1~Samuel 8 - Chuya Qellqa 1992

Israelpa mirayninkuna reyta mañakusqankumanta

¹ Samuelmi machuyaruspan Israel runakunapa jueznin kanankupaq churinkunata churarqa.

² Piwi churinpa sutinmi karqa Joel, qatiqninpañataqmi Abías. Paykunam Beerseba llaqtapi juez karqaku.

³ Ichaqa manam taytanku Samuel hinachu allinta ruwarqaku, aswanqa apuyayta kuyaruspankum sayniyuta chaskikuqku, ima sasachakuytapas mana kaqninpim allichaqku.

⁴ Chaymi Israelpa ancianonkuna huñunakuruspanku Ramá llaqtaman rirqaku, chaypi Samuelwan parlamunankupaq.

⁵ Paykunam Samuelta nirqaku: Qamqa machuyarunkiñam. Churikikunaqa manam qam hinachu ruwanku, chaynaqa huk reytaña churapuwayku juzgawanankupaq, huklaw nacionkunapi hina, nispanku.

⁶ “Reyta qowayku” nisqankum Samuelpaqa mana sonqonpaq hinachu karqa. Chaymi Samuelqa Diosta mañakurqa.

⁷ Hinaptinmi Samuelta Tayta Dios nirqa: Uyariy runakunapa tukuy ima mañakususqaykita, manam qamtachu qepanchakusunkiqa, aswanqa ñoqatam, manam paykunaqa reynin kanayta munankuchu.

⁸ Egipto nacionmanta hurqomusqay punchawmantapunim kunankama, karunchakuruspanku idolokunataña servichkanku, chaynallatam qamtapas ñoqata hina ruwasuchkanki.

⁹ Chaynaqa, uyariy mañakusqankuta, ichaqa puntata anyaykuy hinaspa qawaykachiy reypa imaynam paykunapi munaychakunanmanta, nispa.

¹⁰ Chaymi Samuelqa Diospa tukuy ima nisqanta rey mañakuq runakunaman willarqa:

¹¹ Munasqaykichik reyqa kaykunatam ruwachisunkichik: Churikichikkunatam soldadopaq apanqa, hinaspam wakinta churanqa: Caballokunapa chutasqan carretankunata nanachikunanpaq, wakintañataqmi caballokunapi sillada soldadon kananpaq chaynataq tropakunapa kamachiqnin kananpaq,

¹² churanqataqmi waranqa soldadokuna kamachiq kananpaq chaynataq pichqa chunka soldadokuna kamachiq kananpaq; wakintañataq chakranta yapupunanpaq, cosechankuna hoqaripunanpaq chaynataq armankuna hinaspa carretankuna ruwaq kanankupaq.

¹³ Chaynallataqmi warmi churikichikkunatapas churanqa perfumekunata ruwanankupaq, yanukunankupaq chaynataq tantata ruwanankupaq.

¹⁴ Reyqa hapikuykunqam allinnin olivos chakraykichiktawan allinnin uvas chakraykichiktapas, hinaspam kamachikuqkunaman qoykunqa.

¹⁵ Chakraykichikpa ruruntawan uvasnikichikpa ruruntapas diezmankichikmi, chaykunatam kamachikuqkunaman qonkichik.

¹⁶ Reyqa qechusunkichikmi criadoykichikkunatapas criadaykichikkunatapas, kallpanpi allinnin jovennikichikunatapas, allinnin toroykichikkunatawan asnoykichikkunatapas hinaspam llamkachikunqaku.

¹⁷ Uywaykichikmantapas chunkamantam hukninta qonkichik, kikikichikpas criadonkunam kankichik.

¹⁸ Chay punchawkunapim ñakakunkichik rey mañakusqaykichikmanta, Tayta Diosmi ichaqa manaña qamkunapa mañakuynikichikta uyarisunkichikñachu, nispa.

¹⁹ Llapa runakunam ichaqa Samuelpa nisqanta mana uyariqpas tukurqakuchu, aswanmi paykunaqa nirqaku: ¡Manam imananchu! ¡Reyniyku kanantam munaniku!

²⁰ Wakin nacionkuna hinam ñoqaykupas reyniyuq kayta munaniku, paymi nanachikuwanqaku, hinaspam ñawpaqniykuta rispan guerrapipas kamachiwanqaku, nispanku.

²¹ Samuelmi lliw runakunapa nisqanta uyarispan Diosman willarqa.

²² Hinaptinmi Samuelta Tayta Dios nirqa: Mañakusqankuman hina huk reyta akllapuy, nispa. Chaymi Samuelqa Israel runakunata kamachirqa maymi llaqtankuman kutinankupaq.