1~Samuel 4 - Chuya Qellqa 1992

Diospa Arcanta filisteokuna aparusqanmanta

¹ Chay tiempopim filisteokuna huñunakururqaku Israelpa mirayninkunawan guerrapi peleanankupaq, chaymi Israelpa mirayninkuna lloqsispanku carpankuta sayachirqaku Eben-ezerpa hichpanpi. Filisteokunañataqmi carpankuta sayachirqaku Afec llaqtapi.

² Chaymantam filisteokuna rirqaku Israelpa mirayninkunawan guerrapi peleanankupaq. Hinaspam Israelpa mirayninkunata venceruspanku tawa waranqa runakunata wañurachirqaku.

³ Chaymi Israelpa tropankuna campamentoman kutiykuptinku ancianokuna nirqaku: ¿Imanasqataq Tayta Diosqa filisteokunawan vencerachiwanchik? Rispanchik Silo llaqtamanta aparamusunchik Diospa contrato ruwasqan Arcata, chaynapi chawpinchikta rispan enemigonchikkunamanta salvawananchikpaq, nispanku.

⁴ Chaynapim runakunata Silo llaqtaman kacharqaku, querubinkunapa chawpinpi tiyakuq Tukuy Atiyniyuq Tayta Diospa contrato ruwasqan Arcata apamunankupaq; Eliypa churin Ofniwan Fineespas Arcawan kuskam hamurqaku.

⁵ Tayta Diospa contrato ruwasqan Arcata campamentoman chayarachimuptinkum, Israelpa tropankuna allpapas kuyurinankama kusikuymanta qaparirqaku.

⁶ Filisteokunañataqmi qaparisqankuta uyariruspanku tapunakurqaku: ¿Imanasqataq hebreo castakunapa campamentonpi chaynataña qaparichkanku? nispanku. Chaymantañam yacharurqaku Diospa contrato ruwasqan Arcata campamentoman aparamusqankuta.

⁷ Chaymi filisteokuna mancharikuspanku ninakurqaku: ¡Diosmi campamentonkuman chayaramun! ¡Imaynaraq kasunchik! Ñawpaqtaqa manam kaynachu karqa!

⁸ ¡Imaynaraq kasunchik! ¿Pitaq librawasunchik chay Atiyniyuq Diosninkumanta? Chay Diosmi chunniqpipas tukuy rikchaq ñakariywan Egipto runakunata castigarqa.

⁹ ¡Filisteokuna ama hukmanyaychikchu! ¡Kallpanchakuychik peleanaykichikpaq! ¡Chaynapi paykunawan servichikusqaykichikta hina ama hebreo runakunapa munaychakusqan kanaykichikpaq! ¡Chaynaqa, allin qarikuna hina peleaychik! nispa.

¹⁰ Chaymi filisteokuna peleaspanku Israel runakunata vencerurqaku, hinaptinmi Israel tropakuna kayman chayman ayqekurqaku. Achka-achka runakuna chaypi wañuruptinmi, Israelpa kimsa chunka waranqa chakiwan puriq tropankuna wañururqaku.

¹¹ Diospa contrato ruwasqan Arcatapas filisteokunam qechururqaku, Eliypa churin Ofnitawan Fineestapas iskaynintam wañurachirqaku.

Eliypa wañukusqanmanta

¹² Ichaqa Benjamín ayllumanta guerrapi peleaq runam kallpaspan chay punchawlla Silo llaqtaman chayarurqa, pachanpas llikipasqa hinaspa umanpas allpallaña.

¹³ Chayaruptinmi sacerdote Eliyqa uyan-uyanlla ñanpa patanpi tiyachkasqa. Paymi llumpay llakisqa kachkarqa Diospa contrato ruwasqan Arcamanta. Chay kallpaq runam llaqtanman chayaruspa willakurqa imam pasakusqanmanta, hinaptinmi llaqtantin runakuna qaparispa waqakurqaku.

¹⁴ Qaparisqankuta uyarispanmi Elí nirqa: ¿Imanasqataq chaynataña qaparichkanku? nispa. Hinaptinmi chay runa utqayllamanña kallpaspan Eliyman willaykurqa.

¹⁵ Eliyqa isqon chunka pusaqniyuq watanpiñam karqa, ñawsayaruspanmi manaña rikukuytapas atirqachu.

¹⁶ Chay runam sacerdote Eliyta nirqa: Ñoqam guerramanta ayqeramuni, nispa. Chaymi Elí tapurqa: ¿Imataq pasakun kuyasqay churillay? nispa.

¹⁷ Hinaptinmi chay willakuqñataq nirqa: Israel runakunam filisteokunamanta lluptikunku, runakunapas achkallañam wañurunku. Churiki Ofniwan Fineespas iskayninkum wañurunku, Diospa Arcantapas filisteokunam qechuruwanku, nispa.

¹⁸ Diospa Arcanmanta willaykuptinmi, Eliyqa tiyasqanmanta punku lawman qepaman wichiykurqa, hinaspam umanta takakuruspam yuyaqña kasqanrayku chaylla wañukurqa. Payqa tawa chunka watam Israel runakunapa kamachiqnin karqa.

¹⁹ Eliypa llumchuyninmi otaq Fineespa warminmi wiksayuq kaspan onqonan hichpapiña kachkarqa. Diospa Arcanta qechurusqankuta chaynataq suegronpas qosanpas wañukusqanta yachaykuspanmi, wachakuywan hapirachikurqa, hinaspanmi chay ratolla wachakururqa.

²⁰ Wachakuywan wañuy patanpiña kachkaptinmi yanapaqninkuna nirqaku: Ama manchakuychu, qari wawatam wachakurunki, nispanku. Paymi ichaqa manaña imatapas nirqachu nitaqmi musyakurqañachu.

²¹ Wawantam suticharqa Icabodwan: “Tayta Diospa atiyninmi Israelmanta chinkarun”, nispa.

²² Chaynataqa nirqa Diospa Arcan qechusqa kasqanraykum chaynataq suegronpiwan qosan wañukusqanraykum.