arí, kaypim kachkan, utqaymanyá riychik, payqa hamurqa kunan punchaw llaqtawan kuska moqopi sacrificiota Diosman ofrecenanpaqmi.

¹³ Chaynaqa, llaqtaman chayaruspaykichikmi maskaykunkichik manaraq moqoman mikuq richkaptin; runakunaqa manam mikunqakuchu pay chayanankama; paymi Diosman graciasta qonqa chay sacrificiokunamanta; chaymantañam convidoman hamuqkunapas mikunqaku. Chaynaqa, kunanpuni riychik, hayparunkichikmi, nispa.

¹⁴ Llaqtaman yaykuykuchkaptinkum, Samuelqa moqoman rinanpaqña paykuna lawman hamuchkasqa.

¹⁵ Saulpa chayasqanmanta huk punchaw ñawpaqnintam, Samuelta Tayta Dios kaynata nirqa:

¹⁶ Paqarin kay horata hinam, Benjamín ayllumanta huk runata kachamusqayki, paytam aceitewan tallispa sapaqchanki Israel runaykunapa reynin kananpaq, paymi filisteokunamanta libranqa. Israel llaqtaypa ñakarisqantam qawani, chaymi mañakuyninku qayllayman chayaramun, nispa.

¹⁷ Maypacham Saulta Samuel rikuruptinmi Tayta Dios nirqa: Kaymi chay nisqay runa, paymi llaqtaypi munaychakunqa, nispa.

¹⁸ Chaymi llaqtaman yaykuna punkupiña kachkaspanku, Saúl asuykuspan Samuelta tapukurqa: Ama hina kaspaykiyá qawaqpa wasinta reqsiykachillaway, nispa.

¹⁹ Samuelñataqmi nirqa: Ñoqam kani, moqopi yupaychanaman hakuchik, chaypi mikuykamunanchikpaq, paqarin achikyaytañam tapukuynikikunatapas willasqayki, hinaspam aviasqayki.

²⁰ Ama llakikuychu kimsa punchawña chinkaruq china asnoykikunamantaqa, ñam tarirunkuña; chaywanpas Israel runakunapa llumpay munasqankuqa kanqa qampaqwan aylluykikunapaqmi, nispa.

²¹ Chaymi Saúl nirqa: ¿Imanasqataq chaynata niwanki? ¿Manachum ñoqaqa kani Israelpi llapallan ayllukunamanta taksan kaq Benjamín castamanta? Hinaptinqa ¿imanasqamá chaykunataqa niwanki? nispa.

²² Hinaptinmi Saulta criadontinta wasi ukuman Samuel pusaykurqa, hinaspam convidoman riqkunapa chawpinpi allin tiyanapi tiyaykachirqa, chaypiqa yaqa kimsa chunka runakunam tarikurqaku.

²³ Chaymantam yanukuqta Samuel nirqa: Sapaqlla churachisqay aychata apamuy, nispa.

²⁴ Yanukuqñataqmi piernan aychata hurqoykamuspan Saulman qoykurqa. Hinaptinmi Samuel nirqa: Kaytam qampaq sapaqllata churachirqani, mikuykuyá, qampaqmi churachirqani kay runakunaman convidasqay punchawpi mikuykunaykipaq, nispa. Chaynapim Saulwan Samuelqa chay punchawpi mikurqaku.

²⁵ Moqomanta llaqtaman uraykamuptinkum Samuelqa wasinpa altosninpi Saulwan parlarqa.

²⁶ Samuelmi paqarinnintin achikyaqta Saulta altospi puñuchkaptin qayarqa: Hatariyña avianaypaq, nispan. Hatariruspanmi Samuelwan kuska llaqtaman lloqsirqaku.

²⁷ Llaqtapa cantontaña uraykuchkaptinkum Saulta Samuel nirqa: Criadoykiyá puntachkachunña, qamqa tumpataraq suyaykuy, Diospa imam niwasqantam willanay kachkan, nispan.