1~Samuel 31 - Chuya Qellqa 1992

Saulpa wañukusqanmanta

¹ Filistea tropakunam Israel tropakunawan pelearqaku, hinaptinmi Israel tropakuna ayqekuyta qallaykuspanku Gilboa orqopi achka-achka wañururqaku.

² Filistea tropakunam Saultawan churinkunata qatispanku, Jonatanta, Abinadabta hinaspa Malquisuata wañurachirqaku.

³ Filistea tropankunam Saulta wañuchiypi rispanku flechawan hapirachirqaku, hinaptinmi Saulqa paykunata llumpayta manchakururqa.

⁴ Chaymi arman apaq soldadota Saúl nirqa: Espadaykita hurqospayki tuksiruway, manam munanichu wak mana señalasqa enemigoykuna tuksiruwaspa burlakuwananta, nispa. Ichaqa arman apaq soldadom llumpayta manchakusqanrayku tuksiyta mana munarqachu, hinaptinmi Saulqa kikinña espadanta hapiykuspan tuksikururqa.

⁵ Arman apaq soldadopas Saulpa wañurachikusqanta qawaykuspanmi espadanwan tuksikururqa, chaynapim paypas wañururqa.

⁶ Chay punchawllapim Saulqa kimsan churinkunapiwan, arman apaq soldadowan chaynataq llapallan runankunapiwan wañururqaku.

⁷ Israel tropakunapa ayqekusqanta rikuruspankum chaynataq churinkunapiwan Saúl wañurusqanta yacharuspankum, chay qechwapa waklawninpi yachaq chaynataq Jordán mayupa intipa qespimunan lawninpi yachaq Israel runakuna llaqtankuta saqespa ayqekurqaku. Hinaptinmi filisteokunaña chaykunapi yachakurqaku.

⁸ Paqarinnintin punchawmi wañuqkunapa imantapas hoqarikamunankupaq Filistea soldadokuna lloqsirqaku, hinaspam Gilboa orqopi Saultawan churinkunata pampapi wañusqa chutarayachkaqta tarirurqaku.

⁹ Chaymi Saulpa umanta qoruruspanku armankunatapas lliwta hoqarirurqaku, hinaspam Filistea llaqtakunaman chaynataq diosninkunamanpas runakunawan willachimurqaku.

¹⁰ Saulpa armankunatam Astarot sutiyuq idolonkupa templonpi churarqaku, Saulpa cuerpontañataqmi Bet-sán llaqtapa murallanman warkururqaku.

¹¹ Galaad lawpi Jabes llaqtayuqkunañataqmi Saulpa cuerponta filisteokuna imam ruwarusqankuta yacharuspanku,

¹² llapallan allinnin qari-qari runakuna tukuy tuta pasaspanku Bet-sán llaqtaman chayarurqaku, hinaspam murallanpi warkurayaq Saulpa cuerpontawan churinkunapa cuerponta uraykachispa Jabes llaqtankuman kutikurqaku. Chaypim chay cuerpokunata kañarurqaku.

¹³ Tullunkunatañataqmi Jabes llaqtapi huk sachapa sikinpi pamparurqaku, hinaspam qanchis punchaw ayunarqaku.